Sù-tô͘ Hēng-tōan 第 17 章 - 巴克禮全羅

1

In keng-kè Àm-hui-pho-lí, A-pho-lô-nî-a, kàu Thiap-sat-lô-nî-ka, tī hia ū Iû-thài lâng ê hōe-tn̂g;

2

Pó-lô chiàu pêng-siông ê khóan jı̍p-khì chiū-kūn in; tī saⁿ ê an-hioh-jı̍t,

3

ín-khí sèng-keng kap in piān-lūn, khui-thiah chí-bêng Ki-tok eng-kai siū hāi, tùi sí-lâng tiong koh-o̍ah; koh kóng, Góa só͘ tùi lín thôan ê Iâ-so͘ chiū-sī Ki-tok.

4

In tiong-kan ū-ê siū khó͘-khǹg, chiū kui-óa Pó-lô, Se-lah; koh ū kèng-khiân ê Hi-lī-nî lâng put-chí chōe, chun-kùi ê hū-jîn-lâng ia̍h bô chió.

5

To̍k-to̍k Iû-thài lâng òan-tò͘, chio koe-chhī ê húi-lūi kúi-nā lâng, kàu-so peh-sìⁿ kui kûn chū-chı̍p, jiáu-tōng thong siâⁿ, kong-jı̍p Iâ-sun ê chhù, ài lia̍h in chhut-lâi kau hō͘ peh-sìⁿ.

6

Bô tú-tio̍h, chiū thoa Iâ-sun kap kúi-nā ê hiaⁿ-tī, sàng hō͘ tōe-hng koaⁿ; kiò kóng, Chiah ê phah-lōan thiⁿ-ē ê lâng ia̍h kàu chia;

7

Iâ-sun chiap-la̍p in; chiah ê lâng lóng ûi-ke̍h Kai-sat ê bēng-lēng, kóng ū pa̍t ê ông, Iâ-so͘.

8

Chèng peh-sìⁿ kap tōe-hng koaⁿ thiaⁿ-kìⁿ che, chiū kiaⁿ-hiâⁿ.

9

Í-keng siu Iâ-sun kap kî-û ê lâng ê pó-chn̄g, chiū pàng in.

10

Tùi án-ni hiaⁿ-tī sûi-sî chhe Pó-lô, Se-lah thàu-mî khì Pì-lí-a; nn̄g lâng í-keng kàu tè, chiū jı̍p Iû-thài lâng ê hōe-tn̂g.

11

Hiah ê lâng pí Thiap-sat-lô-nî-ka lâng khah bûn-bêng, in-ūi in chù-ì siū tō-lí, ta̍k jı̍t chhâ-khó sèng-keng, khòaⁿ chiah ê sū kó-jiân ū án-ni á bô.

12

Só͘-í kî-tiong ū chōe-chōe lâng sìn; koh ū Hi-lī-nî chun-kùi ê hū-jîn-lâng, kap ta-po͘-lâng bô chió.

13

To̍k-to̍k Thiap-sat-lô-nî-ka ê Iû-thài lâng chai Pó-lô tī Pì-lí-a thôan Siōng-tè ê tō-lí, chiū kàu hia, iô-tāng kiáu-jiáu chèng lâng.

14

Hiaⁿ-tī liâm-piⁿ chhe Pó-lô khì kàu hái-piⁿ; to̍k-to̍k Se-lah, Thê-mô͘-thài iû-gôan tòa hia.

15

Sàng Pó-lô ê lâng chhōa i kàu Ngá-tián; siū bēng-lēng kiò Se-lah Thê-mô͘-thài kín-kín chiū-kūn i, chiū tò-khì.

16

Pó-lô tī Ngá-tián thèng-hāu in, khòaⁿ-kìⁿ móa siâⁿ lóng sī Ngó͘-siōng, chiū siong-sim tio̍h-kip.

17

Só͘-í tī hōe-tn̂g kap Iû-thài lâng í-kı̍p kèng-khiân ê lâng piān-lūn, ta̍k jı̍t tī koe-chhī-nı̍h kap só͘ tú-tio̍h ê ia̍h sī án-ni.

