Sù-tô͘ Hēng-tōan 第 5 章 - 巴克禮全羅

1

Nā-sī ū chı̍t lâng miâ A-ná-nî-a, kap i ê bó͘ Sat-hui-lat, bōe i ê sán-gia̍p, chiong só͘ bōe ê gûn, àm-chīⁿ lâu kúi-nā hūn, i ê bó͘ iāh chai;

2

kî-û ê tòa lâi hē tī sù-tô͘ ê kha-ē.

3

Pí-tek kóng, A-ná-nî-a, siáⁿ-sū Sat-tàn chhiong-móa lí ê sim lâi phiàn Sèng Sîn, chiong bōe hn̂g ê gûn àm-chīⁿ lâu kúi-nā hūn?

4

Hn̂g iáu-bē bōe, kiám m̄ sī lí ê? bōe liáu, hit ê gûn kiám m̄ sī lí chú-ì? Lí sim-lāi siáⁿ-sū siūⁿ-chhut chit ê tāi-chì ah? Lí m̄ sī phiàn lâng, chiū-sī phiàn Siōng-tè.

5

A-ná-nî-a thiaⁿ-kìⁿ chiah ê ōe, chiū lek-lo̍h-khì, tn̄g khùi; thiaⁿ-kìⁿ ê lâng lóng tōa kiaⁿ.

6

Chiah ê siàu-liân lâng khí-lâi, siu-sı̍p i ê sin-si, kng chhut-khì bâi-chòng.

7

Iok-lio̍k kè saⁿ tiám cheng kú, i ê bó͘ ia̍h jı̍p-lâi, iáu-bē chai chit ê sū.

8

Pí-tek ìn i kóng, Lí kā góa kóng, lín bōe hn̂g ê kè-chîⁿ sī chiah chōe mah? Kóng, Tio̍h, sī chiah chōe.

9

Nā-sī Pí-tek tùi i kóng, Lín siáⁿ-sū tâng-sim lâi chhì Chú ê Sîn ah? Lí khòaⁿ, bâi-chòng lí ê tiōng-hu ê, in ê kha í-keng kàu mn̂g-kháu, ia̍h beh kng lí chhut-khì.

10

Hū-jîn-lâng chek-sî lek tī i ê kha-chêng, tn̄g khùi; hiah ê siàu-liân lâng jı̍p-lâi, khòaⁿ i í-keng sí, chiū kng i chhut-khì, bâi-chòng tī i tiōng-hu ê sin-piⁿ.

11

Chôan kàu-hōe kap kìⁿ-nā thiaⁿ-kìⁿ chiah ê tāi-chì ê, lóng tōa kiaⁿ.

12

Tùi sù-tô͘ ê chhiú ū kiâⁿ chōe-chōe sîn-jiah kap kî-sū tī peh-sìⁿ ê tiong-kan; chèng lâng lóng tâng-sim chū-chı̍p tī Só͘-lô-bûn ê léng-lông.

13

Kî-û ê lâng bô chı̍t-ê káⁿ kūn-óa in; nā-sī peh-sìⁿ chun-tiōng in;

14

sìn lâi kui Chú ê lâng it-hoat ke-thiⁿ, lâm-lú lóng chin chōe;

15

sīm-chì ū kng pīⁿ-lâng kàu tī koe-lō͘, hē tī pho͘-á, ǹg-bāng Pí-tek keng-kè ê sî, in ū-ê ōe hō͘ i ê iáⁿ ìm-tio̍h.

16

Iáu ū chōe-chōe lâng tùi Iâ-lō͘-sat-léng sì-ûi ê siâⁿ lâi; chhōa pīⁿ-lâng kap hō͘ siâ-sîn só͘ khó͘-chhó͘ ê; in lóng tit-tio̍h i-hó.

17

To̍k-to̍k chè-si-thâu, í-kı̍p lóng-chóng tâng--i ê lâng, (chiū-sī Sat-thó͘-kai tóng,) khiā-khí-lâi, móa-sim òan-tò͘,

18

hē chhiú lia̍h sù-tô͘, koaiⁿ in tī kong ê kaⁿ.

19

Nā-sī Chú ê thiⁿ-sài mî-sî khui kaⁿ mn̂g, chhōa in chhut, kóng,

20

Lín tio̍h khì khiā tī tiān-nı̍h, ēng chit ê O̍ah-miā ê ōe lóng tùi peh-sìⁿ kóng.

21

In thiaⁿ-kìⁿ chiah ê ōe, thiⁿ phú-kng chiū jı̍p tiān lâi kà-sī. Chè-si-thâu kap tâng--i ê lâng kàu, chio-chı̍p kong-hōe, kap Í-sek-lia̍t peh-sìⁿ ê lāu-tōa, chhe lâng khì kaⁿ-nı̍h tòa in lâi.

