Sù-tô͘ Hēng-tōan 第 7 章 - 巴克禮全羅

1

Chè-si-thâu chiū kóng, Chiah ê sū sī án-ni mah?

2

Sū-thê-hóan kóng, Lia̍t-ūi hū-heng, chhiáⁿ thiaⁿ, Lán ê chó͘ A-pek-la̍h-hán, iáu tī Bí-só͘-pho-tāi-bí, bē khiā-khí Hap-lân ê sî, êng-kng ê Siōng-tè tùi i hián-hiān, kā i kóng,

3

Lī-khui lí ê tōe-hng kap chong-cho̍k, kàu góa só͘ beh chí-sī lí ê tōe-hng.

4

Hit sî i chiū chhut Ka-le̍k-tí lâng ê tōe-hng, khiā-khí tī Hap-lân; i ê lāu-pē sí liáu-āu, Siōng-tè tùi hia kā i sóa kàu chit só͘-chāi, chiū-sī lín taⁿ só͘ khiā-khí ê;

5

tī chia pēng bô sán-gia̍p hō͘ i, liân khiā-kha ê só͘-chāi iā bô; hit sî i iáu-bē ū kiáⁿ, nā-sī Siōng-tè èng-ún beh ēng chit só͘-chāi hō͘ i chòe gia̍p, sòa kàu i ê hō͘-è.

6

Chóng-sī Siōng-tè ū án-ni kóng, i ê hō͘-è teh-beh chhut-gōa tī īⁿ-pang, lâng beh ēng in chòe lô͘-châi, pháiⁿ khóan-thāi in, sì-pah nî kú.

7

Siōng-tè koh kóng, In chòe lô͘-châi só͘ ho̍k-sāi ê kok, góa beh sím-phòaⁿ i; āu-lâi in beh chhut-lâi, ho̍k-sāi góa tī chit ūi.

8

Koh ēng kat-lé ê iok hō͘ i; tùi án-ni i siⁿ Í-sat, tē poeh jı̍t kā i kiâⁿ kat-lé; Í-sat siⁿ Ngá-kok, Ngá-kok siⁿ lán cha̍p-jī ê chó͘.

9

Lia̍t-chó͘ òan-tò͘ Iok-sek, bōe i khì Ai-kı̍p;

10

nā-sī Siōng-tè kap i tī-teh, kiù i thoat-lī lóng-chóng ê khó͘-lān, hō͘ i tī Ai-kı̍p ông Hoat-ló ê bīn-chêng tit-tio̍h un-tián kap tì-hūi; Hoat-ló chiū lı̍p i chóng-lí Ai-kı̍p kok, kap i ê chôan ke.

11

Tú-tio̍h Ai-kı̍p, Ka-lâm, piàn tōe ki-hng, tōa kan-khó͘; lán ê lia̍t-chó͘ chhē bô bí-niû.

12

Ngá-kok thiaⁿ-kìⁿ Ai-kı̍p ū gō͘-kak, chiū thâu chı̍t pái chhe lán ê lia̍t-chó͘ khì.

13

Kàu tē jī pái Iok-sek hō͘ hiaⁿ-tī bat i; Iok-sek ê cho̍k Hoat-ló sòa tit-tio̍h chai.

14

Iok-sek chiū chhe lâng poaⁿ-chhiáⁿ lāu-pē Ngá-kok, kap chôan cho̍k, chhit-cha̍p-gō͘ lâng lâi.

15

Ngá-kok chiū lo̍h-khì Ai-kı̍p; i kap lán ê lia̍t-chó͘ sí tī hia;

16

ūn koan kàu Sī-kiàm, bâi-chòng tī A-pek-la̍h-hán ēng gûn tùi Hap-boat ê kiáⁿ-sun só͘ bóe tī Sī-kiàm ê bōng-tōe.

17

Kàu Siōng-tè tùi A-pek-la̍h-hán ēng chiù-chōa só͘ èng-ún ê, hit ê kî í-keng kūn, peh-sìⁿ chiū siⁿ-thòaⁿ heng-ōng tī Ai-kı̍p;

18

kàu pa̍t ê ông m̄ bat Iok-sek ê, khí-lâi kóan-lí Ai-kı̍p.

19

I bô͘-hāi lán ê cho̍k, pháiⁿ khóan-thāi lán ê chó͘, bēng-lēng tio̍h khì-sak in ê eⁿ-á, hō͘ in bōe o̍ah.

20

Hit sî Mô͘-se chhut-sì, hui-siông ê chheng-siù; iúⁿ-chhī tī lāu-pē ê ke saⁿ ge̍h jı̍t;

21

siū khì-sak ê sî, Hoat-ló ê cha-bó͘-kiáⁿ khioh-khì, iúⁿ-chhī chòe ka-kī ê kiáⁿ.

