Sù-tô͘ Hēng-tōan 第 21 章 - 巴克禮全羅

1

Góan í-keng lī-pia̍t in khui chûn, tı̍t-tı̍t kàu Ko-sū, keh jı̍t kàu Lô-tí, tùi hia koh kàu Phàⁿ-tāi-lah;

2

tú-tio̍h chı̍t chiah chûn beh kè-khì Hui-nî-ki, chiū tah i khí-sin.

3

Í-keng ōe khòaⁿ-kìⁿ Ku-pí-lō͘, tùi chiàⁿ pêng kiâⁿ-kè, kàu Sū-lī-a, tī Chhui-lô chiūⁿ soaⁿ; in-ūi chûn tī hia sià chāi.

4

Chhē-tio̍h ū ha̍k-seng, kap in tòa chhit jı̍t; in tùi Sîn kám-tōng, kā Pó-lô kóng bo̍h-tit kiâⁿ kàu Iâ-lō͘-sat-léng.

5

Chiah ê jı̍t í-keng móa, góan khí-sin kiâⁿ, chèng lâng kap bó͘ kiáⁿ sàng góan kàu siâⁿ-gōa;

6

chiū lóng kūi-lo̍h tī hái-piⁿ kî-tó, tāi-ke saⁿ-sî; góan chiūⁿ chûn, in tò-khì in tau.

7

Góan tùi Chhui-lô chúi-lō͘ kiâⁿ chīn, chiū kàu To-lī-mái, chhéng-an hiaⁿ-tī, kap in tòa chı̍t jı̍t.

8

Keh jı̍t khí-sin kàu Kai-sat-lī-a; jı̍p thôan hok-im ê lâng Hui-le̍k ê ke, kap i saⁿ-kap tòa; i sī hit chhit-lâng tiong chı̍t ê.

9

I ū sì ê cha-bó͘-kiáⁿ, lóng sī chāi-sek-lú, iā chòe sian-ti.

10

Góan tiàm hia kúi-nā jı̍t, ū sian-ti, miâ A-ka-pò͘, tùi Iû-thài lo̍h-lâi.

11

Chiū-kūn góan, the̍h Pó-lô ê tòa, pa̍k ka-kī ê kha-chhiú, kóng, Sèng Sîn kóng, Iû-thài lâng tī Iâ-lō͘-sat-léng beh án-ni pa̍k chit tiâu tòa ê chú-lâng, kau tī gōa-pang lâng ê chhiú.

12

Góan thiaⁿ-kìⁿ chiah ê ōe, chiū kap hit só͘-chāi ê lâng khǹg Pó-lô m̄-thang chiūⁿ Iâ-lō͘-sat-léng.

13

Pó-lô chiū ìn, kóng, Lín siáⁿ-sū thî-khàu, lâi chô-chak góa ê sim ah? Góa ūi-tio̍h Chú Iâ-so͘ ê miâ, m̄ nā siū pa̍k, chiū sí tī Iâ-lō͘-sat-léng, ia̍h í-keng piān lah.

14

I m̄ siū khó͘-khǹg, góan chiū soah, kóng, Chú ê chí-ì tit-tio̍h chiâⁿ, chiū-sī.

15

Chiah ê jı̍t liáu-āu, góan siu-sı̍p hêng-lí, chiūⁿ Iâ-lō͘-sat-léng.

16

Kai-sat-lī-a kúi-nā ê ha̍k-seng kap góan khì, ia̍h chhōa chı̍t ê Ku-pí-lō͘ lâng Ná-sun, sī kū ê ha̍k-seng; góan beh hioh in tau.

17

Kàu Iâ-lō͘-sat-léng hiaⁿ-tī hoaⁿ-hí chih-chiap góan.

18

Keh jı̍t, Pó-lô kap góan jı̍p khì kìⁿ Ngá-kok; chèng tiúⁿ-ló ia̍h tī-teh.

19

Pó-lô í-keng kā in chhéng-an, chiū chiong Siōng-tè ēng i chòe kang, só͘ kiâⁿ tī gōa-pang ê, chı̍t hāng chı̍t hāng kóng bêng.

20

In thiaⁿ-kìⁿ chiū kui êng-kng Siōng-tè; iā tùi Pó-lô kóng, Hiaⁿ-tī ah, lí khòaⁿ-kìⁿ Iû-thài lâng ê tiong-kan sìn-ê jōa chōe bān;

21

lóng sī ūi-tio̍h lu̍t-hoat teh jia̍t-sim; in bat thiaⁿ-kìⁿ lâng kóng lí kà-sī gōa-pang tiong ê Iû-thài lâng lóng pōe Mô͘-se, kóng bo̍h-tit kā in ê kiáⁿ kiâⁿ kat-lé, ia̍h bo̍h-tit thàn chiah ê kui-lē. Taⁿ beh cháiⁿ-iūⁿ?