22

Gê-ia̍h kàu tè, chhē in bô tī kaⁿ-nı̍h; chiū tò-lâi pò, kóng,

23

Góan khòaⁿ-kìⁿ kaⁿ koaiⁿ kàu chin kian-kò͘, kò͘-siú ê lâng khiā tī ta̍k ê mn̂g-kháu; kàu khui ê sî, chhē bô lâng tī lāi-bīn.

24

Tiān-si kap chiah ê chè-si-thâu thiaⁿ-kìⁿ chiah ê ōe, chiū ūi-tio̍h in tōa tiû-tû, m̄ chai chit ê sū beh cháiⁿ-iūⁿ.

25

Ū chı̍t lâng lâi pò in kóng, Lín só͘ koaiⁿ tī kaⁿ-nı̍h ê lâng hiān-chāi khiā tī tiān-nı̍h kà-sī peh-sìⁿ.

26

Tiān-si kap gê-ia̍h chiū khì chhōa in lâi, m̄ káⁿ ēng kiông; in-ūi kiaⁿ peh-sìⁿ, kiaⁿ-liáu hō͘ in ēng chio̍h-thâu tìm.

27

Chhōa lâi liáu, chiū hō͘ in khiā tī kong-hōe ê bīn-chêng. Chè-si-thâu mn̄g in, kóng,

28

Góan bat giâm-giâm kìm lín bo̍h-tit ēng chit ê miâ kà-sī lâng, lín chiū chiong lín ê kà-sī piàn thôan tī Iâ-lō͘-sat-léng, beh ēng chit lâng ê huih kui tī góan.

29

Pí-tek kap kî-û ê sù-tô͘ ìn, kóng, Sūn-thàn Siōng-tè khah kè-thâu tī sūn-thàn lâng, sī ha̍p-gî.

30

Lín só͘ tiàu tī chhâ-nı̍h, lâi hāi-sí ê Iâ-so͘, lán lia̍t-chó͘ ê Siōng-tè í-keng hō͘ I koh-o̍ah.

31

Chit ê Iâ-so͘, Siōng-tè ēng ka-kī ê chiàⁿ chhiú kú-khí I chòe Jîn-kun, chòe Kiù-chú, beh chiong hóan-hóe kap sià-chōe siúⁿ-sù Í-sek-lia̍t peh-sìⁿ.

32

Koh góan ūi-tio̍h chiah ê sū chòe kan-chèng; Siōng-tè só͘ siúⁿ-sù hō͘ sūn-thàn I ê lâng ê Sèng Sîn iā chòe kan-chèng.

33

In thiaⁿ-liáu, chīn-chāi siū-khì, ài hāi-sí in.

34

To̍k-to̍k ū chı̍t ê Hoat-lī-sài lâng, miâ ka-má-lia̍t, sī chèng peh-sìⁿ só͘ kèng-tiōng ê kàu-hoat-su, khí-lâi khiā tī kong-hōe tiong, hoan-hù hō͘ hiah ê lâng chiām-sî chhut-khì.

35

Chiū tùi tāi-ke kóng, Í-sek-lia̍t lâng ah, lín tio̍h ka-kī kín-sīn, beh cháiⁿ-iūⁿ pān chiah ê lâng.

36

In-ūi chêng ū Tiu-tāi chhut-thâu, ka-kī khoa-kháu chòe tōa; óa i ê lâng iok-lio̍k sì pah; i siū thâi, tè i ê lâng sì-sòaⁿ, bô-lô-khì.

37

Chit lâng í-āu chō ke-kah ê sî koh ū Ka-lī-lī ê Iû-tāi chhut-thâu ín-iú peh-sìⁿ thàn i; i iā bia̍t-bô, tè i ê lâng lóng sì-sòaⁿ.

38

Taⁿ góa kā lín kóng, Bo̍h-tit chhap chiah ê lâng, pàng kù-chāi in; in-ūi chit ê kè-bô͘, chit ê só͘ chòe, nā chhut tī lâng, tek-khak beh pāi-hōai;

39

nā chhut tī Siōng-tè, lín chiū bōe pāi-hōai in; koh kiaⁿ-liáu lín iā sī kap Siōng-tè kau-chiàn.

40

In chiū thàn i; tiàu sù-tô͘ lâi phah in, bēng-lēng in bo̍h-tit ēng Iâ-so͘ ê miâ lâi kóng, chiū pàng in.

41

Sù-tô͘ lī-khui kong-hōe chêng, lóng hoaⁿ-hí, sī in-ūi in tit-tio̍h khòaⁿ-chòe ōe kham-tit ūi-tio̍h chit ê Miâ siū lêng-jio̍k.

42

Chiū tī tiān-nı̍h, tī jîn-ke, kà-sī lâng, thôan Iâ-so͘ chòe Ki-tok, ta̍k jı̍t bô soah.