Sù-tô͘ Hēng-tōan 第 4 章 - 巴克禮全羅

1

In tùi peh-sìⁿ kóng ōe ê sî, chiah ê chè-si, kap tiān-si, í-kı̍p Sat-thó͘-kai lâng hut-jiân kàu;

2

in-ūi in kà-sī peh-sìⁿ, koh ín-khí Iâ-so͘ lâi thôan tùi sí-lâng tiong koh-o̍ah ê tō-lí, chiū tōa m̄ hoaⁿ-hí.

3

Tùi án-ni hē chhiú lia̍h in; in-ūi jı̍t àm, koaiⁿ in tī kaⁿ-nı̍h, lâi thèng-hāu keh jı̍t.

4

Nā-sī thiaⁿ tō-lí ê lâng chōe-chōe sìn; lâng-gia̍h iok-lio̍k kàu gō͘ chheng.

5

Keh jı̍t, in ê koaⁿ-hú, tiúⁿ-ló, keng-ha̍k-sū chū-chı̍p tī Iâ-lō͘-sat-léng;

6

chè-si-thâu A-ná tī-teh, koh ū Kai-a-hoat, Iok-hān, A-le̍k-san-tāi, í-kı̍p hōan-nā sio̍k chè-si-thâu ê chong-cho̍k ia̍h tī-teh.

7

Hō͘ in khiā tī tiong-ng, mn̄g kóng, Lín ēng sím-mı̍h kôan-lêng, ēng sím-mı̍h miâ, kiâⁿ chit ê tāi-chì ah?

8

Pí-tek hit sî hō͘ Sèng Sîn chhiong-móa, tùi in kóng,

9

Peh-sìⁿ ê koaⁿ-hú, kap tiúⁿ-ló ah, góan chiah-ê kin-á-jı̍t nā ūi-tio̍h kiâⁿ tī lóan-jio̍k ê lâng ê hó sū lâi siū sím-mn̄g, khòaⁿ i àn-cháiⁿ-iūⁿ tit kiù;

10

chiū lín chèng lâng, kap thong Í-sek-lia̍t peh-sìⁿ tio̍h chai, sī tī Ná-sat-le̍k lâng Iâ-so͘ Ki-tok ê miâ, lín só͘ tèng tī sı̍p-jī-kè, Siōng-tè hō͘ I tùi sí-lâng tiong koh-o̍ah ê, chiū-sī tī I ê miâ, chit lâng hó-hó khiā tī lín ê bīn-chêng.

11

I chiū-sī lín sai-hū só͘ m̄ tı̍h ê chio̍h, í-keng chiâⁿ-chòe chhù-kak ê thâu.

12

Koh tī pa̍t-ê pēng bô chín-kiù; in-ūi tī thiⁿ-ē, bô siúⁿ-sù pa̍t ê miâ tī lâng ê tiong-kan, hō͘ lán tiàm-tī i lâi tit kiù.

13

Chèng lâng khòaⁿ-kìⁿ Pí-tek Iok-hān ê hó-táⁿ, koh chai in sī bô ha̍k-būn ê pêng-siông lâng, chiū kî-kòai; koh jīn-tit in bat tè Iâ-so͘.

14

Ia̍h khòaⁿ-kìⁿ tit-tio̍h hó ê lâng kap in saⁿ-kap khiā-teh, chiū bô ōe thang piān-pok.

15

Chiah kah in chhut hōe-só͘, iā saⁿ-kap gī-lūn, kóng,

16

Chiah ê lâng beh cháiⁿ-iūⁿ pān in? in hián-jiân kiâⁿ sîn-jiah, tiàm-tī Iâ-lō͘-sat-léng ê lâng lóng chai; lán chiah-ê bōe kóng bô--tit.

17

Chóng-sī bián-tit chit ê sū it-hoat pò-iông tī peh-sìⁿ ê tiong-kan, lán tio̍h háng in, tòan-tòan m̄-thang koh chiong chit ê miâ tùi lâng kóng.

18

Chiū kiò in lâi, kìm-chí in, chhian-bān m̄-thang ēng Iâ-so͘ ê miâ lâi kóng-khí, lâi kà-sī.

