Sù-tô͘ Hēng-tōan 第 20 章 - 巴克禮全羅

1

Hán-hōa í-keng tiāⁿ, Pó-lô kiò ha̍k-seng lâi, khǹg in; chiū kap in lī-pia̍t, khí-sin beh khì Má-kî-tùn.

2

Í-keng keng-kè hiah ê tōe-hng, ēng chōe-chōe ōe khó͘-khǹg in, chiū kàu Hi-lī-nî.

3

Tiàm hia saⁿ ge̍h jı̍t; beh tah chûn khì Sū-lī-a. Iû-thài lâng siat-kè beh hāi i; i chiū tiāⁿ-tio̍h ì-sù tùi Má-kî-tùn tò-tńg.

4

Tè i khì A-se-a ê lâng, ū Pì-lí-a lâng, Pit-lō͘ ê kiáⁿ Só͘-pá-tek; Thiap-sat-lô-nî-ka lâng, A-lí-ta̍t-kó͘ kap Se-kong-to͘; Te̍k-pì lâng Ka-iû, kap Thê-mô͘-thài; koh ū A-se-a lâng Chhui-ki-kó͘ kap Te̍k-lô-hui-mô͘.

5

Chit kúi lâng tāi-seng khì, tī Te̍k-lô-a thèng-hāu góan.

6

Tû-kàⁿ-choeh āu, góan tùi Hui-lı̍p-pí khui chûn, gō͘ jı̍t kàu Te̍k-lô-a, kap in siong-hōe; tiàm hia chhit jı̍t.

7

Chhit jı̍t ê thâu chı̍t jı̍t, góan chiah-ê chū-chı̍p beh peh piáⁿ, Pó-lô ài tī keh jı̍t khí-sin, chiū kap in káng-lūn tō-lí, chhiân kàu pòaⁿ-mî.

8

Góan só͘ chū-chı̍p ê lâu ū tiám chōe-chōe teng.

9

Ū chı̍t ê siàu-liân lâng, miâ Iû-chhui-kó͘, chē tī thang-á téng, khùn tāng bîn; Pó-lô káng-lūn í-keng kú, siàu-liân lâng in-ūi khùn, tùi saⁿ chàn lâu po̍ah-lo̍h-lâi; lâng lâi hû i, í-keng sí lah.

10

Pó-lô lo̍h-khì phak tī i ê sin-chiūⁿ, phō i, kóng, Lín bo̍h chòe siaⁿ; i ê hûn iáu tī-teh.

11

Chiū koh chiūⁿ-khì peh piáⁿ lâi chia̍h, saⁿ-kap tâm-lūn kú-kú; kàu thiⁿ-kng chiū khí-sin.

12

Gín-ná í-keng o̍ah, lâng chhōa i lâi, tōa siū an-ùi.

13

Góan tāi-seng chiūⁿ chûn, khui chûn khì A-sok, ài tī hia chih-chiap Pó-lô: in-ūi i ū án-ni hoan-hù, ka-kī beh tùi lō͘ khì.

14

Í-keng tī A-sok kap góan siong-hōe, góan chiū chih i chiūⁿ chûn, khì Bí-chhui-lī-nî.

15

Tùi hia khui chûn tē jī jı̍t kàu Ki-o ê tùi-bīn; keh jı̍t chûn koa tī Sat-mô͘; koh chı̍t jı̍t kàu Bí-lī-to͘.

16

In-ūi Pó-lô koat-ì tah chûn siám kè Í-hut-só͘, bián-tit kú-kú tiàm tī A-se-a; chiū kóaⁿ-kín kiâⁿ, khòaⁿ ōe thang tī gō͘-sûn-choeh jı̍t kàu Iâ-lō͘-sat-léng.

17

Tùi Bí-lī-to͘ chhe lâng kàu Í-hut-só͘, chhiáⁿ kàu-hōe ê tiúⁿ-ló lâi.

