Sin-bēng-kì 第 4 章 - 巴克禮全羅

1

Í-sek-lia̍t ah, taⁿ góa só͘ kà-sī lín ê lu̍t-lē hoat-tō͘, lín tio̍h thiaⁿ lâi chun-thàn, thang hō͘ lín o̍ah-teh, jı̍p-khì lâi tit-tio̍h Iâ-hô-hoa lín ê lia̍t-chó͘ ê Siōng-tè só͘ siúⁿ-sù lín ê tōe.

2

Góa só͘ bēng-lēng lín ê ōe, lín m̄-thang ke-thiⁿ, iā m̄-thang kiám-chió i; thang hō͘ lín chip-siú Iâ-hô-hoa lín Siōng-tè ê bēng-lēng, chiū-sī góa só͘ bēng-lēng lín ê.

3

Iâ-hô-hoa in-ūi Pa-le̍k-pí-jíⁿ ê sū só͘ kiâⁿ ê, lín chhin-ba̍k khòaⁿ-kìⁿ; in-ūi kìⁿ-nā thàn Pa-le̍k-pí-jíⁿ ê lâng, Iâ-hô-hoa lí ê Siōng-tè lóng tùi lín tiong-kan tû-bia̍t in.

4

To̍k-to̍k lín kap Iâ-hô-hoa lín ê Siōng-tè kiat-liân ê, kin-á-jı̍t lóng o̍ah-teh.

5

Khòaⁿ ah, góa iā bat ēng lu̍t-lē kap hoat-tō͘ kà-sī lín, chiàu Iâ-hô-hoa góa ê Siōng-tè só͘ bēng-lēng góa ê, hō͘ lín chun-thàn tī lín só͘ beh jı̍p-khì sêng-chiap ê tōe.

6

Só͘-í lín tio̍h chip-siú lâi kiâⁿ-i; che chiū-sī lín ê tì-hūi chhang-miâ tī lia̍t-kok ê bīn-chêng; in chı̍t-ē thiaⁿ-kìⁿ che it-chhè ê lu̍t-lē, beh kóng, Chit ê tōa-kok chin-chiàⁿ sī ū tì-hūi chhang-miâ ê peh-sìⁿ.

7

Toh-lo̍h chı̍t ê tōa-kok ū siōng-tè kap i chhin-kūn, chhin-chhiūⁿ Iâ-hô-hoa lán ê Siōng-tè, tī lán kìⁿ-nā kiû-kiò I ê sî, kap lán chhin-kūn ah?

8

Koh ū sím-mı̍h tōa-kok ū lu̍t-lē kap hoat-tō͘ chhin-chhiūⁿ góa kin-á-jı̍t tī lín ê bīn-chêng só͘ thôan it-chhè ê lu̍t-hoat hiah-nih kong-gī ah?

9

Só͘-í tio̍h ka-kī kín-sīn, iā tio̍h kín-sīn siú lí ê sim, bián-tit lí bōe-kì-tit chhin-ba̍k só͘ khòaⁿ-kìⁿ ê sū; koh bián-tit chiah ê sū tī lí o̍ah-teh ê sî lī-khui lí ê sim; iā tio̍h ēng chit-ê kà-sī lín hiah ê kiáⁿ, hiah ê sun.

10

Lí tī Hô-lia̍t soaⁿ khiā tī Iâ-hô-hoa lí ê Siōng-tè ê bīn-chêng, hit-jı̍t Iâ-hô-hoa tùi góa kóng, Lí kā Góa chio-chı̍p peh-sìⁿ, Góa beh hō͘ in thiaⁿ-kìⁿ Góa ê ōe, hō͘ in o̍ah tī sè-kan ê jı̍t, thang ha̍k-sı̍p kèng-ùi Góa; koh thang kà-sī in ê kiáⁿ-jî.