19

Nā-sī Pí-tek Iok-hān ìn kóng, Thiaⁿ lín khah kè-thâu thiaⁿ Siōng-tè, tī Siōng-tè ê bīn-chêng ha̍p-gî á bô, lín chiah gí-tòan:

20

in-ūi góan só͘ bat khòaⁿ bat thiaⁿ ê, bōe tit thang bô kóng.

21

Hiah ê lâng, in-ūi peh-sìⁿ ê iân-kò͘, siūⁿ bô pō͘ thang hêng-ho̍at in; chiū koh-chài háng-hoah, chiah pàng in; sī chèng lâng ūi-tio̍h in só͘ kiâⁿ ê, lâi kui êng-kng Siōng-tè.

22

In-ūi tùi sîn-jiah tit-tio̍h i-hó ê lâng, í-keng sì-cha̍p gōa hè.

23

In í-keng tit-tio̍h tháu-pàng, chiū khì chhē in ê pêng-iú, chiong chiah ê chè-si-thâu kap tiúⁿ-ló só͘ kóng ê ōe tùi in kóng.

24

In thiaⁿ-kìⁿ, chiū tâng-sim chhut siaⁿ tùi Siōng-tè kóng, Chú-cháiⁿ ah, lí sī chhòng-chō thiⁿ, tōe, hái, kap kî-tiong bān mı̍h ê;

25

lí bat tùi Sèng Sîn ēng lí ê lô͘-po̍k, góan ê chó͘, Tāi-pı̍t ê chhùi, lâi kóng, Lia̍t-pang siáⁿ-sū tōa siū-khì, Chiah ê peh-sìⁿ siáⁿ-sū kè-bô͘ khang-khang ê tāi?

26

Tōe-chiūⁿ ê lia̍t-ông chı̍t chôe khiā-teh, Chiah ê koaⁿ-ôan iā saⁿ-kap chū-chı̍p, Lâi tùi-te̍k Chú, kap I ê Ki-tok;

27

in-ūi Hi-lu̍t, Pún-tiu Pí-lia̍p-to, kap gōa-pang lâng, í-kı̍p Í-sek-lia̍t chiah ê peh-sìⁿ, kó-jiân chū-chı̍p tī chit ê siâⁿ, lâi kong-kek lí só͘ boah-iû sèng ê Lô͘-po̍k Iâ-so͘,

28

lâi kiâⁿ lí ê chhiú, lí ê chí-ì só͘ tāi-seng tiāⁿ-tio̍h it-chhè beh chiâⁿ ê sū.

29

Taⁿ Chú ah, tio̍h kàm-chhat hiah ê lâng ê háng-hoah; hō͘ lí chiah ê lô͘-po̍k hó-táⁿ kóng lí ê tō-lí,

30

chiàu sî chhun lí ê chhiú lâi i pīⁿ; hō͘ sîn-jiah kî-sū tùi lí sèng ê Lô͘-po̍k Iâ-so͘ ê miâ lâi chiâⁿ.

31

Kî-tó soah, chū-chı̍p ê só͘-chāi tōa tín-tāng; chèng lâng lóng siū Sèng Sîn chhiong-móa, hó-táⁿ kóng Siōng-tè ê tō-lí.

32

Sìn ê lâng lóng chı̍t sim chı̍t chì; bô lâng kóng i só͘ ū ê sio̍k ka-kī; sī ta̍k hāng mı̍h chòe kong ê.

33

Sù-tô͘ ēng tōa kôan-lêng kan-chèng Chú Iâ-so͘ ê koh-o̍ah; chèng lâng iā tit-tio̍h tōa un-tián.

34

Kî-tiong bô khiàm-kheh ê lâng; in-ūi kìⁿ ū chhân-hn̂g chhù-the̍h ê, lóng bōe i, tòa in só͘ bōe ê gûn, hē tī sù-tô͘ ê kha-ē;

35

chiàu ta̍k lâng só͘ khiàm-ēng, pun hō͘ in.

36

Ū Lī-bī cho̍k ê lâng, chhut-sì tī Ku-pí-lō͘, miâ Iok-sek, sù-tô͘ kiò i chòe Pa-ná-pa, (hoan-e̍k chiū-sī gâu an-ùi ê lâng),

37

i ū hn̂g chiū bōe-khì, chiong só͘ bōe ê gûn tòa-lâi, hē tī sù-tô͘ ê kha-ē.