Sù-tô͘ Hēng-tōan 第 16 章 - 巴克禮全羅

1

Pó-lô kàu Te̍k-pì, koh kàu Lō͘-sū-tek: tú-tn̄g tī hia ū chı̍t ê ha̍k-seng miâ Thê-mô͘-thài, i ê lāu-bú sī Iû-thài sìn ê hū-jîn-lâng; i ê lāu-pē sī Hi-lī-nî lâng.

2

I hō͘ Lō͘-sū-tek Í-ko-liām chiah ê hiaⁿ-tī só͘ o-ló.

3

Pó-lô ài chit lâng kap i khì; ūi-tio̍h hiah ê só͘-chāi ê Iû-thài lâng, chiū kā i kiâⁿ kat-lé; in-ūi in lóng chai i ê lāu-pē sī Hi-lī-nî lâng.

4

In keng-kè chiah ê siâⁿ ê sî, chiong Iâ-lō͘-sat-léng sù-tô͘, tiúⁿ-ló só͘ tiāⁿ-tio̍h ê bēng-lēng thôan hō͘ in siú.

5

Tùi án-ni chiah ê kàu-hōe sìn ná kian-kò͘, lâng-gia̍h jı̍t-jı̍t ke-thiⁿ.

6

In keng-kè Hut-lū-ka, Ka-lia̍p-thài ê tōe-hng, in-ūi Sèng Sîn bat kìm in thôan tō-lí tī A-se-a,

7

chiū kiâⁿ kàu Múi-se-a ê pian-kài, siūⁿ beh khì Pì-chhui-nî;

8

Iâ-so͘ ê Sîn m̄ chún; chiū tùi Múi-se-a keng-kè, lo̍h kàu Te̍k-lô-a.

9

Pó-lô mî-sî khòaⁿ-kìⁿ īⁿ-siōng; ū chı̍t ê Má-kî-tùn lâng khiā-teh kiû i kóng, Chhiáⁿ kè-lâi Má-kî-tùn pang-chān góan.

10

Pó-lô í-keng khòaⁿ-kìⁿ īⁿ-siōng, góan chiah-ê liâm-piⁿ ì-ài beh khì Má-kî-tùn, lia̍h-chòe sī Siōng-tè tiàu góan thôan hok-im hō͘ in.

11

Só͘-í tùi Te̍k-lô-a tah chûn tı̍t-tı̍t kàu Sat-mô͘-te̍k-lat, keh jı̍t kàu Nî-a-pho-lī;

12

tùi hia kàu Hui-lı̍p-pí, chiū-sī Má-kî-tùn hit tè thâu chı̍t ê siâⁿ, iā sī Lô-má lâng hun-siat ê siâⁿ: góan tī chit ê siâⁿ tiàm kúi-nā jı̍t.

13

Tī an-hioh-jı̍t chhut siâⁿ-mn̂g gōa kàu hô-piⁿ, phah-sǹg tī hia ū kî-tó ê só͘-chāi; chiū chē-teh, kap só͘ chū-chı̍p ê hū-jîn-lâng tâm-lūn.

14

Ū chı̍t-ê bōe chí-sek pò͘ ê hū-jîn-lâng, miâ Lū-tí-a, lâi thiaⁿ, i sī Chhui-ngá-chhui-lat siâⁿ ê lâng, pêng-sò͘ kèng-pài Siōng-tè; Chú khui i ê sim, hō͘ i choan ǹg Pó-lô só͘ kóng ê ōe.

15

I kap i ê ke í-keng siū sóe-lé, chiū kiû góan, kóng, Nā lia̍h góa chòe chin-sı̍t sìn Chú ê lâng, chhiáⁿ kàu góa ê ke tòa. Chiū kiông-kiông lâu góan.

16

Āu-lâi góan khì kî-tó ê só͘-chāi, ū chı̍t ê lú-pī tú-tio̍h góan, i hō͘ pok-kòa ê sîn chiūⁿ sin; pêng-sò͘ ēng pok-kòa hō͘ hiah ê chú-lâng tōa thàn chîⁿ.

17

I tè Pó-lô kap góan, kiò kóng, Chiah ê lâng chiū-sī chì-kôaiⁿ Siōng-tè ê lô͘-po̍k, ēng chín-kiù ê lō͘ thôan hō͘ lín.

18

I chōe-chōe jı̍t án-ni kiâⁿ. Pó-lô chin iàm-hūn, o̍at-tńg-sin kā hit ê sîn kóng, Góa thok Iâ-so͘ Ki-tok ê miâ bēng-lēng lí tùi i chhut-khì. Sîn chek-sî chhut-khì.

