Tàn-í-lí 第 6 章 - 巴克禮全羅

1

Tāi-lī-o͘ chiàu i ê ì-sù siat-lı̍p chı̍t-pah jī-cha̍p ê chóng-tok, hō͘ in hun-kóan chôan-kok,

2

koh tī in ê téng-bīn siat-lı̍p chóng-tiúⁿ saⁿ-lâng, kî-tiong Tān-í-lí sī chı̍t-ê; hō͘ hiah ê chóng-tok chiong chèng-sū tùi in pín-bêng, bián-tit ông khui-sún.

3

In-ūi chit ê Tān-í-lí ū hó sèng-chêng, só͘-í iâⁿ-kè kî-û ê chóng-tiúⁿ kap chóng-tok; ông chiū siūⁿ beh siat-lı̍p i tī-lí thong-kok.

4

Tùi án-ni chóng-tiúⁿ kap chóng-tok tī kok-chèng-tiong chhē-phāng beh kò Tān-í-lí; chóng-sī chhē bô i ê khang-phāng kap kè-sit; in-ūi i chīn-tiong, lóng chhē bô i ê chhò-gō͘ kè-sit.

5

Hiah ê lâng chiū saⁿ-kap kóng, Chit ê Tān-í-lí, tû--khì i thàn i ê Siōng-tè ê lu̍t-hoat í-gōa, lán bô thang chhē i ê khang-khiah lâi kò i.

6

Tùi hit-tia̍p hiah ê chóng-tiúⁿ kap chóng-tok hun-hun chū-chı̍p lâi kìⁿ ông, kóng, Gōan Tāi-lí-o͘ ông bān-sòe.

7

Kok-lāi chóng-tiúⁿ, khim-chhe, chóng-tok, bô͘-sū, kap sûn-bú lóng saⁿ-kap gī-lūn ài beh siat chı̍t tiâu ông ê lē, lâi lı̍p chı̍t tiâu giâm ê kìm-lēng, tī saⁿ-cha̍p jı̍t lāi, tû-khí kiû ông í-gōa, kìⁿ-nā tùi put-lūn sím-mı̍h siōng-tè á-sī tùi lâng lâi kiû--ê, tio̍h hiat i lo̍h sai-hia̍t.

8

Ông ah, taⁿ kiû lí siat-lı̍p hit ê kìm-lēng, chhiam-jī tī hit ê chiàu, hō͘ i bōe kóe-ōaⁿ--tit, chiàu Má-tāi kap Pho-su ê lē, bōe thang kóe--tit.

9

Tùi án-ni Tāi-lī-o͘ ông chhiam-jī tī hit ê chiàu kap kìm-lēng.

10

Tān-í-lí chai chit ê chiàu í-keng chhiam-jī, chiū kàu i ê chhù; (i pâng-lāi ê thang khui ǹg Iâ-lō͘-sat-léng); chı̍t-jı̍t saⁿ-pái kūi tī i ê Siōng-tè ê bīn-chêng kî-tó kám-siā, kap pêng-jı̍t bô koh-iūⁿ.

11

Chiah ê lâng chiū hun-hun chū-chı̍p, khòaⁿ-kìⁿ Tān-í-lí tī i ê Siōng-tè ê bīn-chêng kî-tó khún-kiû.

12

In chiū kàu ông ê bīn-chêng, thê-khí ông ê kìm-lēng kóng, Ông ah, tī saⁿ-cha̍p jı̍t lāi tû-khí kiû ông í-gōa, kìⁿ-nā tùi put-lūn sím-mı̍h siōng-tè á-sī tùi lâng lâi kiû--ê, tio̍h hiat i lo̍h sai-hia̍t, lí kiám-m̄-sī chhiam-jī tī chit ê chiàu mah? Ông ìn kóng, Chit ê sū sı̍t-chāi ū, chiàu Má-tāi kap Pho-su ê lē, bōe thang kóe--tit.

13

In tī ông ê bīn-chêng ìn kóng, Ông ah, tī Iû-tāi cho̍k siū-lia̍h-ê ê tiong-kan hit ê Tān-í-lí bô lia̍h lí kap lí só͘ chhiam-jī ê kìm-lēng chòe iàu-kín; i kèng-jiân chı̍t-jı̍t saⁿ-pái kî-tó.

