Tàn-í-lí 第 11 章 - 巴克禮全羅

1

Tng Má-tāi ông Tāi-lī-o͘ gôan--nî, góa khiā--khí-lâi, hō͘ i kian-kò͘ ióng-chòng.

2

Taⁿ góa chiong chin-sı̍t ê sū chí-sī lí. Khòaⁿ ah, Pho-su beh koh ū saⁿ ê ông heng-khí; tē-sì-ê beh chin hó-gia̍h, iâⁿ-kè in hiah-ê; i túi i ê hó-gia̍h chiâⁿ-chòe kiông-béng ê sî, chiū beh kek-tōng chèng-lâng kong-kek Hi-lia̍p kok.

3

Beh ū chı̍t ê ióng-béng ê ông khí-lâi, ēng tōa-kôan lâi tī-lí, chiàu ì-sù lâi kiâⁿ.

4

I heng-khí ê sî, i ê kok beh hun-lı̍h, ǹg-thiⁿ ê sì-bīn ê hong pun-khui; chóng-sī bô kui i ê hō͘-è, iā bōe pí-tit i chêng só͘ chiáng ê kôan; in-ūi i ê kok beh tú-tio̍h pu̍ih--khí-lâi, kui tī chiah-ê í-gōa ê pa̍t-lâng.

5

Lâm-hng ê ông beh kiông-béng; chóng-sī i tāi-sîn ê tiong-kan beh ū chı̍t-ê pí i khah kiông-béng, tit-tio̍h kôan; i ê kôan beh chòe chin-tōa ê kôan.

6

Kè kúi-nā nî āu, in beh saⁿ liân-ha̍p; lâm-hng ê kok ê cha-bó͘-kiáⁿ beh chiū-kūn pak-hng ê ông, ài lı̍p bêng-iok; chóng-sī chit ê cha-bó͘-kiáⁿ pang-chān ê la̍t bōe-ōe kú-tn̂g; chit ê ông kap i pang-chān ê la̍t bōe-ōe chûn-chāi; koh chit ê cha-bó͘-kiáⁿ kap tòa i lâi ê, kap siⁿ i ê, í-kı̍p tng-sî hû-chō͘ i ê, lóng beh siū kau-hù.

7

Chóng-sī chit ê cha-bó͘-kiáⁿ ê pún-ke beh koh chhut chı̍t-ê, sòa-chiap ông-ūi, i beh tòa kun-tūi lâi, chìn-jı̍p pak-hng ê ông ê hiám-iàu, kong-kek lâi khah-iâⁿ in.

8

Iā chiong in ê siōng-tè, kap só͘ chù ê ngó͘-siōng, í-kı̍p gûn kim ê pó-khì chhiúⁿ-lia̍h kàu Ai-kı̍p; kúi-nā nî kú bô chhap pak-hng ê ông.

9

I beh jı̍p lâm-hng ê ông ê kok, chóng-sī beh iû-gôan tò--khì pún só͘-chāi.

10

I hiah ê kiáⁿ beh khí kau-chiàn, chio-chı̍p chōe-chōe kun-tūi, i beh chìn-chêng chhin-chhiūⁿ chúi hòan-lām tùi-hia keng-kè, chiū beh tò--khì, koh khí kau-chiàn tı̍t-kàu i ê hiám-iàu.

11

Lâm-hng ê ông beh tōa siū-khì, chhut-lâi kap pak-hng ê ông kau-chiàn; i beh pâi-lia̍t tōa kun-tūi, tōa kun-tūi beh kau-hù i ê chhiú.

12

Í-keng tû--khì tōa kun-tūi, i ê sim chū-ko; i sui-jiân hō͘ kúi-nā bān lâng tó--lo̍h-khì, kiù-kèng bô tit-tio̍h khah-iâⁿ.

13

Pak-hng ê ông beh tò--lâi, koh pâi-lia̍t tōa kun-tūi, pí chêng-ê koh khah chōe; kè kúi-nā nî āu, i beh tòa tōa kun-tūi kap chōe-chōe kun-chong lâi.

14

Hit-sî beh ū chōe-chōe lâng khí-lâi kong-kek lâm-hng ê ông; koh lí ê peh-sìⁿ tiong kiông-pō ê lâng iā beh khí-lâi, ài hō͘ īⁿ-siōng tit-tio̍h èng-giām; chóng-sī in beh pāi-bô.

15

Pak-hng ê ông beh lâi, iā beh khí thô͘-tui, kong-chhú kian-kò͘ ê siâⁿ; lâm-hng ê kun-tūi beh khiā-bōe-tiâu, i só͘ kéng ê peh-sìⁿ iā bô la̍t thang khiā-tiâu.

