Ko-lô-se 第 2 章 - 巴克禮全羅

1

In-ūi góa ài lín chai góa ūi-tio̍h lín, kap hiah ê tòa tī Ló-tí-ka ê, í-kı̍p kìⁿ-nā tī jio̍k-thé bē bat kìⁿ-tio̍h góa ê bīn ê, ū cháiⁿ-iūⁿ cheng-chiàn,

2

. thang hō͘ in ê sim siū an-ùi, tī jîn-ài saⁿ kiat-liân, tùi chhiong-móa ê hiáu-ngō͘ tit-tio̍h it-chhè ê pù-ū, lâi chhim chai Siōng-tè ê ò-biāu, chiū-sī Ki-tok;

3

. hōan-nā tì-hūi kap chai-bat ê pó-pòe lóng khǹg tī I.

4

. Góa kóng án-ni, bián-tit lâng ēng kî-khá ê ōe lâi bê-he̍k lín.

5

. In-ūi góa jio̍k-thé lī-khui lín, sîn kap lín tī-teh, hoaⁿ-hí khòaⁿ-kìⁿ lín ê chéng-chôe, í-kı̍p lín sìn-khò Ki-tok ê kian-kò͘.

6

. Só͘-í lín kì-jiân chiap-la̍p Chú Ki-tok Iâ-so͘, chiū tio̍h chiàu án-ni tiàm-tī I lâi kiâⁿ,

7

. í-keng tèng kun tī I, chiū tı̍t-tı̍t siū khí-chō, tùi sìn lâi kian-kò͘, chiàu lín só͘ bat siū ê kà-sī, móa-móa kám-siā.

8

. Tio̍h kín-sīn bián-tit hō͘ lâng ēng i ê tiat-ha̍k kap khang-khang ê bô-iáⁿ ōe lâi bê-he̍k lín, chiàu lâng ê ûi-thôan, chiàu sè-kan ê siáu-ha̍k, m̄ sī chiàu Ki-tok.

9

. In-ūi Siōng-tè sèng-chit ê hong-sēng lóng chiâu-pī tiàm-tī I.

10

. Lín tiàm-tī I iā tit-tio̍h hong-sēng; I sī it-chhè pān chèng-sū chiáng-kôan ê ê thâu.

11

. Tiàm-tī I lín iā í-keng siū kat-lé, m̄ sī ēng chhiú lâi kiâⁿ ê kat-lé, chiū-sī Ki-tok ê kat-lé, thǹg-khì jio̍k-thé ê seng-khu;

12

. í-keng tī sóe-lé kap I tâng bâi-chòng, chiū tī chit ê sóe-lé iā kap I tâng khí-lâi, sī tùi sìn Siōng-tè ê kong-iōng, chiū-sī tùi sí-lâng tiong hō͘ I khí-lâi ê.

13

. Koh lín chêng ūi-tio̍h chōe-kòa kap jio̍k-thé ê bô kat-lé lâi sí ê, taⁿ Siōng-tè hō͘ lín kap Ki-tok tâng koh-o̍ah, í-keng sià-bián lán lóng-chóng ê chōe-kòa,

14

. chhat-siau kong-kek lán chiah ê kui-lē ê jī-iūⁿ, chiū-sī tùi-te̍k lán ê, tèng i tī sı̍p-jī-kè, lâi tùi tiong-kan tû i;

15

. kì-jiân pāi hiah ê pān chèng-sū ê, chiáng-kôan ê, chiū kong-hêng hián-bêng in, tī sı̍p-jī-kè iâⁿ in lâi tāi-ia̍t.

16

. Só͘-í bo̍h-tit in-ūi só͘ chia̍h só͘ lim ê, á-sī ūi-tio̍h choeh-kî, chhoe it, í-kı̍p an-hioh-jı̍t ê iân-kò͘, hō͘ lâng gí-gī;

17

. chiah-ê lóng sī chiong-lâi ê sū ê iáⁿ, nā-sī hêng chiū-sī Ki-tok ê.

18

. Bo̍h-tit hō͘ lâng chhiúⁿ lín ê pò-siúⁿ, in kò͘-ì khiam-pi kèng-pài thiⁿ-sài, óa-khò in só͘ ū khòaⁿ-kìⁿ ê, chiàu in jio̍k-thé ê sim-chì kan-ta teh phòng-hong,

19

. bô liân-tiâu tī hit ê Thâu, chôan sin sī óa-khò hit ê Thâu, tùi chiah ê chat kap kun tit-tio̍h chiap-èng liân-lo̍k, chiàu Siōng-tè só͘ siúⁿ-sù ê tióng-sêng lâi tióng-sêng.

20

. Lín nā kap Ki-tok tâng sí, thoat-lī sè-kan ê siáu-ha̍k, cháiⁿ-iūⁿ ná chhin-chhiūⁿ o̍ah tī sè-kan, lâi ka-kī hâng-ho̍k tī chiah ê kui-lē, chhin-chhiūⁿ kóng,

21

. Bo̍h-tit the̍h-tio̍h, Bo̍h-tit chhì-chia̍h, Bo̍h-tit bong-tio̍h,

22

. (chiah ê mı̍h lóng sī ēng-liáu ōe pāi-hōai ê), sī chiàu lâng ê tiâu-kui kap kà-sī.

23

. Chiah ê kui-lē sī hō͘ lâng kiâⁿ chū-choan ê kèng-pài, ka-kī khiam-pi, bô sioh seng-khu; miâ sī ū tì-hūi, kî-sı̍t lóng bô kong-hāu thang iok-sok jio̍k-thé ê hòng-chhiòng.