Sù-tô͘ Hēng-tōan 第 6 章 - 巴克禮全羅

1

Tng hit sî, ha̍k-seng ke-thiⁿ chōe-chōe, ū kóng Hi-lī-nî ōe ê Iû-thài lâng, tùi Hi-pek-lâi lâng chhut òan-giân, in-ūi ta̍k jı̍t ê kiong-kip, bô kò͘-tio̍h in ê kóaⁿ-hū.

2

Cha̍p-jī ê sù-tô͘ kiò chèng ha̍k-seng lâi tùi in kóng, Góan chiong Siōng-tè ê tō-lí pàng-hē teh, lâi pān-lí chia̍h-sı̍t, m̄ ha̍p-gî.

3

Só͘-í hiaⁿ-tī ah, tio̍h tùi lín tiong-kan kéng ū hó miâ-siaⁿ, siū Sîn kap tì-hūi chhiong-móa ê, chhit lâng, góan chiū siat-lı̍p in kóan-lí chit ê sū.

4

Góan beh choan-bū kî-tó, thôan-tō.

5

Chèng lâng hoaⁿ-hí chit ê ōe; chiū kéng Sū-thê-hóan, i sī ū sìn kap Sèng Sîn móa-móa ê lâng, koh kéng Hui-le̍k, Pek-lô-ko-lô, Nî-ka-ná, Thê-bûn, Pa-bí-ná, kap bat jı̍p Iû-thài kàu ê An-thê-o lâng Nî-ko-lah;

6

hō͘ in khiā tī sù-tô͘ ê bīn-chêng; chiū kî-tó, kā in hōaⁿ chhiú.

7

Siōng-tè ê tō-lí ná heng-ōng; tī Iâ-lō͘-sat-léng ha̍k-seng ê siàu-gia̍h ke-thiⁿ chin chōe; chè-si sūn-ho̍k tī hok-im ia̍h chōe-chōe.

8

Sū-thê-hóan siū un-tián kap châi-lêng móa-móa, kiâⁿ tōa ê kî-sū sîn-jiah tī peh-sìⁿ ê tiong-kan.

9

Hit sî ū hōe-tn̂g kiò chòe Lī-pek-tē-ná ê, kap Kó͘-lī-nāi ê, A-le̍k-san-thài ê, í-kı̍p tùi Ki-lī-ka, A-se-a lâi ê, kúi-nā lâng khí-lâi kap Sū-thê-hóan piān-lūn,

10

Sū-thê-hóan ēng tì-hūi ēng Sîn lâi kóng, in bōe-ōe tí-tng.

11

Chiū ēng lâng chhut-lâi, kóng, Góan bat thiaⁿ-kìⁿ i kóng pòng-to̍k Mô͘-se kap Siōng-tè ê ōe.

12

In koh kàu-so peh-sìⁿ, kap tiúⁿ-ló, kap keng-ha̍k-sū, hut-jiân kàu, lia̍h i, tòa kàu kong-hōe, kiò ké kan-chèng lâi, kóng,

13

Chit lâng kóng-ōe kong-kek chit ê sèng ê só͘-chāi kap lu̍t-hoat bô soah;

14

in-ūi góan bat thiaⁿ-kìⁿ i kóng, Chit ê Ná-sat-le̍k lâng Iâ-so͘ beh húi-hōai chit ê só͘-chāi, iā beh kóe-ōaⁿ Mô͘-se só͘ thôan hō͘ lán ê kui-lē.

15

Hit tia̍p chē tī kong-hōe tiong ê lâng, lóng chù-ba̍k khòaⁿ i, khòaⁿ i ê bīn chhin-chhiūⁿ thiⁿ-sài ê bīn.