16

To̍k-to̍k lâi kong-kek i ê, beh chhut-chāi ì-sù lâi kiâⁿ, bô lâng tī i ê bīn-chêng khiā-ōe-tiâu; i beh khiā tī êng-iāu ê tōe, i ê chhiú kiâⁿ châu-bia̍t.

17

I koat-ì ēng chôan-kok ê la̍t lâi, iā ū chèng-tı̍t ê lâng kap i lâi, i beh chiàu ì-sù kiâⁿ; koh beh ēng hū-jîn-lâng ê cha-bó͘-kiáⁿ hō͘ i, beh pāi-hōai i; chóng-sī i bōe sêng-lı̍p, iā bô chòe i ê lī-ek.

18

Hit-tia̍p liáu-āu i beh o̍at-tńg-bīn ǹg hiah ê hái-sū, chōe-chōe chhú i; chóng-sī beh ū chı̍t ê tāi-sîn tû--khì i só͘ si ê lêng-jio̍k; koh hō͘ hit ê lêng-jio̍k kui i pún-sin.

19

Āu-lâi i beh o̍at-tńg-bīn ǹg ka-kī kéng-lāi ê hiám-iàu; chóng-sī i beh tio̍h-tak lâi po̍ah-tó; kàu-bé bô koh khòaⁿ-kìⁿ.

20

Hit-sî beh ū chı̍t-lâng khí-lâi, sòa-chiap i ê ūi, hō͘ chı̍t ê le̍k-sek-ê piàn-kiâⁿ kok-lāi êng-iāu ê tōe; chóng-sī bô kúi-jı̍t-lāi i beh siū bia̍t-bô, m̄-sī tùi siū-khì, iā m̄-sī tùi kau-chiàn.

21

Beh ū chı̍t ê pi-chiān ê lâng khí-lâi, sòa-chiap i ê ūi, lâng m̄-bat ēng kok ê êng-kng hō͘ i; sī thàn lâng bô tî-hông ê sî, ēng thiám-mī lâi tit-tio̍h kok.

22

Tōa-tūi ê peng-la̍t beh siū húi-bia̍t tī i ê bīn-chêng, chhin-chhiūⁿ hō͘ tōa-chúi lâu--khì, tâng hōe-bêng ê jîn-kun iā beh án-ni.

23

Lı̍p-iok liáu-āu i beh kiâⁿ khúi-chà; in-ūi i beh chiūⁿ--lâi, ēng chió-chió ê peh-sìⁿ chiâⁿ-chòe kiông-béng.

24

Thàn lâng bô tî-hông ê sî, i beh lâi kàu séng-lāi ê pûi-tōe, iā beh kiâⁿ i ê lia̍t-chó͘, kap in ê lia̍t-chó͘, só͘ bē-bat kiâⁿ--ê; beh ēng só͘ chhiúⁿ-ê, só͘ kiap-ê, kap hè-châi hun-sòaⁿ hō͘ lâng; koh beh siat kè-bô͘ kong-kek chiah ê hiám-iàu ê só͘-chāi, kàu i ê sî-kî.

25

I beh chhut tōa-la̍t hùn-chì, ēng tōa ê kun-tūi kong-kek lâm-hng ê ông; lâm-hng ê ông, iā beh ēng ke̍k-tōa ke̍k-kiông ê kun-peng kap i kau-chiàn; chóng-sī khiā-bōe-tiâu, in-ūi lâng siat kè-bô͘ beh hāi i;

26

chia̍h i ê hōng-lo̍k-ê beh bia̍t i, i ê kun-peng beh sì-sòaⁿ; koh siū-thâi-ê chin-chōe.

27

Chí(Chit) nn̄g ê ông, sim chûn pháiⁿ-ì, tâng-toh ê sî kóng pe̍h-chha̍t; chóng-sī i ê kè-bô͘ bōe chiâⁿ; in-ūi kàu tiāⁿ-tio̍h ê kî in ê kiat-kio̍k ōe kàu.

28

I beh tòa chōe-chōe hè-châi tò--khì pún-kok; i ê sim hóan-tùi sèng-iok; chiàu i ê ì-sù kiâⁿ, tò--khì pún-kok.

29

Kàu tiāⁿ-tio̍h ê kî, i beh tò-tńg, lâi kàu lâm-hng; chóng-sī chí(**chit) lō͘-bé pái bô chhin-chhiūⁿ chêng-pái.

