Sù-tô͘ Hēng-tōan 第 28 章 - 巴克禮全羅

1

Góan í-keng tit-tio̍h kiù, chiū chai hit ê hái-sū miâ kiò Bí-lī-tāi.

2

Hoan-lâng ēng hán-tit ū ê jîn-ài khóan-thāi góan; in-ūi lo̍h hō͘ koh kôaⁿ, in chiū khí hé, chiap-la̍p góan chèng lâng.

3

Pó-lô khioh chhâ chı̍t pé, hē tī hé-nı̍h; ū to̍k chôa, in-ūi hé jia̍t, chông-chhut-lâi, kā-tiâu tī i ê chhiú.

4

Hoan-lâng khòaⁿ-kìⁿ to̍k mı̍h tiâu tī i ê chhiú, chiū saⁿ-kap kóng, Chit ê lâng tek-khak sī hiong-siú, sui-bóng hái-nı̍h tit-tio̍h kiù, Thian-lí bōe iông-ún i o̍ah.

5

Pó-lô pōaⁿ to̍k mı̍h tī hé-nı̍h, lóng bô siū siong.

6

Hoan-lâng thèng-hāu i chéng, á-sī hut-jiân sí, po̍ah-tó; thèng-hāu kú-kú, khòaⁿ-kìⁿ i bô tāi-chì, chiū hóan-tńg phah-sǹg kóng i sī sîn-bêng.

7

Hái-sū ê thâu-lâng, miâ Pō͘-pek-liû, ū chhân-hn̂g kūn tī hia; i chiap-la̍p góan, saⁿ jı̍t kú hó-lé saⁿ khóan-thāi.

8

Tú-tio̍h Pō͘-pek-liû ê lāu-pē ū jia̍t-pīⁿ kap chòe-lī, tó-teh; Pó-lô jı̍p-khì chiū-kūn i, kî-tó, kā i hōaⁿ chhiú, i-hó i.

9

Tùi án-ni hái-sū tiong kî-û ê phòa-pīⁿ lâng ia̍h lâi tit-tio̍h i-hó;

10

in iā ēng chōe-chōe lé-sò͘ chun-kèng góan; khui chûn ê sî, chiong só͘ khiàm-ēng ê, sàng kàu chûn-nı̍h.

11

Kè saⁿ ge̍h jı̍t, góan tah A-le̍k-san-tāi ê chûn khí-sin, hit chiah chûn hō chòe Tiu-sū ê Siang-siⁿ-kiáⁿ, sī tī chit ê hái-sū kè tang-thiⁿ ê.

12

Kàu Sū-lah-kó͘ pha-teh; góan tiàm hia saⁿ jı̍t.

13

Tùi hia se̍h kàu Lī-kî-ong; kè chı̍t jı̍t lâm hong khí, tē jī jı̍t kàu Pō͘-tiu-lī;

14

tī hia tú-tio̍h hiaⁿ-tī, chhiáⁿ góan saⁿ-kap tiàm chhit jı̍t; chiū kàu Lô-má.

15

Lô-má ê hiaⁿ-tī thiaⁿ-kìⁿ góan ê siau-sit, chiū tùi hia lâi kàu A-pí-o͘ chhī, kap Sam-kóan ê só͘-chāi, chih-chiap góan: Pó-lô khòaⁿ-kìⁿ in, kám-siā Siōng-tè, chiū chòng-táⁿ.

16

Í-keng jı̍p Lô-má, chún Pó-lô kap chı̍t ê khàn-siú i ê peng lēng-gōa tòa.

17

Kè saⁿ jı̍t, Pó-lô chhiáⁿ Iû-thài lâng ê sī-tōa lâi siong-hōe; í-keng chū-chı̍p, chiū tùi in kóng, Hiaⁿ-tī ah, góa sui-jiân bē bat hōan-tio̍h lán ê peh-sìⁿ, á-sī lia̍t-chó͘ ê kui-lē, nā-sī tùi Iâ-lō͘-sat-léng siū pa̍k, sàng-kau Lô-má lâng ê chhiú;

18

in í-keng sím-phòaⁿ góa, khòaⁿ góa bô sí chōe, chiū ài pàng góa.

19

To̍k-to̍k Iû-thài lâng hóan-tùi, góa put-tek-í tùi Kai-sat kò gū-chn̄g, lóng m̄ sī ū in-toaⁿ beh kò góa ê peh-sìⁿ.

20

In-ūi án-ni chiah chhiáⁿ lín lâi saⁿ-kìⁿ, saⁿ-kap gī-lūn; sī góa ūi-tio̍h Í-sek-lia̍t só͘ ǹg-bāng ê, chiah siū chit ê só-liān khún-pa̍k.

21

In tùi i kóng, Góan bē bat tùi Iû-thài chih-tio̍h phoe kóng kàu lí ê sū, iā bē ū sím-mı̍h hiaⁿ-tī kàu chia thong-pò, á-sī kóng lí ū sím-mı̍h pháiⁿ.

22

To̍k-to̍k góan ài thiaⁿ lí ê ì-kiàn cháiⁿ-iūⁿ; in-ūi chit ê tóng, góan chai ta̍k só͘-chāi hō͘ lâng hiâm.

23

In í-keng kap i tiāⁿ-tio̍h jı̍t-kî, chōe-chōe lâng chiū-kūn i tī i hioh ê chhù; Pó-lô tùi chá-khí kàu ê-hng pâi-lia̍t lâi chèng-bêng Siōng-tè ê kok, ín Mô͘-se ê lu̍t-hoat, kap chiah ê sian-ti, ēng Iâ-so͘ ê sū khó͘-khǹg in.

24

I só͘ kóng ê, ū-ê sìn, ū-ê m̄ sìn.

25

Nn̄g pêng bōe saⁿ-ha̍p, chiū sì-sòaⁿ; Pó-lô tāi-seng kóng chı̍t kù ōe, kóng, Sèng Sîn ēng sian-ti Í-sài-a ê chhùi, kā lín ê lia̍t-chó͘ só͘ kóng ê ōe sī chin tio̍h,

26

Khì kā chit ê peh-sìⁿ kóng, Lín thiaⁿ sī beh thiaⁿ, iā lóng bōe hiáu-ngō͘; Lín khòaⁿ sī beh khòaⁿ, iā khòaⁿ lóng bōe kìⁿ;

27

In-ūi chit ê peh-sìⁿ sim tūn, Hī-khang tāng, Ba̍k-chiu pàng khoeh; Kiaⁿ-liáu in ēng ba̍k-chiu khòaⁿ-kìⁿ, Ēng hī-khang thiaⁿ-kìⁿ, Ēng sim hiáu-ngō͘, Lâi o̍at-lìn-tńg, Góa chiū i-hó in.

28

Só͘-í lín tio̍h chai, Siōng-tè chit ê chín-kiù í-keng si-hêng gōa-pang, in ia̍h beh thiaⁿ-siū. 30) Pó-lô khiā ka-kī sè ê chhù nn̄g nî kú; hōan-nā jı̍p lâi kìⁿ i ê, i lóng chiap-la̍p in, thôan Siōng-tè ê kok, chiong Chú Iâ-so͘ Ki-tok ê tāi-chì chin hó-táⁿ kà-sī lâng, bô lâng kìm i.