Hui-li̍p-pí 第 4 章 - 巴克禮全羅

1

Só͘-í góa só͘ thiàⁿ só͘ him-bō͘ ê hiaⁿ-tī, chòe góa ê hoaⁿ-hí, chòe góa ê bián-liû ê, só͘ thiàⁿ ê ah, tio̍h án-ni khiā-chāi tī Chú.

2

Góa khǹg Iú-o-tia koh khǹg Sûn-to͘-ki, tio̍h tâng-sim tī Chú.

3

Koh chin ê tâng-phōaⁿ ah, góa iā kiû lí pang-chān chí nn̄g ê hū-jîn-lâng, in-ūi in bat kap góa tâng chhut-la̍t tī hok-im, iā kap Kek-lī-bián, í-kı̍p kî-û kap góa tâng tio̍h-bôa ê, in ê miâ kì tī o̍ah-miā ê chheh.

4

Tio̍h siông-siông tiàm-tī Chú lâi hoaⁿ-hí; góa beh koh kóng i, Tio̍h hoaⁿ-hí.

5

Lín ê sûn-liông tio̍h tùi chèng lâng hián-bêng. Chú kūn lah.

6

It-khài bo̍h-tit khòa-lū; to̍k-to̍k bān sū tio̍h ēng kî-tó khún-kiû kap kám-siā, chiong lín só͘ kiû ê pâi-lia̍t tī Siōng-tè;

7

chiū Siōng-tè ê pêng-an, pôaⁿ-kè it-chhè lâng só͘ siūⁿ ōe kàu ê, beh tī Ki-tok Iâ-so͘ pó-siú lín ê sim, lín ê liām-thâu.

8

Taⁿ hiaⁿ-tī ah, kiat-bé lâi kóng, kìⁿ-nā chin-sı̍t ê, kìⁿ-nā khó-kèng ê, kìⁿ-nā kong-gī ê, kìⁿ-nā chheng-kiat ê, kìⁿ-nā thang thiàⁿ ê, kìⁿ-nā hó miâ-siaⁿ ê, nā ū sím-mı̍h tek-hēng, sím-mı̍h thang o-ló, chiah-ê lín tio̍h siàu-liām.

9

Lín tùi góa só͘ ha̍k-sı̍p, só͘ niá-siū, só͘ thiaⁿ-kìⁿ, só͘ khòaⁿ-kìⁿ ê, lóng tio̍h kiâⁿ i; chiū siúⁿ-sù pêng-an ê Siōng-tè beh kap lín tī-teh.

10

Góa tiàm-tī Chú tōa-tōa hoaⁿ-hí, in-ūi lín siàu-liām góa ê sim-chì taⁿ ū koh puh-íⁿ; lín pêng-sò͘ ū chit hō siàu-liām, put-kò sī bô ki-hōe nā-tiāⁿ.

11

Góa kóng án-ni, m̄ sī ūi-tio̍h ēng bô kàu ê iân-kò͘; in-ūi góa í-keng ha̍k-sı̍p, put-lūn sím-mı̍h kéng-gū, bô m̄ ti-chiok.

12

Góa chai-iáⁿ tiàm-tī pi-chiān, iā chai-iáⁿ tiàm-tī hù-chiok; he̍k-sī pá, he̍k-sī iau, he̍k-sī hù-chiok, he̍k-sī kheh-khiàm, hōan sū góa lóng láu-liān.

13

Tiàm-tī siúⁿ-sù góa khùi-la̍t ê, góa sū-sū lóng ōe.

14

Sui sī án-ni, lín thé-thiap góa ê hōan-lān, che sī chin hó.

15

Hui-lı̍p-pí lâng ah, lín iā ka-kī chai tī thôan hok-im ê khí-thâu, góa lī-khui Má-kî-tùn ê sî, kap góa chiap-chhiú ê chí ū lín, pa̍t ê kàu-hōe bô;

16

in-ūi liân góa tī Thiap-sat-lô-nî-ka ê sî, lín iā chı̍t pái koh chı̍t pái chhe lâng kiong-kip góa só͘ khiàm-ēng.

17

M̄ sī góa teh kiû lâng sàng mı̍h, to̍k-to̍k sī kiû ké-chí ná chōe, lâi kì-lo̍h lín ê siàu.

18

Nā-sī góa ū chiah ê mı̍h, kàu-gia̍h ū chhun; góa í-keng chhiong-chiok, sī bat tùi Í-pa-hut-thê siū-tio̍h lín kià-lâi ê mı̍h, chiū-sī phang-phang ê bī, chòe thang chiap-la̍p ê chè-mı̍h, Siōng-tè só͘ hoaⁿ-hí ê.

19

Koh góa ê Siōng-tè beh chiàu I êng-kng tiong ê pù-ū, tī Ki-tok Iâ-so͘, pó͘-chiok lín it-chhè ê khiàm-kheh.

20

Gōan êng-kng kui tī lán ê Siōng-tè lán ê Pē, kàu tāi-tāi bô soah. À-bēng.

21

Chhéng-an tiàm-tī Ki-tok Iâ-so͘ ta̍k ê sèng-tô͘. Chiah ê kap góa tī-teh ê hiaⁿ-tī chhéng-an lín.

22

Chiah ê sèng-tô͘ lóng chhéng-an lín; sio̍k tī Kai-sat ê ke ê, koh khah tì-ì chhéng-an lín.

23

Gōan Chú Iâ-so͘ Ki-tok ê un-tián kap lín ê sîn saⁿ-kap tī-teh.