11

Hit-sî lín kūn-óa, khiā tī soaⁿ-kha, soaⁿ-nı̍h ū hé-iām chhèng-kàu thiⁿ-téng, iā ū ba̍t-hûn o͘-o͘ àm-àm.

12

Iâ-hô-hoa tùi hé-iām-tiong kā lín kóng-ōe; lín thiaⁿ-kìⁿ kóng-ōe ê siaⁿ, bô khòaⁿ-kìⁿ sím-mı̍h siōng; chí-ū siaⁿ nā-tiāⁿ.

13

I chiong só͘ bēng-lēng lín tio̍h siú ê iok chí-sī lín, chiū-sī cha̍p-tiâu-kài; iā siá i tī nn̄g tè chio̍h-pi.

14

Hit-sî Iâ-hô-hoa koh bēng-lēng góa, chiong lu̍t-lē hoat-tō͘ kà-sī lín, hō͘ lín tī só͘ beh kè-khì lâi tit-tio̍h chòe-gia̍p ê tōe chun-thàn kiâⁿ i.

15

Só͘-í lín tio̍h te̍k-pia̍t ka-kī kín-sīn, in-ūi Iâ-hô-hoa tī Hô-lia̍t soaⁿ tùi hé-tiong kā lín kóng-ōe hit-jı̍t, lín bô khòaⁿ-kìⁿ sím-mı̍h hêng-siōng;

16

kiaⁿ-liáu lín pāi-hōai ka-kī, ūi ka-kī tiau-khek ngó͘-siōng, hóng sím-mı̍h hêng-chōng, bô-lūn sī lâm á-sī lú ê hêng-siōng;

17

á-sī tōe-chiūⁿ cháu-siù ê siōng;

18

á-sī khong-tiong pe-chiáu ê siōng; á-sī tōe-chiūⁿ teh sô ê mı̍h ê siōng; á-sī tōe-ē chúi-tiong hî-lūi ê siōng.

19

Koh kiaⁿ-liáu lí kia̍h-ba̍k ǹg-thiⁿ khòaⁿ Iâ-hô-hoa lí ê Siōng-tè só͘ hun-phài hō͘ thiⁿ-ē bān-kok ê jı̍t, ge̍h, chhiⁿ, chiū-sī thiⁿ-téng ê bān-siōng, lí chiū siū ín-iú, kèng-pài ho̍k-sāi in.

20

Chóng-sī Iâ-hô-hoa tòa lín chhut Ai-kı̍p, thoat-lī chù-thih ê lô͘, beh chòe I ka-kī sán-gia̍p ê peh-sìⁿ, chhin-chhiūⁿ kin-á-jı̍t ê khóan.

21

Iâ-hô-hoa koh in-ūi lín ê iân-kò͘ siū-khì góa, chiù-chōa m̄ hō͘ góa kè Iok-tàn hô, iā m̄ hō͘ góa jı̍p Iâ-hô-hoa lí Siōng-tè só͘ siúⁿ-sù lí chòe-gia̍p ê súi tōe;

22

góa tio̍h sí tī chit ê tōe; góa bōe-ōe kè Iok-tàn hô; chóng-sī lín beh kè-khì lâi tit-tio̍h hit ê hó ê tōe.

23

Lín tio̍h ka-kī kín-sīn, kiaⁿ-liáu lín bōe-kì-tit Iâ-hô-hoa lín ê Siōng-tè kap lín só͘ lı̍p ê iok, ūi ka-kī tiau-khek ngó͘-siōng hóng-hut sím-mı̍h mı̍h, chiū-sī Iâ-hô-hoa lí ê Siōng-tè só͘ kìm lí ê.

24

In-ūi Iâ-hô-hoa lí ê Siōng-tè chiū-sī lia̍t-lia̍t ê hé, koat-tòan m̄ iông-ún ū pa̍t ê siōng-tè.

