Tàn-í-lí 第 8 章 - 巴克禮全羅

1

Pek-sa-sat ông chē-ūi tē-saⁿ-nî, koh ū īⁿ-siōng chhut-hiān hō͘ góa Tān-í-lí khòaⁿ-kìⁿ, chiū-sī tī góa thâu-chı̍t-pái khòaⁿ-kìⁿ ê īⁿ-siōng ê liáu-āu.

2

Góa khòaⁿ-kìⁿ īⁿ-siōng, khòaⁿ-kìⁿ ê sî sī tī Í-lân séng Su-san ê kiong-tiān; góa khòaⁿ-kìⁿ īⁿ-siōng sī tī Ou-lâi ê hô-piⁿ.

3

Góa kia̍h-ba̍k teh khòaⁿ, khòaⁿ ah, ū kang ê mî-iûⁿ khiā tī hô ê thâu-chêng, i ū nn̄g ki kak; nn̄g-ki kak lóng kôaiⁿ; chit-ki khah kôaiⁿ hit-ki; khah-kôaiⁿ-ê tè-bé hoat.

4

Góa khòaⁿ-kìⁿ hit chiah kang ê mî-iûⁿ ǹg-sai ǹg-pak ǹg-lâm lâi tak; bô chı̍t chiah siù ōe khiā-chāi tī i ê bīn-chêng, iā bô chı̍t-ê ōe kiù-chhut i ê chhiú; i chhut-chāi ì-sù kiâⁿ ka-kī chòe-tōa.

5

Góa teh siūⁿ ê sî, khòaⁿ ah, ū chı̍t chiah kang ê soaⁿ-iûⁿ tùi sai--sì lâi, piàn-kiâⁿ chôan-tōe, kha bô ta̍h-tio̍h tōe; chit chiah soaⁿ-iûⁿ tī i nn̄g lúi ba̍k-chiu ê tiong-ng ū chı̍t ki chin hiáⁿ-ba̍k ê kak.

6

I khì kàu ū nn̄g-ki kak kang ê mî-iûⁿ hia, chiū-sī góa só͘ khòaⁿ-kìⁿ khiā tī hô ê thâu-chêng-ê, hoat tōa siū-khì, cháu--khì chhē i.

7

Góa khòaⁿ-kìⁿ i óa-kūn kang ê mî-iûⁿ, ǹg i hoat tōa siū-khì, tak hit chiah mî-iûⁿ, phah-chı̍h i nn̄g ki kak, mî-iûⁿ bô la̍t thang khiā tī i ê bīn-chêng; i chiū hō͘ i tó tī tōe--nih, thún-ta̍h i; bô chı̍t-ê ōe kiù mî-iûⁿ chhut i ê chhiú.

8

Hit chiah soaⁿ-iûⁿ ka-kī chòe chin tōa; tng i kiông-béng ê sî, hit-ki tōa-ki kak tú-tio̍h phah-chı̍h, ū hoat sì ki hiáⁿ-ba̍k ê kak thòe i, ǹg thiⁿ sì-bīn ê hong.

9

In tiong-kan chı̍t-ki koh hoat-chhut chı̍t-ki sòe-ki-kak, chiâⁿ-chòe chin tōa, ǹg-lâm, ǹg-tang, ǹg êng-iāu ê tōe.

10

I chiâⁿ-chòe kôaiⁿ-tōa kàu thiⁿ ê kun-tūi; chiong kun-tūi kap chhiⁿ-sîn kúi-nā-ê hiat-lo̍h tōe--nih, thún-ta̍h i.

11

Koh i ka-kī chòe kôaiⁿ-tōa kàu tī kun-tūi ê chú-cháiⁿ, tû--khì ta̍k-jı̍t só͘ hiàn hō͘ i ê sio-chè, húi-hōai i ê sèng-só͘.

12

Ūi-tio̍h chōe-kòa ê iân-kò͘ ū kun-tūi kap jı̍t-jı̍t só͘ hiàn ê sio-chè kau-hù i; i chiong chin-lí hiat tī tōe--nih, chhut-chāi ì-sù lâi kiâⁿ, bô m̄ heng-thong.