22

Mô͘-se ha̍k-sı̍p Ai-kı̍p lâng lóng-chóng ê ha̍k-būn; kóng ōe kiâⁿ tāi-chì lóng ū châi-lêng.

23

Chiong-kūn sì-cha̍p hè, siūⁿ beh khì khòaⁿ i ê hiaⁿ-tī, Í-sek-lia̍t ê kiáⁿ-sun.

24

Khòaⁿ-kìⁿ chı̍t lâng siū oan-óng, chiū pó-hō͘ i, thòe siū khut ê lâng sin-oan, phah Ai-kı̍p lâng;

25

phah-sǹg hiaⁿ-tī ōe hiáu-ngō͘ Siōng-tè ēng i ê chhiú kiù in; nā-sī in bōe hiáu-ngō͘.

26

Keh jı̍t tú-tn̄g in teh saⁿ-phah, ài hō͘ in koh hô, chiū kóng, Lín sī hiaⁿ-tī, siáⁿ-sū saⁿ khi-hū?

27

Hit ê khi-hū chhù-piⁿ ê lâng kū-cho̍at i, kóng, Chī-chūi siat-lı̍p lí chòe koaⁿ-hú, chòe sím-phòaⁿ si, lâi tī-lí góan ah?

28

Lí ài beh hāi-sí góa, chhin-chhiūⁿ chā-jı̍t hāi-sí hit ê Ai-kı̍p lâng mah?

29

Mô͘-se in-ūi chit kù ōe chiū cháu, chhut-gōa tī Bí-tiân ê tōe-hng; tī hia siⁿ nn̄g ê kiáⁿ.

30

Kè sì-cha̍p nî, tī Se-nái soaⁿ ê khòng-iá, chhì-phè hé-iām ê tiong-kan, ū thiⁿ-sài tùi i hián-hiān.

31

Mô͘-se khòaⁿ-liáu, kî-kòai só͘ khòaⁿ-kìⁿ ê; tú-á kūn-óa beh jīn-chin khòaⁿ, chiū ū Chú ê siaⁿ, kóng,

32

Góa chiū-sī lí ê lia̍t-chó͘ ê Siōng-tè, chiū-sī A-pek-la̍h-hán, Í-sat, Ngá-kok ê Siōng-tè. Mô͘-se ngia̍uh-ngia̍uh-chhoah, m̄ káⁿ jīn-chin khòaⁿ.

33

Chú kā i kóng, Lí ê ôe tio̍h thǹg-khí-lâi; in-ūi lí só͘ khiā ê ūi sī sèng tōe.

34

Góa ê peh-sìⁿ tī Ai-kı̍p, góa sı̍t-chāi khòaⁿ-kìⁿ in ê khùn-khó͘, ia̍h thiaⁿ-kìⁿ in ê thó͘-khùi, chiū kàng-lîm lâi kiù in; taⁿ lí lâi, góa beh chhe lí khì Ai-kı̍p.

35

Chit ê Mô͘-se chiū-sī in só͘ kū-cho̍at ê, kóng, Chī-chūi siat-lı̍p lí chòe koaⁿ-hú, chòe sím-phòaⁿ si ah? Chit ê lâng Siōng-tè thok chhì-phè lāi tùi i só͘ hián-hiān ê thiⁿ-sài, chhe i chòe koaⁿ-hú, chòe kiù-sio̍k ê.

36

Chit ê lâng chhōa in chhut, kiâⁿ kî-sū sîn-jiah, tī Ai-kı̍p, Âng-hái, kap khòng-iá, sì-cha̍p nî kú.

37

Chit ê lâng chiū-sī hit ê kā Í-sek-lia̍t kiáⁿ-sun kóng ê Mô͘-se, kóng, Siōng-tè beh tùi lín hiaⁿ-tī ê tiong-kan ūi-tio̍h lín théng siⁿ chı̍t ê sian-ti, chhin-chhiūⁿ góa.

38

Chit ê lâng chiū-sī hit ê tī khòng-iá-nı̍h ê hōe-tiong, kap tī Se-nái soaⁿ tùi i kóng ōe ê thiⁿ-sài, í-kı̍p lia̍t-chó͘, saⁿ-kap tī-teh ê; i ia̍h tit-tio̍h o̍ah ê chiàu-bēng thôan hō͘ lán;

39

lán ê lia̍t-chó͘ m̄ ài sūn-thàn i, hóan-tńg kū-cho̍at i, sim tò-tńg tī Ai-kı̍p, kā A-lûn kóng,

40

Lí tio̍h kā góan chō sîn-bêng chòe thâu chhōa góan; in-ūi chit ê chhōa góan chhut Ai-kı̍p ê Mô͘-se, m̄ chai i cháiⁿ-iūⁿ.