25

Āu-lâi lín kú-kú khiā-khí tī hit ê tōe siⁿ-kiáⁿ thôan-sun, chiū tiau-khek ngó͘-siōng, hóng sím-mı̍h mı̍h ê siōng, phah-pháiⁿ lí ê sim-su̍t, kiâⁿ Iâ-hô-hoa lí ê Siōng-tè ba̍k-chiu-tiong khòaⁿ-chòe pháiⁿ ê sū, jiá I siū-khì;

26

góa chiū kin-a-jı̍t kiò thiⁿ kiò tōe lâi kan-chèng, lín beh tī kè Iok-tàn hô tit-tio̍h chòe-gia̍p ê tōe kín-kín bia̍t kàu chīn; lín ê jı̍t-chí bōe-ōe tī hit só͘-chāi tit-tio̍h kú-tn̂g, beh it-chīn tû-bia̍t.

27

Iâ-hô-hoa beh hō͘ lín sì-sòaⁿ tī lia̍t-pang; tī Iâ-hô-hoa só͘ chhōa lín kàu hiah ê kok, lín chhun ê lâng-gia̍h chió-chió.

28

Tī-hia lín beh ho̍k-sāi lâng ê chhiú só͘ chō ê siōng-tè, chiū-sī chhâ-ê, chio̍h-ê, bōe-ōe khòaⁿ-kìⁿ, bōe-ōe thiaⁿ, bōe-ōe chia̍h, bōe-ōe phīⁿ ê.

29

Chóng-sī lín tī-hia nā beh chhē Iâ-hô-hoa lí ê Siōng-tè, nā ēng chīn-sim chīn-sèng chhē I, chiū beh tú-tio̍h.

30

Jı̍t-āu lín tú-tio̍h khó͘-lān, só͘ kóng chiah ê sū lîm-kàu lí, lí beh kui-ǹg Iâ-hô-hoa, lí ê Siōng-tè, lâi thiaⁿ I ê siaⁿ;

31

in-ūi Iâ-hô-hoa lí ê Siōng-tè sī lîn-bín ê Siōng-tè, I bô beh pàng-sak lí, bô beh châu-bia̍t lí, iā bô bōe-kì-tit I kap lí ê lia̍t-chó͘ só͘ chiù-chōa ê iok.

32

Chhì-mn̄g kè-sin ê sî, chiū-sī lí í-chêng ê sî, tùi Siōng-tè chhòng-chō lâng tī sè-kan hit-jı̍t í-lâi, tùi thiⁿ ê chit-piⁿ kàu thiⁿ ê hit-piⁿ, ū chhin-chhiūⁿ hit-hō ê tōa-sū mah? Bat thiaⁿ-kìⁿ ū án-ni mah?

33

Bat ū sím-mı̍h peh-sìⁿ thiaⁿ-kìⁿ Siōng-tè tùi hé-tiong kóng-ōe ê siaⁿ, chhin-chhiūⁿ lí thiaⁿ-kìⁿ, iā iáu ōe o̍ah-teh mah?

34

Á-sī bat ū sím-mı̍h siōng-tè chhì án-ni chòe, ēng chhì-liān, sîn-jiah, kî-sū, kau-chiàn, tōa kôan-lêng ê chhiú, chhun-chhut ê chhiú-kut, kap tōa thang kiaⁿ ê sū, ūi ka-kī tùi pa̍t-kok tiong chhú chı̍t-kok, chhin-chhiūⁿ Iâ-hô-hoa lín ê Siōng-tè tī Ai-kı̍p tī lín ê ba̍k-chiu chêng, ūi lín só͘ kiâⁿ it-chhè ê sū ah?

35

Ēng che hián-hiān tī lí, hō͘ lí chai Iâ-hô-hoa I sī Siōng-tè, I í-gōa bô ū pa̍t-ê.

