Sù-tô͘ Hēng-tōan 第 26 章 - 巴克禮全羅

1

A-ki-phàⁿ tùi Pó-lô kóng, Chún lí ka-kī pâi-lia̍t. Pó-lô chiū kia̍h-khí chhiú hun-sò͘ kóng:

2

A-ki-phàⁿ ông ah, góa hō͘ Iû-thài lâng só͘ kò ê, kin-á-jı̍t beh lóng hun-sò͘ tī lí ê bīn-chêng, sī chin kai-chài:

3

koh khah kai-chài ê, sī in-ūi Iû-thài lâng ê kui-lē kap in ê piān-lūn, lí lóng chai; só͘-í kiû lí khoan-iông thiaⁿ góa.

4

Góa tùi khí-thâu tī góa ê peh-sìⁿ ê tiong-kan, kap tī Iâ-lō͘-sat-léng, tùi siàu-liân chòe-lâng cháiⁿ-iūⁿ, Iû-thài lâng lóng chai.

5

In tùi khí-thâu bat góa, siat-sú khéng chòe kan-chèng, chiū chai góa chiàu lán kàu-tiong ke̍k giâm ê phài, chòe Hoat-lī-sài lâng.

6

Hiān-chāi góa khiā tī chia lâi siū sím-phòaⁿ, chiū-sī in-ūi ǹg-bāng Siōng-tè tùi lán ê lia̍t-chó͘ só͘ èng-ún ê;

7

lán cha̍p-jī chi-phài, jı̍t-mî un-khûn ho̍k-sāi, ia̍h sī ǹg-bāng kàu tī chit-ê. Ông ah, góa ūi-tio̍h chit ê ǹg-bāng, chiah hō͘ Iû-thài lâng kò.

8

Siōng-tè nā hō͘ sí-lâng koh-o̍ah, lín cháiⁿ-iūⁿ lia̍h chòe bōe sìn tit ah?

9

Chêng góa ka-kī phah-sǹg tio̍h ēng chōe-chōe hāng lâi kong-kek Ná-sat-le̍k Iâ-so͘ ê miâ.

10

Tī Iâ-lō͘-sat-léng kó-jiân bat án-ni kiâⁿ; í-keng siū-tio̍h chiah ê chè-si-thâu ê kôan, chiong chōe-chōe sèng-tô͘ koaiⁿ tī kaⁿ-nı̍h; in siū thâi-sí, góa ia̍h gí ū hūn.

11

Koh tī ta̍k ê hōe-tn̂g góa ta̍uh-ta̍uh hêng-ho̍at in, kiông-pek in kóng pòng-to̍k ê ōe; kong-kek in ná hiông, kàu gōa-ūi ê siâⁿ ia̍h khún-tio̍k in.

12

Hit tia̍p góa khì Tāi-má-sek ê sî, ū tit-tio̍h chiah ê chè-si-thâu ê kôan kap bēng-lēng.

13

Ông ah, góa tī lō͘-chiūⁿ, jı̍t tiong-tàu ê sî, khòaⁿ-kìⁿ tùi thiⁿ ū kng, iâⁿ-kè jı̍t ê chhàn-lān, ûi-lûi chiò góa kap tâng kiâⁿ ê lâng.

14

Góan lóng tó tī tōe-nı̍h, góa thiaⁿ-kìⁿ ū siaⁿ ēng Hi-pek-lâi ê khiuⁿ-kháu tùi góa kóng, Sò-lô, Sò-lô, lí siáⁿ-sū khún-tio̍k góa? lí ēng kha that chhì sī kan-khó͘.

15

Góa kóng, Chú ah, lí sī chī-chūi? Chú kóng, Góa chiū-sī lí só͘ khún-tio̍k ê Iâ-so͘.