18

In í-keng kàu, chiū tùi in kóng, Lín ka-kī chai góa tùi khí-thâu ta̍h-tio̍h A-se-a tōe ê jı̍t, thâu kàu bé kap lín cháiⁿ-iūⁿ;

19

góa ho̍k-sāi Chú hōan sū khiam-sùn, koh lâu ba̍k-sái, koh tùi Iû-thài lâng ê bô͘-hāi le̍k-kè chhì-liān;

20

hōan ū lī-ek ê, góa bē bat kiu-ko̍eh bô kā lín kóng, lâi kà-sī lín, bô lūn tī chèng lâng ê bīn-chêng, á-sī tī chiah ê jîn-ke;

21

tùi Iû-thài kap Hi-lī-nî lâng chèng-bêng, tio̍h ǹg Siōng-tè lâi hóan-hóe, koh tio̍h ǹg lán ê Chú Iâ-so͘ Ki-tok lâi sìn.

22

Taⁿ góa ê sim-sîn siū pa̍k khì Iâ-lō͘-sat-léng, bē chai tī hia beh tú-tio̍h cháiⁿ-iūⁿ;

23

to̍k-to̍k Sèng Sîn tī ta̍k ê siâⁿ tùi góa chèng-bêng, kóng ū só-liān kap hōan-lān teh thèng-hāu góa.

24

Nā-sī góa bô lia̍h sìⁿ-miā chòe iàu-kín, lâi khòaⁿ chòe pó-pòe, to̍k-to̍k sī beh chīn góa ê lō͘-chām, kap tùi Chú Iâ-so͘ só͘ siū ê chit-hūn, lâi chèng-bêng Siōng-tè un-tián ê hok-im.

25

Góa pêng-sò͘ sì-kòe kiâⁿ tī lín tiong-kan thôan Siōng-tè ê kok, taⁿ góa chai lín chèng lâng bô koh kìⁿ góa ê bīn.

26

Só͘-í góa kin-á-jı̍t tùi lín kan-chèng, nā ū lâng tîm-lûn, góa bô chek-sêng.

27

In-ūi góa bē bat kiu-ko̍eh bô ēng Siōng-tè ê chí-ì it-chīn kā lín kóng.

28

Lín tio̍h ka-kī kín-sīn, ia̍h tio̍h kín-sīn chôan kûn, Sèng Sîn tī in tiong-kan siat-lı̍p lín chòe kàm-tok, lâi chiàu-kò͘ Siōng-tè ê kàu-hōe, chiū-sī I ēng ka-kī ê huih só͘ tit-tio̍h ê.

29

Góa chai góa lī-khui liáu-āu, beh ū hiong-ok ê chhâi-lông jı̍p lín tiong-kan, bô sioh iûⁿ-kûn;

30

koh tùi lín ka-kī ê tiong-kan, beh ū lâng khí-lâi kóng ge̍k-lí ê ōe, ài ín-iú ha̍k-seng thàn i.

31

Só͘-í lín tio̍h kéng-séng, kì-liām góa saⁿ nî ê kú, mî-jı̍t bô soah, lâu ba̍k-sái lâi kéng-kài lín ta̍k lâng.

32

Taⁿ góa chiong lín kau-thok Siōng-tè, kap I un-tián ê tō, sī ōe kiàn-lı̍p lín, hō͘ lín tit-tio̍h gia̍p tī lóng-chóng chiâⁿ-sèng ê lâng ê tiong-kan.

33

Góa bē bat tham lâng ê gûn, kim, i-ho̍k.

34

Lín ka-kī chai, chit nn̄g ki chhiú ū kiong-kip góa ê khiàm-ēng, í-kı̍p kap góa tī-teh ê lâng.

35

Góa hōan sū chòe lín ê bô͘-iūⁿ, tio̍h án-ni tio̍h-bôa, lâi hû-chhî lóan-jio̍k ê lâng; koh tio̍h kì-tit Chú Iâ-so͘ pún-sin ê ōe, kóng, Hō͘ lâng ê, pí tùi lâng the̍h ê, khah ū hok-khì.

36

Kóng soah, kūi-lo̍h kap in chèng lâng kî-tó.

37

Chèng lâng tōa thî-khàu, phō Pó-lô ê ām-kún, chim i;

38

tē it hôan-ló ê, chiū-sī i só͘ kóng ê ōe, í-āu bōe koh kìⁿ-tio̍h i ê bīn. Chiū sàng i lo̍h chûn.