36

I tùi thiⁿ hō͘ lí thiaⁿ-kìⁿ I ê siaⁿ, ūi-tio̍h beh kà-sī lí, koh tī tōe-bīn-chiūⁿ hō͘ lí khòaⁿ-kìⁿ I ê tōa-hé, koh lí thiaⁿ-kìⁿ I ê ōe tùi hé-tiong chhut.

37

In-ūi I thiàⁿ lí ê lia̍t-chó͘, só͘-í kéng-sóan in ê hō͘-è, ēng tōa kôan-lêng chhin-sin tòa lí chhut Ai-kı̍p;

38

beh tùi lí ê bīn-chêng kóaⁿ-chhut pí lí khah-tōa khah-béng ê kok-bîn, beh chhōa lí jı̍p-khì, ēng in ê tōe siúⁿ-sù lín chòe-gia̍p, chhin-chhiūⁿ kin-á-jı̍t chı̍t-iūⁿ.

39

Só͘-í kin-á-jı̍t lí tio̍h chai, sim iā tio̍h siūⁿ, thiⁿ-téng tōe-ē chí-ū Iâ-hô-hoa, I sī Siōng-tè, í-gōa bô pa̍t-ê.

40

Só͘-í lí tio̍h siú I ê lu̍t-lē kài-bēng, chiū-sī góa kin-á-jı̍t só͘ bēng-lēng lí, hō͘ lí kap lí ê hō͘-è thang tit-tio̍h hok-khì, koh ke-thiⁿ lí ê jı̍t-chí kú-tn̂g tī Iâ-hô-hoa lí ê Siōng-tè só͘ siúⁿ-sù lí ê tōe kàu éng-óan.

41

Hit-sî Mô͘-se tī Iok-tàn gōa, ǹg jı̍t-chhut ê só͘-chāi hun-piat saⁿ ê siâⁿ;

42

hō͘ thâi-sí lâng ê lâng, chiū-sī pêng-sò͘ bô kiat-òan, chhò-gō͘ thâi-sí i ê chhù-piⁿ ê, thang tô-cháu tī-hia; í-keng cháu-jı̍p chiah ê siâⁿ ê chı̍t-ê, chiū tit-tio̍h o̍ah;

43

chiū-sī khòng-iá pîⁿ-iûⁿ ê Pí-sek, ūi-tio̍h Liû-piān lâng siat-ê; Ki-lia̍t ê Lah-bo̍at, ūi-tio̍h Ka-tek lâng siat-ê; Pa-san ê Ko-lân, ūi-tio̍h Má-ná-se lâng siat-ê.

44

Chit-ê sī Mô͘-se tī Í-sek-lia̍t lâng ê bīn-chêng só͘ pâi-lia̍t ê lu̍t-hoat;

45

chiah-ê sī Mô͘-se tī Í-sek-lia̍t lâng chhut Ai-kı̍p liáu-āu, só͘ thôan hō͘ in ê chèng-kù, lu̍t-lē, hoat-tō͘.

46

Tī Iok-tàn hô-gōa, Pek-pí-jíⁿ tùi-bīn ê soaⁿ-kok-tiong, tī Hi-sı̍t-pún khiā-khí A-mô͘-lī ông Se-hông ê tōe, chiū-sī Mô͘-se kap Í-sek-lia̍t lâng chhut Ai-kı̍p liáu-āu só͘ phah-ê.

47

In tit-tio̍h i ê tōe, kap Pa-san ông Go̍k ê tōe, chiū-sī nn̄g ê A-mô͘-lī ông, tī Iok-tàn gōa, ǹg jı̍t-chhut ê só͘-chāi;

48

tùi A-lùn soaⁿ-kok piⁿ ê A-lô-jíⁿ, tı̍t-kàu Se-hûn soaⁿ, chiū-sī Hek-bûn soaⁿ;

49

í-kı̍p Iok-tàn gōa, tang-sì A-la̍h-pa ê chôan-tōe, tı̍t-kàu A-la̍h-pa ê hái, óa-kūn Pí-su-ka ê soaⁿ-kha.