41

Hit sî in chiū chō gû-á, koh hiàn-chè tī hit ê siōng, hoaⁿ-hí in ka-kī ê chhiú só͘ chòe ê.

42

Siōng-tè chiū o̍at-lìn-tńg, chhut-chāi in ho̍k-sāi thian-siōng; chhin-chhiūⁿ sian-ti ê chheh só͘ kì-chài, kóng, Í-sek-lia̍t ke ah, lín tī khòng-iá le̍k-kè sì-cha̍p nî, Kiám bat ēng seng-lé chè-mı̍h hiàn hō͘ góa mah?

43

Lín kng Mô͘-lo̍k ê pò͘-pîⁿ, Kap Lí-hoan sîn ê chhiⁿ, Chiū-sī lín só͘ chō lâi pài ê siōng; Góa beh chhian-sóa lín tī Pa-pí-lûn gōa.

44

Lán lia̍t-chó͘ tī khòng-iá ū chèng-kù ê hōe-bō͘, chhin-chhiūⁿ tùi Mô͘-se kóng ê hoan-hù, Tio̍h chiàu só͘ khòaⁿ-kìⁿ ê khóan-sit lâi chō i.

45

Āu-lâi Siōng-tè kóaⁿ-tio̍k gōa-pang lâng tī lán ê chó͘ ê bīn-chêng, lán ê chó͘ kap Iok-su-a kì-jiân sêng-chiap chit ê hōe-bō͘, chiū tòa i jı̍p khì tiàm-tī hit ê tōe-hng, tı̍t kàu Tāi-pı̍t ê sî;

46

i tit-tio̍h un-tián tī Siōng-tè ê bīn-chêng, ài beh kā Ngá-kok ê Siōng-tè chhē chı̍t ê khiā-khí ê ūi.

47

To̍k-to̍k Só͘-lô-bûn chiah kā i khí chhù.

48

Chóng-sī Chì-kôaiⁿ-ê bô tiàm tī lâng ê chhiú só͘ khí ê; chhin-chhiūⁿ sian-ti kóng,

49

Chú kóng, Thiⁿ sī góa ê chō-ūi, Tōe sī góa ê kha-ta̍h-í. Lín beh kā góa khí sím-mı̍h hō ê chhù? Á-sī góa an-hioh ê só͘-chāi tī tá-lo̍h ah?

50

Chiah-ê it-chhè kiám m̄ sī góa ê chhiú só͘ chhòng-chō ê mah?

51

Lín ê ām-kún ngī, sim kap hī bē siū kat-lé ê lâng, siông-siông pōe-ge̍k Sèng Sîn; lín ê chó͘ án-ni, lín iā án-ni.

52

Sian-ti tiong tá-lo̍h chı̍t-ê bô hō͘ lín ê chó͘ khún-tio̍k i ah? hiah ê chhàm-gú Gī-ê teh-beh kàu ê lâng, in iā hāi-sí in; taⁿ chit ê Gī-ê lín bat sàng-kau lâi hāi-sí I;

53

tùi thiⁿ-sài lâi siat ê lu̍t-hoat, lín siū-tio̍h iā bô siú i.

54

In thiaⁿ-kìⁿ chiah ê ōe, sim-lāi chīn-chāi siū-khì, ǹg i kā-gê chhiat-chhí.

55

To̍k-to̍k Sū-thê-hóan hō͘ Sèng Sîn chhiong-móa, chù-ba̍k khòaⁿ thiⁿ, khòaⁿ-kìⁿ Siōng-tè ê êng-kng, Iâ-so͘ khiā tī Siōng-tè ê tōa pêng,

56

chiū kóng, Khòaⁿ ah! góa khòaⁿ-kìⁿ thiⁿ khui, Jîn-chú khiā tī Siōng-tè ê tōa pêng.

57

In tōa siaⁿ âu-kiò, ng hī-khang, tâng sim oe-khoeh i;

58

kóaⁿ i chhut siâⁿ, ēng chio̍h-thâu tìm i; chòe kan-chèng ê lâng chiong in ê saⁿ hē tī siàu-liân lâng, miâ kiò Sò-lô, ê kha-chêng.

59

In ēng chio̍h-thâu tìm Sū-thê-hóan; Sū-thê-hóan kiû, kóng, Chú Iâ-so͘ ah, chiap-la̍p góa ê sîn.

60

Koh kūi-lo̍h-khì, tōa siaⁿ kiò, kóng, Chú ah, bo̍h-tit ēng chit ê chōe kui tī in. Kóng soah chiū khùn. Sò-lô iā hoaⁿ-hí i sí.