30

In-ūi Ki-thê ê chûn beh kàu kong-kek i, tì-kàu i iu-būn chiū tò--khì, thòng-hūn sèng-iok, chiàu i ê ì-sù lâi kiâⁿ; i beh tò--lâi, kap khì-sak sèng-iok ê lâng saⁿ-kap kè-bô͘.

31

I beh khí-peng, in beh phah lâ-sâm sèng-só͘, chiū-sī ōe-só͘, tû--khì jı̍t-jı̍t só͘ hiàn ê chè-sū, khiā hit ê chân-hāi khó-ò͘ⁿ ê mı̍h.

32

Kiâⁿ-pháiⁿ pōe-iok-ê, i beh ēng thiám-mī ê ōe ín-iú in; to̍k-to̍k bat in ê Siōng-tè ê peh-sìⁿ beh ióng-kám kiâⁿ tāi-chì.

33

Peh-sìⁿ-tiong tì-hūi ê lâng beh kà-sī chōe-chōe lâng; chóng-sī in chōe-chōe jı̍t beh tùi to-kiàm, hé-sio, hō͘ lâng lia̍h, hō͘ lâng chhiúⁿ, lâi sit-pāi.

34

In sit-pāi ê sî beh lio̍h-lio̍h-á tit-tio̍h hû-chō͘; iā ū chōe-chōe lâng beh ēng thiám-mī kap in liân-lo̍k.

35

Tì-hūi ê lâng ê tiong-kan ū-ê beh sit-pāi, lâi thòan-liān in, hō͘ in chheng-khì, hō͘ in pe̍h-pe̍h, tı̍t-kàu lō͘-bé ê jı̍t; in-ūi kàu tiāⁿ-tio̍h ê kî, kiat-kio̍k chiū kàu.

36

Hit ê ông beh chhut-chāi ì-sù lâi kiâⁿ, beh chū-ko chū-tōa pôaⁿ-kè it-chhè ê siōng-tè, koh ēng kî-īⁿ ê ōe kong-kek chiah ê siōng-tè ê Siōng-tè; i beh heng-thong kàu tōa siū-khì bêng-pe̍k; in-ūi só͘ tiāⁿ-tio̍h ê sū tek-khak chiâⁿ.

37

I bô beh iàu-kín i ê lia̍t-chó͘ ê siōng-tè, í-kı̍p hū-lú só͘ him-bō͘--ê, bô-lūn sím-mı̍h siōng-tè i bô iàu-kín; in-ūi i beh chū-tōa pôaⁿ-kè it-chhè.

38

I beh tī i ê ūi kèng-pài ōe-só͘ ê siōng-tè; koh i ê lia̍t-chó͘ só͘ m̄-bat ê siōng-tè, i beh ēng kim, gûn, ge̍k-chio̍h, pó-mı̍h lâi kèng i.

39

I beh óa-khò pa̍t-hō ê siōng-tè lâi siat-hoat kian-kò͘ ê ōe-só͘; hōan-nā sêng-jīn-i--ê, i beh chiong êng-kng hō͘ in, iā beh hō͘ in kóan-hat chōe-chōe lâng, koh beh pun thô͘-tōe pò-siúⁿ in.

40

Kàu lō͘-bé ê sî, lâm-hng ê ông beh chhiok-hōan i; pak-hng ê ông beh kong-kek i chhin-chhiūⁿ kńg-lê-hong, ēng chhia, ēng bé-peng, ēng chōe-chōe chûn-chiah; iā beh chìn-jı̍p hiah ê kok, chhin-chhiūⁿ hòan-lām ê chúi keng-kè.

41

Koh beh chìn-jı̍p êng-iāu ê tōe, chōe-chōe kok hō͘ i chhia-tó; to̍k-to̍k Í-tong, Mô͘-ap, kap A-bûn kiáⁿ-sun chun-kùi ê lâng ōe thoat-lī i ê chhiú.

42

I beh chhun-chhiú kong-kek lia̍t-kok; Ai-kı̍p tōe iā bô tit-tio̍h thoat-lī.

43

I beh chiáng-kóan Ai-kı̍p kim-gûn ê châi-pó í-kı̍p it-chhè ê pó-mı̍h; Lū-pí-a kap Kó͘-sı̍t lâng lóng beh kun-tè i.

44

Tùi-tang tùi-pak beh ū siau-sit kàu lâi jiáu-lōan i; i beh tōa siū-khì chhut-khì, it-chīn tû-bia̍t chōe-chōe lâng.

45

I beh tī hái kap êng-iāu ê sèng-soaⁿ ê tiong-kan tah i kiong-tiān ê pò͘-pîⁿ; chóng-sī i beh kàu i ê kiat-kio̍k, iā bô pang-chān i ê.