Tàn-í-lí 第 9 章 - 巴克禮全羅

1

Má-tāi cho̍k A-hap-sûi-ló͘ ê kiáⁿ Tāi-lī-o͘ lı̍p-chòe Ka-le̍k-tí kok ê ông gôan--nî;

2

chiū-sī i chē-ūi ê gôan--nî, góa Tān-í-lí tùi chheh--nih tit-tio̍h chai hiah ê nî ê siàu-gia̍h, chiū-sī Iâ-hô-hoa ê ōe lîm-kàu sian-ti Iâ-lī-bí kóng-khí Iâ-lō͘-sat-léng tú-tio̍h hong-hòe tio̍h móa chhit-cha̍p nî.

3

Góa koat-ì ǹg Chú Siōng-tè ài ēng kî-tó khún-kiû, kìm-chia̍h, chhēng môa-saⁿ, sám hé-hu, lâi chhē I.

4

Góa kî-tó Iâ-hô-hoa, góa ê Siōng-tè, jīn-chōe, kóng, Chú, chì-tōa thang kiaⁿ-ùi ê Siōng-tè ah, chiū-sī siú-iok si-un hō͘ kìⁿ-nā thiàⁿ I, kín-siú I kài-bēng ê lâng ê;

5

góan ū hōan-chōe, chok-gia̍t, kiâⁿ-pháiⁿ, pōe-pōan, lī-khui Lí ê kài-bēng hoat-tō͘;

6

bô thiaⁿ Lí ê lô͘-po̍k chiah ê sian-ti, chiū-sī hōng Lí ê miâ tùi góan ê kun-ông, kùi-cho̍k, lia̍t-chó͘, kap kok-lāi it-chhè ê peh-sìⁿ, kóng-ōe--ê.

7

Chú ah, kong-gī kui tī Lí, kiàn-siàu kui tī góan, chhin-chhiūⁿ kin-á-jı̍t; chiū-sī kui tī Iû-tāi lâng, kap Iâ-lō͘-sat-léng ê peh-sìⁿ, í-kı̍p Í-sek-lia̍t chèng-lâng, he̍k-sī kūn-ê, he̍k-sī hn̄g-ê, tī Lí, ūi-tio̍h in tek-chōe Lí, lâi kóaⁿ in kàu ê ta̍k-kok.

8

Chú ah, kiàn-siàu kui tī góan, kui tī góan ê kun-ông, kùi-cho̍k, lia̍t-chó͘, in-ūi góan tek-chōe Lí.

9

Góan sui-jiân pōe-ge̍k Chú, góan ê Siōng-tè, chóng-sī lîn-bín sià-chōe sī chāi-tī I;

10

iā bô thiaⁿ Iâ-hô-hoa góan ê Siōng-tè ê ōe, lâi kiâⁿ I thok-tiōng I ê lô͘-po̍k chiah ê sian-ti só͘ pâi-lia̍t tī góan ê bīn-chêng ê lu̍t-hoat.

11

Í-sek-lia̍t chôan-cho̍k lóng ū hōan-tio̍h Lí ê lu̍t-hoat, kiâⁿ phian-lō͘ bô thiaⁿ-thàn Lí ê ōe; in-ūi án-ni, chit ê chiù-chó͘, í-kı̍p Siōng-tè ê lô͘-po̍k Mô͘-se lu̍t-hoat-tiong só͘ kì ê chiù-chōa, lóng piàⁿ tī góan ê sin-chiūⁿ, in-ūi góan ū tek-chōe Lí.

12

I bat kàng tōa chai-ē hō͘ góan, lâi èng-giām I chêng kéng-kài góan iā kéng-kài sím-phòaⁿ góan sū-su ê ōe; in-ūi tī phó͘-thiⁿ-ē m̄-bat kiâⁿ chhin-chhiūⁿ só͘ kiâⁿ tī Iâ-lō͘-sat-léng ê.

13

Che it-chhè ê chai-ē lîm-kàu góan, sī chiàu Mô͘-se lu̍t-hoat-tiong só͘ kì-chài-ê; chóng-sī góan iáu bô kiû Iâ-hô-hoa góan ê Siōng-tè si-un, hō͘ góan o̍at-thâu lī-khui góan ê chōe-kòa, bêng-pe̍k Lí ê chin-lí.

14

Só͘-í Iâ-hô-hoa chù-ì hō͘ chit ê chai-ē lîm-kàu góan; in-ūi Iâ-hô-hoa góan ê Siōng-tè tī I só͘ kiâⁿ ê sū lóng sī kong-gī; góan pēng-bô thiaⁿ-thàn I ê ōe.

15

Chú, góan ê Siōng-tè ah, Lí bat ēng tōa kôan-lêng ê chhiú tòa Lí ê peh-sìⁿ chhut Ai-kı̍p tōe, hō͘ Lí ū miâ-siaⁿ, chhin-chhiūⁿ kin-á-jı̍t; góan ū hōan-chōe, góan ū kiâⁿ-pháiⁿ.