18

Ū Í-pí-kó͘-lô Sū-to-a, nn̄g kàu-mn̂g ê tiat-sū kap i piān-lūn. Ū-ê kóng, chit-ê khioh lâng ê ōe-phoh ê beh kóng sím-mı̍h? Ū-ê kóng, I sī chhin-chhiūⁿ thôan pa̍t pang-kok ê kúi-sîn ê; sī in-ūi i thôan Iâ-so͘ kap koh-o̍ah ê tō-lí.

19

In chiū chhōa i kàu A-lio̍k soaⁿ, kóng, Lí só͘ kóng sin ê kàu thang tit-tio̍h chai mah?

20

In-ūi lí ēng kî-kòai ê sū thôan jı̍p góan ê hī-khang: só͘-í góan ài chai hiah-ê sī sím-mı̍h ì-sù.

21

(Ngá-tián lâng kap tiàm hia ê chhut-gōa lâng bōe kò͘-tit pa̍t hāng sū, to̍k-to̍k sī chiong sin ê sū lâi kóng, lâi thiaⁿ nā-tiāⁿ)

22

Pó-lô khiā tī A-lio̍k soaⁿ tiong, kóng, Ngá-tián lâng ah, góa khòaⁿ lín hōan sū kèng-ùi sîn-bêng, chám-jiân jia̍t-sim.

23

In-ūi góa teh kiâⁿ-iû ê sî khòaⁿ-kìⁿ lín só͘ kèng-pài ê, tú-tio̍h chı̍t chō tôaⁿ, téng-bīn siá, kóng, Bē bat ê Siōng-tè. Lín só͘ bē bat lâi kèng-pài ê, góa ēng I lâi kā lín kóng.

24

Hit ê chhòng-chō sè-kan kap kî-tiong bān mı̍h ê Siōng-tè, kì-jiân sī thiⁿ tōe ê Chú, bô khiā-khí chhiú chō ê tiān;

25

bô hō͘ lâng ê chhiú ho̍k-sāi, ná chhin-chhiūⁿ I ū só͘ khiàm-kheh; sī ka-kī ēng o̍ah-miā, chhóan-khùi, kap bān mı̍h hō͘ chèng lâng;

26

koh chhòng-chō bān pang ê lâng, tùi chı̍t ê pún-gôan, khiā-khí tī chôan tōe-bīn, koh kā in hān tāi-seng tiāⁿ-tio̍h ê sî-kî, kap só͘ khiā-khí ê tōe-kài;

27

sī beh hō͘ in chhē Siōng-tè, kiám-chhái thang chhúi-mô͘ lâi tit-tio̍h, kî-sı̍t I lī-khui lán ta̍k lâng bô hn̄g.

28

In-ūi lán tiàm-tī I lâi o̍ah, lâi tín-tāng, lâi tī-teh; chhin-chhiūⁿ lín tiong-kan chòe si ê lâng ū-ê ū kóng, In-ūi lán chiah-ê ia̍h sī I ê kiáⁿ-lūi.

29

Taⁿ kì-jiân sī Siōng-tè ê kiáⁿ-lūi, chiū m̄ eng-kai lia̍h chòe Siōng-tè ê pún-chit chhin-chhiūⁿ kim, gûn, chio̍h, lâng ê kang-hu lâng ê sim-sū só͘ tiau-tok ê.

30

Hiah ê m̄ chai-iáⁿ ê sî-tāi, Siōng-tè bô khêng-khàm; taⁿ chiū bēng-lēng ta̍k só͘-chāi ê lâng lóng-chóng tio̍h hóan-hóe:

31

in-ūi ū tiāⁿ-tio̍h chı̍t jı̍t, beh ēng I só͘ siat-lı̍p ê lâng, chiàu kong-gī sím-phòaⁿ thiⁿ-ē; sī tùi sí-lâng tiong hō͘ I koh-o̍ah, hō͘ chèng lâng ū pîn-kù thang sìn.

32

In thiaⁿ-kìⁿ sí-lâng koh-o̍ah ê ōe, ū-ê chhiò i; ū-ê kóng, Góan beh koh thiaⁿ lí kóng che.

33

Tùi án-ni Pó-lô tùi in tiong-kan chhut-khì.

34

Nā-sī ū kúi-nā lâng óa i lâi sìn; tiong-kan ū A-lio̍k soaⁿ ê hōe-ôan Tiu-nî-siu, kap chı̍t ê hū-jîn-lâng, miâ kiò Tāi-má-lí, koh iā ū pa̍t lâng.