14

Ông thiaⁿ-kìⁿ chiah ê ōe, chīn-chāi hôan-ló, liû-sim beh kiù Tān-í-lí tı̍t-tı̍t siūⁿ kiù i ê hoat-tō͘ kàu jı̍t-lo̍h.

15

Chiah ê lâng chiū hun-hun chū-chı̍p lâi kìⁿ ông, kā ông kóng, Ông ah, tio̍h chai Má-tāi lâng kap Pho-su lâng ū lē, kìⁿ-nā ông só͘ lı̍p ê kìm-lēng kap lu̍t-lē lóng bōe kóe-ōaⁿ--tit.

16

Ông chiū chhut-lēng, lâng chiū tòa Tān-í-lí lâi, hiat i tī sai-hia̍t. Ông tùi Tān-í-lí kóng, Lí ê Siōng-tè, lí só͘ siông-siông ho̍k-sāi ê, I beh kiù lí.

17

Lâng poaⁿ chio̍h-thâu lâi hē tī hia̍t-kháu; ông ēng ka-kī ê ìn kap tāi-sîn ê ìn hong-ba̍t i, hō͘ Tān-í-lí ê tāi-chì lóng bōe kóe-ōaⁿ--tit.

18

Ông tò--khì kiong-lāi, thong-mî kìm-chia̍h; bô lâng chok-ga̍k tī i ê bīn-chêng, i iā bōe khùn--tit.

19

Keh chá-khí ông chá-chá khí-lâi, kín-kín khì kàu sai-hia̍t.

20

Chiong-kūn hia̍t-piⁿ, chhut ai-siong ê siaⁿ kiò Tān-í-lí; ông tùi Tān-í-lí kóng, Éng-o̍ah Siōng-tè ê lô͘-po̍k, Tān-í-lí ah, lí ê Siōng-tè, lí só͘ siông-siông ho̍k-sāi-ê, ōe kiù lí thoat-lī hiah ê sai mah?

21

Tān-í-lí tùi ông kóng, Gōan ông bān-sòe.

22

Góa ê Siōng-tè chhe I ê sù-chiá, nı̍h chiah ê sai ê chhùi, hō͘ in bô siong-hāi góa; in-ūi góa tī I ê bīn-chêng bô-chōe; ông ah, góa tī lí ê bīn-chêng iā bô kiâⁿ khek-khui lí ê sū.

23

Ông ūi-tio̍h án-ni hoaⁿ-hí kàu-ke̍k, bēng-lēng lâng chhú Tān-í-lí chhut-hia̍t. Tùi án-ni chhú Tān-í-lí chhut-hia̍t; i ê seng-khu lóng bô siū-siong, in-ūi i óa-khò i ê Siōng-tè.

24

Ông chiū chhut-lēng, lâng chiū chiong hiah ê kò Tān-í-lí ê lâng, liân in ê bó͘-kiáⁿ, lóng tòa--lâi, hiat lo̍h sai-hia̍t; in iáu-bē kàu hia̍t-tóe, sai chiū sah in, kā-chhùi in ê kut-thâu.

25

Hit-sî Tāi-lī-o͘ ông pan-chiàu hō͘ chôan-tōe hiah ê peh-sìⁿ hiah ê kok, hiah ê khiuⁿ-kháu ê lâng kóng: Gōan lín tōa-tōa hióng-siū pêng-an.

26

Taⁿ góa chhut-lēng, hoan-hù góa só͘ kóan-hat thong-kok peh-sìⁿ tio̍h tī Tān-í-lí ê Siōng-tè ê bīn-chêng kiaⁿ-hiâⁿ ngia̍uh-ngia̍uh-chhoah, in-ūi I sī o̍ah ê Siōng-tè, tn̂g-tn̂g tī--teh, I ê kok éng-óan bô bia̍t, I ê kôan-pèng bû-kiông bû-chīn;

27

I kiâⁿ chín-kiù, tī thiⁿ--nih tī tōe--nih kiâⁿ sîn-jiah kî-sū; I ū kiù Tān-í-lí thoat-lī sai ê chhùi.

28

Án-ni chit ê Tān-í-lí tng Tāi-lī-o͘ chē-ūi ê sî kap Pho-su lâng Kó͘-lia̍t chē-ūi ê sî, lóng tit-tio̍h heng-thong.