16

Chóng-sī lí tio̍h khí-lâi khiā; in-ūi góa tiâu-tî tùi lí chhut-hiān, beh siat-lı̍p lí chòe chhe-ēng, chòe kan-chèng ê, tī lí só͘ khòaⁿ-kìⁿ góa kap góa só͘ beh chhut-hiān hō͘ lí khòaⁿ ê sū;

17

kiù lí chhut chit ê peh-sìⁿ kap gōa-pang lâng ê chhiú, chiū-sī hiān-kim chhe lí chiū-kūn in ê;

18

lâi khui in ê ba̍k-chiu, hō͘ in tùi àm o̍at-tńg kàu tī kng; lī-khui Sat-tàn ê kôan-sè lâi kui-ǹg Siōng-tè, tùi sìn góa lâi tit-tio̍h sià-chōe, koh tit-tio̍h ki-gia̍p tī chiâⁿ-sèng ê ê tiong-kan.

19

A-ki-phàⁿ ông ah, só͘-í góa bô ûi-ke̍h tùi thiⁿ só͘ hián-hiān ê:

20

chiū tāi-seng tī Tāi-má-sek, āu-lâi tī Iâ-lō͘-sat-léng, kap Iû-thài ê chôan tōe, í-kı̍p gōa-pang, khǹg lâng tio̍h hóan-hóe lâi kui-ǹg Siōng-tè, kiâⁿ tāi-chì kap hóan-hóe saⁿ-ha̍p.

21

In-ūi án-ni, Iû-thài lâng tī tiān-nı̍h lia̍h góa beh thâi góa.

22

Nā-sī góa tit-tio̍h Siōng-tè ê pì-iū, kàu kin-á-jı̍t iáu tī-teh, tùi tōa kàu sòe chòe kan-chèng; só͘ kóng ê bô m̄ sī chiah ê sian-ti kap Mô͘-se só͘ kóng beh kàu ê sū;

23

chiū-sī Ki-tok cháiⁿ-iūⁿ tio̍h siū khó͘, koh cháiⁿ-iūⁿ chòe thâu ēng sí-lâng koh-o̍ah ê sū, lâi thôan-pò kng-bêng hō͘ chit ê peh-sìⁿ kap gōa-pang.

24

Pó-lô án-ni hun-sò͘, Hui-sū-to͘ tōa siaⁿ kóng, Pó-lô, lí teh kông lah; lí ê chōe-chōe ha̍k-būn hō͘ lí pìⁿ chòe kông.

25

Pó-lô kóng, Hui-sū-to͘ tāi-jîn, góa m̄ sī kông; góa sī kóng chin-sı̍t toan-chiàⁿ ê ōe.

26

In-ūi ông chai chiah ê sū, góa ia̍h hó-táⁿ tùi i kóng; sī chiah ê sū, góa chhim-sìn bô chı̍t hāng ún-ba̍t tī ông; in-ūi che m̄ sī kiâⁿ tī phian-phiah ê só͘-chāi.

27

A-ki-phàⁿ ông ah, lí sìn chiah ê sian-ti mah? góa chai lí sìn.

28

A-ki-phàⁿ tùi Pó-lô kóng, Lí siūⁿ ēng sió-khóa khó͘-khǹg, beh hō͘ góa chòe Ki-tok-tô͘ ah.

29

Pó-lô kóng, Góa kiû Siōng-tè, bô lūn ēng sió-khóa á-sī tōa,m̄ nā hō͘ lí, ia̍h hō͘ kin-á-jı̍t kìⁿ-nā thiaⁿ góa kóng ê, lóng kap góa chı̍t iūⁿ, to̍k-to̍k bô chiah ê só-liān.

30

Ông kap chóng-tok kap Pek-nî-ki, í-kı̍p tâng chē ê lâng lóng khí-lâi:

31

thè-khì saⁿ-kap tâm-lūn kóng, Chit lâng só͘ chòe bô eng-kai sí eng-kai pa̍k ê sū.

32

A-ki-phàⁿ kā Hui-sū-to͘ kóng, Chit lâng nā bē ū tùi Kai-sat kò gū-chn̄g, chiū thang pàng i.