Tàn-í-lí 第 10 章 - 巴克禮全羅

1

Pho-su ông Kó͘-lia̍t tē-saⁿ--nî, ū tāi-chì hián-bêng hō͘ chheng-chòe Pek-thê-sa-sat ê Tān-í-lí; chit ê sū sī chin-sı̍t, koan-hē tōa kau-chiàn, Tān-í-lí thong-ta̍t chit ê sū, bêng-pe̍k chit ê īⁿ-siōng.

2

Hit-sî góa Tān-í-lí iu-būn saⁿ ê chhit-jı̍t-kî.

3

Hó ê mı̍h góa bô chia̍h, bah kap chiú bô jı̍p góa ê chhùi, iā bô ēng iû boah góa ê seng-khu, tı̍t-kàu móa saⁿ ê chhit-jı̍t-kî.

4

Chiaⁿ-ge̍h jī-sì-jı̍t, góa tī Hi-tí-kiat tōa-hô piⁿ,

5

kia̍h-ba̍k teh khòaⁿ, khòaⁿ ah, ū chı̍t-lâng, seng-khu chhēng iù-tōe-pò͘ ê saⁿ, io hâ Ou-hoat ê hó-kim;

6

i ê seng-khu chhin-chhiūⁿ n̂g-ge̍k, bīn-māu chhin-chhiūⁿ sih-nà ê khóan, i ê ba̍k-chiu chhin-chhiūⁿ hé-pé, i ê chhiú kap kha sek-tì chhin-chhiūⁿ bôa-kng ê tâng, i kóng-ōe ê siaⁿ chhin-chhiūⁿ kui-tīn lâng ê siaⁿ.

7

Chit ê īⁿ-siōng chí-ū góa Tān-í-lí chı̍t-lâng khòaⁿ-kìⁿ; in-ūi kap góa tī-teh ê lâng bô khòaⁿ-kìⁿ hit ê īⁿ-siōng; kan-ta ngia̍uh-ngia̍uh-chhoah, cháu--khì bih.

8

Chhun góa ka-kī tī-teh; góa khòaⁿ-kìⁿ chit ê tōa īⁿ-siōng; sin-thé lóng bô la̍t; koh góa ê súi-sek pìⁿ-pháiⁿ, kàu lóng bô la̍t.

9

Chóng-sī góa thiaⁿ-kìⁿ i kóng-ōe ê siaⁿ; thiaⁿ-kìⁿ i kóng-ōe ê sî, góa phak-lo̍h tōe, bīn àⁿ tōe, chiū khùn tāng-bîn.

10

Khòaⁿ ah, ū chı̍t ki chhiú bong góa, hō͘ góa ēng kha-thâu-u kap chhiú-chiúⁿ tà tī tōe--nih, teh chhoah.

11

I chiū tùi góa kóng, Tōa-tōa tit-tio̍h thióng-ài ê lâng, Tān-í-lí ah, lí tio̍h bêng góa kap lí só͘ kóng chiah ê ōe; khí-lâi khiā, in-ūi góa taⁿ hōng-chhe kàu lí chia; i tùi góa kóng chit ê ōe, góa chiū khiā-teh gī-gī-chhoah.

12

I koh tùi góa kóng, Tān-í-lí ah, m̄-bián kiaⁿ; in-ūi tùi lí thâu-chı̍t-jı̍t choan-sim ài bêng-pe̍k, koh ka-kī khiam-pi tī lí Siōng-tè ê bīn-chêng ê sî, lí ê ōe í-keng tit-tio̍h thiaⁿ-kìⁿ; koh góa in-ūi lí ê ōe chiah lâi.

13

Nā-sī Pho-su kok ê jîn-kun chó͘-tòng góa jī-cha̍p-it jı̍t; khòaⁿ ah, ū tōa jîn-kun ê chı̍t-ê, Bí-ka-le̍k, lâi pang-chān góa, góa chiū thêng tī-hia, kap Pho-su hiah ê ông chòe-tīn.

14

Taⁿ góa lâi sī beh hō͘ lí bêng lí ê peh-sìⁿ jı̍t-āu só͘ beh tú-tio̍h ê sū; in-ūi chit ê īⁿ-siōng iáu-kú koan-hē chōe-chōe jı̍t.

15

I ēng chiah ê ōe kā góa kóng, góa chiū bīn ǹg-tōe, chēng-chēng bô kóng-ōe.

16

Khòaⁿ ah, ū chı̍t-ūi chhin-chhiūⁿ lâng ê khóan bong góa ê chhùi-tûn; góa chiū khui-chhùi, tùi hit-ūi khiā tī góa ê bīn-chêng-ê kóng, Góa ê chú ah, in-ūi chit ê īⁿ-siōng góa chin iu-būn, tì-kàu góa lóng bô la̍t.

17

Góa ê chú ê lô͘-po̍k cháiⁿ-iūⁿ ōe kap góa ê chú kóng-ōe ah? in-ūi chit-sî góa ê seng-khu lóng bô la̍t, iā lóng bô chhóan-khùi.

18

Koh chı̍t-ūi chhin-chhiūⁿ lâng ê khóan-ê lâi bong góa, hō͘ góa ū la̍t.

19

I kóng, Tōa tit-tio̍h thióng-ài ê lâng, m̄-bián kiaⁿ; gōan lí pêng-an; lí tio̍h ióng-chòng, tio̍h ióng-chòng. I chı̍t-ē tùi góa kóng-ōe, góa chiū tit-tio̍h ū la̍t, kóng, Góa ê chú ah, chhiáⁿ lí kóng, in-ūi lí í-keng hō͘ góa ū la̍t.

20

I chiū kóng, Lí chai góa ūi-hô lâi lí chia mah? Taⁿ góa beh tò--khì kap Pho-su ê jîn-kun kau-chiàn; góa khì-liáu, khòaⁿ ah, Hi-lia̍p ê jîn-kun beh lâi.

21

Chóng-sī góa beh chiong kì-chài tī chin-sı̍t ê chheh-ê chí-sī lí; tû lí ê tōa jîn-kun Bí-ka-le̍k í-gōa, bô chı̍t-ê kap góa tàu chhut-la̍t lâi tí-tng in.