13

Góa thiaⁿ-kìⁿ ū chı̍t-ūi sèng-ê teh kóng-ōe, koh ū chı̍t-ūi sèng-ê tùi hit-ūi teh kóng-ōe-ê kóng, Chit ê īⁿ-siōng, chiū-sī lūn-kàu jı̍t-jı̍t só͘ hiàn ê sio-chè kap tì-kàu hong-hòe ê chōe-ok, hō͘ sèng-só͘ kap kun-tūi siū thún-ta̍h, beh kàu sím-mı̍h sî ah?

14

I kā góa kóng, Kàu nn̄g-chheng saⁿ-pah mî-jı̍t, sèng-só͘ chiū beh tit-tio̍h chheng-khì.

15

Góa Tān-í-lí, góa ū khòaⁿ-kìⁿ chit ê īⁿ-siōng, ài-beh bêng-pe̍k hit ê ì-sù, hit-sî hut-jiân ū chı̍t-ūi chhin-chhiūⁿ lâng ê khóan-sit khiā tī góa ê bīn-chêng.

16

Góa koh thiaⁿ-kìⁿ Ou-lâi hô siang-pêng-hōaⁿ ê tiong-kan ū lâng ê siaⁿ kiò kóng, Ka-pek-lia̍t ah, tio̍h hō͘ chit-lâng bêng-pe̍k chit ê īⁿ-siōng.

17

I chiū lâi kàu góa khiā-teh ê só͘-chāi; i chı̍t-ē lâi, góa chiū kiaⁿ-hiâⁿ, phak tī tōe--nih; i kā góa kóng, Jîn-chú ah, lí tio̍h bêng-pe̍k; in-ūi chit ê īⁿ-siōng sī koan-hē tī bo̍at-kî.

18

I kap góa kóng-ōe ê sî, góa ê bīn phak tī tōe--nih, khùn tāng-bîn; i chiū bong góa, hû góa khí-lâi khiā.

19

I kóng, Khòaⁿ ah, góa beh hō͘ lí chai siū-khì ê bo̍at-kî só͘ beh ū ê sū; in-ūi chit-ê sī koan-hē tī lō͘-bé só͘ tiāⁿ-tio̍h ê sî.

20

Lí só͘ khòaⁿ-kìⁿ kang ê mî-iûⁿ, ū nn̄g ki kak ê, chiū-sī Má-tāi kap Pho-su nn̄g ê ông.

21

Hit-chiah tn̂g-mn̂g kang ê soaⁿ-iûⁿ chiū-sī Hi-lia̍p ông; i nn̄g-lúi ba̍k-chiu-tiong ê tōa-ki kak chiū-sī thâu-chı̍t ê ông.

22

Lūn-kàu hit-ki phah-chı̍h ê kak, tùi i ê tóe koh hoat-chhut sì-ki kak; án-ni ū sì-kok beh tùi i ê kok heng-khí, chóng-sī kôan-le̍k bōe pí--tit i.

23

Hiah ê kok ê bo̍at-kî, lâng ê chōe-ok kòan-móa, beh ū chı̍t ê ông heng-khí, bīn-māu hiong-ok, gâu ēng khúi-khiat ê ōe.

24

I ê kôan-pèng chiâⁿ-chòe tōa, chóng-sī m̄-sī tùi ka-kī ê kôan-pèng; i beh kiâⁿ hui-siông ê húi-bia̍t, iā sī heng-thong, koh chiàu ka-kī ê ì-sù lâi kiâⁿ; koh beh húi-bia̍t ū kôan-le̍k-ê í-kı̍p sèng ê peh-sìⁿ.

25

I ēng kè-bô͘ hō͘ i khúi-khiat ê chhiú-tōaⁿ heng-thong; sim-lāi ka-kī chòe-tōa; húi-bia̍t chōe-chōe lâng tī in bô tî-hông ê sî; koh beh khí-lâi kong-kek bān-ông ê Ông; chóng-sī i beh siū húi-hōai, m̄-sī ēng lâng ê chhiú.

26

Chêng só͘ kóng ê-hng chá-khí ê īⁿ-siōng sī chin--ê; chóng-sī lí tio̍h hong-ba̍t hit ê īⁿ-siōng; in-ūi sī koan-hē chōe-chōe jı̍t-āu ê sū.

27

Tùi án-ni góa Tān-í-lí hun-bê, phòa-pīⁿ kúi-nā jı̍t; jiân-āu khí--lâi pān-lí ông ê sū-bū; góa in-ūi chit ê īⁿ-siōng gông-ngia̍h, bô lâng ōe hiáu-tit.