22

In tek-khak ōe thiaⁿ-kìⁿ lí lâi.

23

Só͘-í góan só͘ kā lí kóng ê, lí tio̍h kiâⁿ i.

24

Góan chia ū sì ê lâng hē gōan; lí chhōa chiah ê lâng kap in chiâⁿ chheng-khì, chhut só͘-hùi hō͘ in thì thâu-mn̂g; án-ni chiū chèng lâng ōe chai só͘ thiaⁿ-kìⁿ kóng-khí lí ê tāi-chì, sī bô iáⁿ; chiū lí pún-sin ia̍h sī siú lu̍t-hoat lâi kiâⁿ.

25

Lūn-kàu sìn Chú ê gōa-pang lâng, góan í-keng bat kià phoe gī-tiāⁿ tio̍h kìm-kài chè ngó͘-siōng ê mı̍h, kap huih, kap nı̍h-sí ê mı̍h, kap îm-lōan.

26

Pó-lô chiū chhōa hiah ê lâng, tē jī jı̍t kap in chiâⁿ chheng-khì, jı̍p tiān, pò bêng chheng-khì ê jı̍t-kî móa lah, thèng-hāu kā in ta̍k lâng hiàn lé-mı̍h.

27

Hí chhit jı̍t teh-beh móa, tùi A-se-a lâi ê Iû-thài lâng khòaⁿ-kìⁿ Pó-lô tī tiān-nı̍h, chiū kàu-so chèng peh-sìⁿ, hē chhiú lia̍h i, kiò kóng, Í-sek-lia̍t lâng ah, lâi pang-chān;

28

chit lâng chiū-sī hit ê tī ta̍k só͘-chāi kà-sī chèng lâng, kong-kek lán ê peh-sìⁿ, kap lu̍t-hoat, kap chit só͘-chāi ê; koh ū chhōa Hi-lī-nî lâng jı̍p tiān, phah lâ-sâm chit ê sèng ê só͘-chāi.

29

In-ūi in bat khòaⁿ-kìⁿ Í-hut-só͘ lâng Te̍k-lô-hui-mô͘ kap i tī siâⁿ-lāi, phah-sǹg Pó-lô ū chhōa i jı̍p tiān.

30

Tùi án-ni thong siâⁿ iô-choah, peh-sìⁿ lóng cháu-lâi; lia̍h Pó-lô, thoa i chhut tiān; chiah ê mn̂g liâm-piⁿ koaiⁿ.

31

In teh-beh thâi i, ū siau-sit thôan kàu iâⁿ-nı̍h ê chhian-chóng, kóng thong Iâ-lō͘-sat-léng hun-lōan.

32

I liâm-piⁿ chhōa peng-teng kap pé-chóng kúi-nā ê, cháu lo̍h-khì kàu in hia; in khòaⁿ-kìⁿ chhian-chóng kap peng-teng, chiū thêng chhiú, bô koh phah Pó-lô.

33

Chhian-chóng kūn chêng lia̍h Pó-lô, bēng-lēng ēng nn̄g tiâu liān pa̍k i; mn̄g i sī chī-chūi, chòe sím-mı̍h tāi-chì.

34

Chèng lâng chı̍t ê hoah chı̍t khóan; in-ūi hán-hōa, bōe chai hit ê sı̍t-chêng, chiū bēng-lēng tòa i jı̍p iâⁿ-pôaⁿ.

35

Í-keng kàu kiā-á, in-ūi chèng lâng oe-khoeh chin hiông, peng-teng chiū chiong Pó-lô chhah chiūⁿ-khì;

36

sī chèng peh-sìⁿ tè tī āu-bīn, kiò kóng, Kā i tû-khì.

37

Pó-lô hō͘ in tòa-khì beh jı̍p iâⁿ-pôaⁿ ê sî, tùi chhian-chóng kóng, Góa chı̍t kù ōe kā lí kóng, thang mah? I kóng, Lí bat Hi-lī-nî ōe mah?

38

Lí kiám m̄ sī hit ê Ai-kı̍p lâng, chêng jı̍t khí jiáu-lōan, chhōa sì-chheng ê hiong-siú chhut-khì khòng-iá ê mah?

39

Pó-lô kóng, Góa sī Iû-thài lâng, chhut-sì tī Ki-lī-ka ê Tāi-sò͘, sī chhut-miâ ê siâⁿ ê peh-sìⁿ; kiû lí chún góa tùi peh-sìⁿ kóng.

40

Í-keng chún i, Pó-lô chiū khiā tī kiā-á téng, tùi peh-sìⁿ iô chhiú; chèng lâng chēng-chēng, chiū ēng Hi-pek-lâi ê khiuⁿ-kháu tùi in kóng,