Ko-lô-se 第 1 章 - 巴克禮全羅

1

Tùi Siōng-tè ê chí-ì chòe Ki-tok Iâ-so͘ ê sù-tô͘, Pó-lô, kap hiaⁿ-tī Thê-mô͘-thài,

2

. phoe kià hō͘ Ko-lô-se tiàm-tī Ki-tok ê sèng-tô͘, tiong-sìn ê hiaⁿ-tī: gōan lín tùi lán ê Pē Siōng-tè tit-tio̍h un-tián pêng-an.

3

. Góan siông-siông thòe lín kî-tó, kám-siā Siōng-tè chiū-sī lán ê Chú Iâ-so͘ Ki-tok ê Pē,

4

. in-ūi bat thiaⁿ-kìⁿ lín tī Ki-tok Iâ-so͘ ê sìn, kap ǹg lóng-chóng ê sèng-tô͘ só͘ ū ê thiàⁿ,

5

. in-ūi só͘ kā lín khǹg tī thiⁿ-nı̍h ê ǹg-bāng, chiū-sī lín chêng tī hok-im chin-lí ê tō só͘ thiaⁿ-kìⁿ ê;

6

. chit ê hok-im í-keng kàu tī lín; chhin-chhiūⁿ tī piàn sè-kan teh kiat ké-chí, iā ná tōa châng, chhin-chhiūⁿ tī lín tiong-kan chı̍t iūⁿ, tùi lín bat thiaⁿ-kìⁿ iā chin-sı̍t chai Siōng-tè ê un-tián hit jı̍t;

7

. chhin-chhiūⁿ lín tùi Í-pa-hut só͘ ha̍k-sı̍p ê, i sī góan só͘ thiàⁿ tâng chòe lô͘-po̍k ê, iā ūi-tio̍h góan chòe Ki-tok tiong-sìn ê chhe-ēng;

8

. i iā bat chiong lín tī Sèng Sîn ê jîn-ài pò góan chai.

9

. Só͘-í góan tùi thiaⁿ-kìⁿ ê jı̍t, thòe lín kî-tó khún-kiû bô soah, gōan lín tī sîn-lêng ta̍k iūⁿ ê tì-hūi kap lêng-thong, tit-tio̍h chai I ê chí-ì kàu móa-móa,

10

. hō͘ lín só͘ kiâⁿ ha̍p tī Chú, hōan sū hō͘ I hoaⁿ-hí, tī ta̍k hāng hó-sū kiat ké-chí, koh bat Siōng-tè ná kú ná chìn-pō͘;

11

. koh chiàu I êng-kng ê khùi-la̍t, ēng ta̍k iūⁿ ê kôan-lêng hō͘ lín ū kôan-lêng, tì-kàu lín hōan sū hoaⁿ-hí thun-lún khoan-iông;

12

. koh kám-siā Pē, in-ūi I hō͘ lán kham-tit ū hūn sèng-tô͘ ê gia̍p tī kng-bêng ê só͘-chāi;

13

. I í-keng kiù lán thoat-lī o͘-àm ê kôan-sè, lâi poaⁿ-sóa lán jı̍p I só͘ thiàⁿ ê Kiáⁿ ê kok;

14

. tiàm-tī I lán tit-tio̍h sio̍k-hôe, chiū-sī lán ê chōe sià-bián;

15

. I sī bōe tit thang khòaⁿ-kìⁿ ê Siōng-tè ê siōng, I sī thâu chı̍t ê siⁿ ê, tī lóng-chóng siū chhòng-chō ê ê tāi-seng;

16

in-ūi bān mı̍h tī I lâi chhòng-chō, tī thiⁿ-nı̍h kap tī tōe-nı̍h ê, ū thang khòaⁿ-kìⁿ kap bô thang khòaⁿ-kìⁿ ê, he̍k-sī chō-ūi ê, he̍k-sī tī-lí ê, he̍k-sī pān chèng-sū ê, he̍k-sī chiáng-kôan ê, bān-hāng-ū lóng sī tùi I, iā ūi-tio̍h I, chiah siū chhòng-chō.

17

. I tī bān-hāng-ū ê tāi-seng; bān-hāng-ū tiàm-tī I lâi saⁿ-kap khiā-chāi.

18

. I sī seng-khu ê thâu, seng-khu chiū-sī kàu-hōe; I sī gôan-khí-thâu, tùi sí-lâng tiong khí-lâi ê thâu chı̍t ê siⁿ ê, hō͘ I tī bān-hāng-ū tiong chòe tē it.

19

. In-ūi Pē hoaⁿ-hí hō͘ it-chhè ê hong-sēng tiàm-tī I;

20

í-keng chiong I sı̍p-jī-kè ê huih lâi sêng-chiū hô-pêng, chiū tùi I hō͘ bān-hāng-ū kap I pún-sin koh-chài hô, he̍k-sī tōe-chiūⁿ ê, he̍k-sī tī thiⁿ-nı̍h ê, lóng sī tùi I.

21

. Koh lín pêng-sò͘ tī pháiⁿ ê só͘ kiâⁿ kap Siōng-tè keh-tn̄g, sim-lāi chòe tùi-te̍k,

22

. taⁿ I tī I jio̍k-thé ê seng-khu, tùi I ê sí, í-keng hō͘ lín koh-chài hô, beh hō͘ lín chiah-ê chiâⁿ-sèng, bô hâ-chhû bô thang hiâm ê, khiā tī I ê bīn-chêng;

23

. nā lín tn̂g-tn̂g tiàm-tī sìn, ū tōe-ki koh kian-kò͘, bô siū iô-tāng, lâi lī-khui hok-im ê ǹg-bāng, che hok-im chiū-sī lín só͘ bat thiaⁿ-kìⁿ ê, koh sī thôan tī thiⁿ-ē lóng-chóng siū chhòng-chō ê ê tiong-kan; góa Pó-lô í-keng siat-lı̍p chòe i ê chhe-ēng.

24

. Taⁿ góa ūi-tio̍h lín siū chiah ê kan-khó͘ sī hoaⁿ-hí; góa ūi-tio̍h Ki-tok ê seng-khu chiū-sī kàu-hōe, tī góa ê jio̍k-thé, pó͘-móa I só͘ bē ū chīn ê hōan-lān;

25

. góa siat-lı̍p chòe chit ê kàu-hōe ê chhe-ēng, chiàu Siōng-tè ūi-tio̍h lín só͘ kau-hù góa ê chit-hūn, lâi ôan-móa Siōng-tè ê tō-lí,

26

. chiū-sī bān sè bān tāi í-lâi só͘ khǹg-ba̍t ê ò-biāu; taⁿ í-keng hián-bêng tī I ê sèng-tô͘;

27

. Siōng-tè ài beh hō͘ in chai chit ê ò-biāu ê êng-kng tī gōa-pang tiong ū jōa pù-ū, chiū-sī Ki-tok tiàm-tī lín, chòe êng-kng ê ǹg-bāng ê;

28

. góan thôan I, ēng ta̍k iūⁿ ê tì-hūi khó͘-khǹg ta̍k lâng, kà-sī ta̍k lâng, beh hiàn ta̍k lâng tiàm-tī Ki-tok lâi ôan-chôan.

29

. Ūi-tio̍h chit-ê góa tio̍h-bôa, chiàu I chhut-la̍t kiâⁿ tī góa lāi-bīn ê kong-iōng lâi cheng-chiàn.