16

Chú ah, kiû Lí chiàu Lí ê kong-gī hō͘ Lí ê siū-khì kap Lí ê tōa siū-khì o̍at-tńg lī-khui Lí ê siâⁿ Iâ-lō͘-sat-léng, chiū-sī Lí ê sèng-soaⁿ; in-ūi tùi góan ê chōe-ok, kap góan lia̍t-chó͘ ê chōe-kòa, Iâ-lō͘-sat-léng kap Lí ê peh-sìⁿ hō͘ sì-ûi ê lâng só͘ lêng-jio̍k.

17

Só͘-í góan ê Siōng-tè ah, taⁿ kiû Lí thiaⁿ Lí ê lô͘-po̍k ê kî-tó khún-kiû; koh in-ūi Chú ê iân-kò͘, hō͘ Lí ê bīn ê kng chiò Lí pha-hng ê sèng-só͘.

18

Góa ê Siōng-tè ah, kiû Lí àⁿ hī-khang lâi thiaⁿ, khui Lí ê ba̍k-chiu lâi khòaⁿ góan pha-hng ê tōe, kap ēng Lí ê miâ lâi chheng ê siâⁿ; in-ūi góan hiàn góan ê kî-tó tī Lí ê bīn-chêng, m̄-sī in-ūi ka-kī ê gī, chiū-sī in-ūi Lí ê tōa lîn-bín.

19

Chú ah, thiaⁿ, Chú ah, sià-bián, Chú ah, thiaⁿ lâi kiâⁿ; góa ê Siōng-tè ūi Lí ê iân-kò͘ bo̍h-tit iân-chhiân, in-ūi Lí ê siâⁿ, Lí ê peh-sìⁿ, lóng sī ēng Lí ê miâ lâi chheng-ê.

20

Góa teh kóng teh kî-tó ê sî, jīn góa ê chōe kap góa ê peh-sìⁿ Í-sek-lia̍t ê chōe, ūi-tio̍h góa ê Siōng-tè ê sèng-soaⁿ hiàn góa ê khún-kiû tī góa ê Siōng-tè Iâ-hô-hoa ê bīn-chêng;

21

góa kî-tó ê ōe kóng bē ôan, góa khí-thâu tī īⁿ-siōng-tiong só͘ khòaⁿ-kìⁿ ê lâng, Ka-pek-lia̍t, hōng bēng-lēng kín-kín pe--lâi, iok-lio̍k tī hiàn ê-hng-chè ê sî, lâi bong góa.

22

I kà-sī góa, kā góa kóng, Tān-í-lí ah, góa lâi sī beh hō͘ lí ū tì-hūi chhang-miâ.

23

Lí khí-thâu kî-tó ê sî, chiū ū bēng-lēng hoat-chhut, taⁿ góa lâi kā lí kóng; in-ūi lí tōa-tōa tit-tio̍h thióng-ài; só͘-í lí tio̍h siūⁿ chit ê sū, lâi bêng-pe̍k chit ê īⁿ-siōng.

24

Lūn-kàu lí ê peh-sìⁿ kap lí ê sèng-siâⁿ í-keng hān-tiāⁿ chhit-cha̍p ê chhit-jı̍t-kî, beh at-chí kè-sit, tû-chīn chōe-ok, kiù-sio̍k chōe-kòa, ín-chìn éng-óan ê gī, hong-ba̍t īⁿ-siōng kap chhàm-gú, koh ēng iû boah chì-sèng-ê.

25

Só͘-í lí tio̍h chai tio̍h bêng, tùi chhut-bēng têng-sin khí-chō Iâ-lō͘-sat-léng tı̍t-kàu siū boah-iû ê jîn-kun ê sî, beh ū chhit ê chhit-jı̍t-kî; koh la̍k-cha̍p-jī ê chhit-jı̍t-kî, tng tī kan-lân ê sî i kap koe-lō͘ kap hô-kau lóng beh koh khí-chō.

26

Kè la̍k-cha̍p-jī ê chhit-jı̍t-kî ê liáu-āu, siū-boah-iû-ê beh tú-tio̍h chián-tû, iā lóng bô só͘ ū; beh ū chı̍t ê jîn-kun ê peh-sìⁿ kàu lâi húi-bia̍t siâⁿ kap sèng-só͘, i ê kiat-kio̍k beh chhin-chhiūⁿ ēng tōa-chúi, kàu lō͘-bé beh ū kau-chiàn; pha-hng ê sū í-keng tiāⁿ-tio̍h.

27

Chı̍t ê chhit-jı̍t-kî ê lāi-bīn, i beh kap chōe-chōe lâng lı̍p kian-kò͘ ê iok; chhit-jı̍t-kî ê chı̍t-pòaⁿ i beh hō͘ chè-sū kap lé-mı̍h lóng soah; chân-hāi--ê chioh khó-ò͘ⁿ-ê ê sı̍t lâi; koh ū tōa siū-khì piàⁿ tī hit ê kiâⁿ húi-bia̍t-ê ê sin-chiūⁿ, kàu tī só͘ tiāⁿ-tio̍h ê bo̍at-kî.