Tàn-í-lí 第 7 章 - 巴克禮全羅

1

Tng Pa-pí-lûn ông Pek-sa-sat gôan--nî, Tān-í-lí tī chhn̂g--nih ū bāng-kìⁿ, sim-lāi khòaⁿ-kìⁿ īⁿ-siōng; i chiū siá hit ê bāng, kóng-khí kî-tiong ê tāi-ì.

2

Tān-í-lí kóng, Góa mî--sî khòaⁿ-kìⁿ īⁿ-siōng; khòaⁿ ah, thiⁿ--nih sì-bīn ê hong hut-jiân khí, chhe tī tōa-hái ê téng-bīn.

3

Ū sì chiah siù, chin tōa-chiah, tùi hái--nih khí--lâi, khóan-sit kok bô saⁿ-tâng.

4

Thâu-chı̍t-chiah chhin-chhiūⁿ sai, ū eng-chiáu ê sı̍t; góa khòaⁿ-kìⁿ kàu i ê sı̍t siū pu̍ih--khí-lâi, koh tī tōe-chiūⁿ tit-tio̍h hû--khí-lâi hō͘ i nn̄g ki kha khiā--khí-lâi chhin-chhiūⁿ lâng chı̍t-iūⁿ, iā hō͘ i ū lâng ê sim.

5

Khòaⁿ ah, koh chı̍t chiah siù sī tē-jī-chiah, chhin-chhiūⁿ hîm, théng-khí i sin-thé ê chı̍t-pêng, i ê chhùi-lāi ū saⁿ ki hia̍p-kut, kâm tī chhùi-khí-tiong; in kā i kóng, Khí-lâi, thun-chia̍h chōe-chōe bah.

6

Āu-lâi góa koh khòaⁿ, khòaⁿ ah, koh ū chı̍t chiah siù, khóan-sit chhin-chhiūⁿ pà, ka-chiah ū sì ê sı̍t chhin-chhiūⁿ chiáu; chit chiah siù ū sì ê thâu-khak, koh ū kôan-pèng hō͘ i.

7

Āu-lâi góa tī mî--sî ê īⁿ-siōng-tiong teh khòaⁿ, khòaⁿ ah, ū tē-sì-chiah ê siù, thang kiaⁿ thang lún, iā sī put-chí kiông; ū tōa-ki ê thih-khí, i thun-kā thiah-chhùi, só͘-chhun--ê ēng kha ta̍h i; kap í-chêng hiah ê siù koh-iūⁿ; koh hoat cha̍p ki kak.

8

Góa teh khòaⁿ hiah ê kak, khòaⁿ ah, hit tiong-kan ū lēng-gōa hoat chı̍t-ki sòe-ki-kak; chiông-chiân hiah ê kak ê tiong-kan ū saⁿ ki kak hâm kun pu̍ih--khí-lâi tī sòe ki kak ê thâu-chêng; khòaⁿ ah, chit ki kak ū ba̍k-chiu chhin-chhiūⁿ lâng ê ba̍k-chiu, koh ū chhùi teh kóng tōa-ōe.

9

Góa koh khòaⁿ kàu hiah ê chō-ūi pâi-lia̍t, ū chı̍t-ê tùi kó͘-chá chiū ū-ê chē--teh; i ê i-ho̍k pe̍h chhin-chhiūⁿ seh, i ê thâu-mn̂g chhin-chhiūⁿ chin chheng-khì ê iûⁿ-mn̂g; i ê pó-chō chiū-sī hé-iām, i ê lûn chhin-chhiūⁿ hé teh to̍h.

10

Ū hé chhin-chhiūⁿ khoe hoat-chhut lâu tī i ê bīn-chêng; ho̍k-sāi i-ê ū chheng-chheng, kun-sûi tī i ê bīn-chêng-ê ū bān-bān; sím-phòaⁿ ê sū lóng piān, chheh lóng hian-khui.

11

Hit-sî góa in-ūi hit ki kak só͘ kóng tōa-ōe ê siaⁿ chiū khòaⁿ i; khòaⁿ kàu hit chiah siù siū-thâi, i ê sin-thé siū húi-hōai, hiat tī hé--nih sio.

12

Lūn-kàu kî-û chiah ê siù, i ê kôan lóng sit-lo̍h, chóng-sī in ê sìⁿ-miā iáu lâu--teh kàu tī tiāⁿ-tio̍h ê sî tiāⁿ-tio̍h ê jı̍t-kî.