19

I hiah ê chú-lâng khòaⁿ-kìⁿ thàn chîⁿ ê ǹg-bāng í-keng sit-lo̍h, chiū lia̍h Pó-lô, Se-lah, thoa in jı̍p koe-chhī, khì kìⁿ iú-si-koaⁿ, koh ké-sàng kàu chiūⁿ-si-koaⁿ kóng,

20

Chiah ê lâng sī Iû-thài lâng, tōa kiáu-jiáu lán ê siâⁿ,

21

thôan lán Lô-má lâng só͘ m̄ eng-kai siú, m̄ eng-kai kiâⁿ ê kui-lē.

22

Chèng lâng kui-kûn khí-lâi kong-kek in; chiūⁿ-si-koaⁿ pak in ê saⁿ, bēng-lēng ēng kùn phah in.

23

Phah chin chōe ē, chiū koaiⁿ in lo̍h kaⁿ, hoan-hù kò͘-kaⁿ ê giâm-kín kò͘-siú;

24

kò͘-kaⁿ ê siū chit hō bēng-lēng, chiū koaiⁿ in lo̍h lāi-têng kaⁿ, kông in ê kha tī chhâ-kông nı̍h.

25

Nā-sī pòaⁿ-mî Pó-lô, Se-lah kî-tó gîm si, o-ló Siōng-tè;

26

koaiⁿ tī kaⁿ-nı̍h ê lâng iā chù-ì teh thiaⁿ; hut-jiân tōe tōa tāng, tì-kàu kaⁿ ê tōe-ki lóng iô-tāng; chiah ê mn̂g iā liâm-piⁿ lóng khui; chèng lâng ê hêng-kū it-chīn lak.

27

Kò͘-kaⁿ ê lâng chhíⁿ, khòaⁿ-kìⁿ kaⁿ-mn̂g khui, phah-sǹg kaⁿ-siû lóng í-keng tô-cháu, chiū pu̍ih to, beh ka-kī thâi.

28

Nā-sī Pó-lô tōa siaⁿ kiò, kóng, Bo̍h-tit ka-kī siong-hāi; góan lóng tī chia.

29

Kò͘-kaⁿ ê lâng kiò lâng kia̍h hé lâi, thiàu jı̍p khì, ngia̍uh-ngia̍uh-chhoah phak tī Pó-lô, Se-lah ê bīn-chêng, chhōa in chhut-lâi, kóng,

30

Sian-siⁿ ah, góa tio̍h cháiⁿ-iūⁿ chòe, chiah ōe tit-tio̍h kiù?

31

Ìn kóng, Tio̍h sìn Chú Iâ-so͘, lí chiū tit-tio̍h kiù, í-kı̍p lí ê ke.

32

Chiū ēng Chú ê tō-lí kóng hō͘ i kap i ke-lāi lóng-chóng ê lâng thiaⁿ.

33

Tī hit mî hit sî, kò͘-kaⁿ ê lâng chhōa in khì sóe in ê siong; i kap chôan-ke ê lâng chek-sî lóng siū sóe-lé.

34

Chhōa in chiūⁿ i ê chhù, pī-pān hō͘ in chia̍h; í-keng sìn Siōng-tè, chiū kap thong-ke tōa hoaⁿ-hí.

35

Kàu thiⁿ kng, chiūⁿ-si-koaⁿ chhe gê-ia̍h lâi, kóng, Pàng hiah ê lâng.

36

Kò͘-kaⁿ ê chiong chiah ê ōe kā Pó-lô kóng, Chiūⁿ-si-koaⁿ chhe lâng lâi beh pàng lín; taⁿ thang chhut-lâi, an-jiân khì.

37

Nā-sī Pó-lô kā hiah ê lâng kóng, Góan sī Lô-má lâng, bē sím-mn̄g, chiū kong-hêng phah góan, koh koaiⁿ góan lo̍h kaⁿ; taⁿ beh àm-chīⁿ kóaⁿ góan chhut mah? tek-khak bōe chòe tit, tio̍h in chhin-sin lâi chhōa góan chhut.

38

Gê-ia̍h chiong chiah ê ōe hê-hok chiūⁿ-si-koaⁿ; chiūⁿ-si-koaⁿ thiaⁿ-kìⁿ in sī Lô-má lâng, chiū kiaⁿ.

39

Chiah lâi khó͘-khǹg in; chhōa in chhut, chhiáⁿ in lī-khui hit ê siâⁿ.

40

In chhut kaⁿ, jı̍p Lū-tí-a ê chhù; í-keng kìⁿ-tio̍h chiah ê hiaⁿ-tī, chiū khó͘-khǹg in, chiah lī-khui hia.