13

Góa tī mî--sî ê īⁿ-siōng-tiong teh khòaⁿ, khòaⁿ ah, ū chı̍t-ê chhin-chhiūⁿ lâng ê khóan chē thiⁿ-téng ê hûn lâi kàu tī hit ê tùi kó͘-chá chiū ū-ê, in chiū chhōa i kàu i ê bīn-chêng.

14

Chiū siúⁿ-sù i ū kôan-pèng, êng-kng, kok-ūi, hō͘ bān peh-sìⁿ, bān-kok, bān khiuⁿ-kháu ê lâng lóng ho̍k-sāi i; i ê kôan-pèng sī éng-óan ê kôan-pèng, bōe-ōe bô--khì, i ê kok-ūi tek-khak bô hòe-bô.

15

Góa Tān-í-lí sim-sîn tī góa ê lāi-bīn iu-būn, sim-lāi ê īⁿ-siōng hō͘ góa peh-pak.

16

Góa chiū khì chhē hiah ê khiā tī piⁿ--á ê chı̍t-ê, mn̄g i chiah ê sū ê sı̍t-chāi. I chiū tùi góa kóng, iā kóe-bêng hiah ê sū hō͘ góa chai.

17

Hí(**Hit) sì-chiah tōa-siù sī sì ê ông, beh tùi tōe-chiūⁿ heng-khí.

18

Chóng-sī Chì-kôaiⁿ-ê sèng ê peh-sìⁿ beh tit-tio̍h kok-ūi, tn̂g-tn̂g chiáng-lí kok-kôan, éng-óan bô soah.

19

Hit-sî góa ài chai tē-sì-chiah siù ê sı̍t-chāi, i kap in hiah ê siù koh-iūⁿ, put-chí thang kiaⁿ, i ê chhùi-khí sī thih-ê, i ê jiáu sī tâng-ê; i thun-kā thiah-chhùi, só͘ chhun-ê ēng kha ta̍h i;

20

koh ài chai i thâu-khak só͘ hoat cha̍p ki kak ê sı̍t-chāi, kap hit-ki lēng-gōa hoat ê kak, hō͘ saⁿ ki kak lak-lo̍h tī i ê thâu-chêng, chiū-sī ū ba̍k-chiu, ū chhùi kóng tōa-ōe ê kak, i ê khóan-sit khah kiông-béng i ê tâng-lūi.

21

Góa khòaⁿ-kìⁿ chit ki kak kap sèng ê peh-sìⁿ kau-chiàn, lâi khah-iâⁿ in;

22

tı̍t-kàu hit ê tùi kó͘-chá chiū ū-ê lâi; kā Chì-kôaiⁿ-ê sèng ê peh-sìⁿ phòaⁿ-tòan, kàu sèng-tô͘ tit-tio̍h kok-ūi ê jı̍t-kî kàu.

23

I án-ni kóng, Tē-sì-chiah siù beh chòe tōe-chiūⁿ ê tē sì kok, i kap lóng-chóng ê kok bô tâng; koh beh thun-kā chôan-tōe, beh thún-ta̍h i, thiah-chhùi i.

24

Lūn-kàu hí(**hit) cha̍p ki kak, chiū-sī tùi hit ê kok-lāi beh heng-khí cha̍p ê ông; āu-lâi lēng-gōa ū chı̍t ê ông heng-khí, kap chêng hiah-ê bô tâng, i beh hō͘ saⁿ ê ông hâng-ho̍k i.

25

I beh kóng-ōe ngó͘-ge̍k Chì-kôaiⁿ-ê, iā beh khó͘-chhó͘ Chì-kôaiⁿ ê sèng ê peh-sìⁿ; iā siūⁿ beh kóe-ōaⁿ choeh-kî, lu̍t-hoat; in beh kau-tài i ê chhiú, le̍k-kè chı̍t-sî, koh nn̄g-sî, koh pòaⁿ-sî.

26

Sím-phòaⁿ-si beh chē-ūi, in beh chhiúⁿ-to̍at ông ê kôan, húi-hōai i, bia̍t-bô i kàu thiat-tí.

27

Phó͘-thiⁿ-ē ê kok-ūi, kôan-pèng, kap lia̍t-kok ê ui-kôan lóng kau-hō͘ Chì-kôaiⁿ-ê sèng ê peh-sìⁿ; I ê kok sī éng-óan ê kok, kìⁿ-nā ū-kôan-ê lóng beh ho̍k-sāi sūn-thàn I.

28

Chit ê tāi-chì kàu-chia kiat-kio̍k; góa Tān-í-lí sim-lāi siūⁿ-liáu peh-pak, bīn iā piàn-sek; chóng-sī góa ēng chit ê sū khǹg tī sim-lāi.