Sin-bēng-kì 第 5 章 - 巴克禮全羅

1

Mô͘-se kiò Í-sek-lia̍t chèng-lâng, tùi in kóng, Í-sek-lia̍t ah, lín tio̍h thiaⁿ góa kin-á-jı̍t só͘ thôan hō͘ lín thiaⁿ ê lu̍t-lē hoat-tō͘, hō͘ lín thang ha̍k-sı̍p i, chip-siú lâi kiâⁿ in.

2

Iâ-hô-hoa lán ê Siōng-tè tī Hô-lia̍t kap lán lı̍p-iok.

3

Iâ-hô-hoa bô kap lán ê lia̍t-chó͘ lı̍p chit ê iok, sī kap lán chiah-ê, chiū-sī kap lán kin-á-jı̍t it-chhè o̍ah tī-chia ê lâng lı̍p-ê.

4

Iâ-hô-hoa tī soaⁿ-téng, tùi hé-tiong bīn-tùi-bīn, kap lín kóng-ōe.

5

(Hit-sî góa khiā tī Iâ-hô-hoa kap lín ê tiong-kan, beh chiong Iâ-hô-hoa ê ōe thôan hō͘ lín, in-ūi lín ūi-tio̍h hit ê hé lâi kiaⁿ, bô chiūⁿ soaⁿ.)

6

Chú kóng, Góa sī Iâ-hô-hoa lí ê Siōng-tè, bat chhōa lí tùi Ai-kı̍p tōe, tùi chòe lô͘-châi ê ke chhut-lâi ê.

7

Góa í-gōa lí m̄-thang ū pa̍t ê siōng-tè.

8

M̄-thang ūi ka-kī tiau-khek ngó͘-siōng, put-lūn thiⁿ-téng, tōe-ē, kap tōe-ē chúi-lāi só͘-ū ê mı̍h, lóng m̄-thang chng in ê siōng;

9

m̄-thang kūi-pài in, iā m̄-thang ho̍k-sāi in; in-ūi Góa Iâ-hô-hoa lí ê Siōng-tè, tòan-tòan m̄ iông-ún ēng pa̍t ê siōng-tè phit-phòe Góa; òan-hūn Góa ê, Góa kui-kiū i ê chōe, tùi pē kàu kiáⁿ, kàu saⁿ-sì tāi;

10

thiàⁿ Góa, siú Góa kài-bēng ê, Góa si-un hō͘ i, tı̍t-kàu chheng-tāi.

11

M̄-thang lām-sám chheng Iâ-hô-hoa lí Siōng-tè ê miâ; in-ūi lām-sám chheng I ê miâ ê, Iâ-hô-hoa tek-khak bô lia̍h i chòe bô-chōe.

12

Tio̍h siú an-hioh-jı̍t, lia̍h i chòe-sèng, chiàu Iâ-hô-hoa lí ê Siōng-tè só͘ bēng-lēng lí ê;

13

la̍k-jı̍t-lāi tio̍h tio̍h-bôa chòe lí it-chhè ê kang;

14

to̍k-to̍k tē-chhit jı̍t, chiū-sī ǹg Iâ-hô-hoa lí ê Siōng-tè lâi siú ê an-hioh, chit-jı̍t, lí kap lí ê kiáⁿ, cha-bó͘-kiáⁿ, lô͘-po̍k, lú-pī, gû, lû, cheng-siⁿ, í-kı̍p tiàm tī lí tiong-kan ê chhut-gōa lâng, it-chhè ê kang lóng m̄-thang chòe; hō͘ lí ê lô͘-po̍k, lú-pī, thang chhin-chhiūⁿ lí an-hioh.

15

Lí iā tio̍h kì-tit lí chêng tī Ai-kı̍p tōe chòe lô͘-po̍k, Iâ-hô-hoa lí ê Siōng-tè ēng tōa kôan-lêng ê chhiú, chhun-chhut-lâi ê chhiú-kut, chhōa lí tùi hia chhut-lâi; in-ūi án-ni, Iâ-hô-hoa lí ê Siōng-tè bēng-lēng lí siú an-hioh-jı̍t.

16

Tio̍h hàu-kèng lí ê lāu-pē, lí ê lāu-bú, chiàu Iâ-hô-hoa lí ê Siōng-tè só͘ bēng-lēng lí ê, hō͘ lí tī Iâ-hô-hoa lí ê Siōng-tè só͘ siúⁿ-sù lí ê tōe-hng, jı̍t-chí kú-tn̂g, lâi hióng-siū hok-khì.

17

M̄-thang thâi-sí lâng.

18

Iā m̄-thang kiâⁿ kan-îm.

19

Iā m̄-thang thau-the̍h.

20

Iā m̄-thang chòe ké ê kan-chèng, hām-hāi lí ê chhù-piⁿ.

21

Iā m̄-thang tham lí ê chhù-piⁿ ê bó͘, iā m̄-thang tham lí ê chhù-piⁿ ê chhù, kap i ê chhân-hn̂g, i ê lô͘-po̍k, i ê lú-pī, i ê gû, i ê lû, kap lí ê chhù-piⁿ it-chhè só͘ ū ê.

22

Chiah ê ōe sī Iâ-hô-hoa tī soaⁿ-téng, tùi hé-tiong hûn-tiong o͘-àm-tiong, tōa-siaⁿ hoan-hù lín chôan-hōe ê; iā bô koh ke-thiⁿ. I iā siá in tī nn̄g tè chio̍h-pi, kau-tài góa.

23

Hit-tia̍p hé-iām sio tī soaⁿ-nı̍h, lín thiaⁿ-kìⁿ hit ê tùi o͘-àm-tiong chhut-lâi ê siaⁿ, lín ê chi-phài lóng-chóng ê siú-léng, kap lín ê tiúⁿ-ló lâi chiū-kūn góa.

24

Lín kóng, Khòaⁿ ah, Iâ-hô-hoa lán ê Siōng-tè hián-bêng I ê êng-kng, kap I ê chì-tōa, hō͘ góan khòaⁿ; góan koh thiaⁿ-kìⁿ I ê siaⁿ-im tùi hé-tiong chhut; kin-á-jı̍t góan iā chai Siōng-tè kap lâng kóng-ōe, lâng iáu ōe o̍ah.

25

Taⁿ góan mih-sái tio̍h sí ah? In-ūi chit ê tōa-hé beh sio-bia̍t góan; góan nā koh thiaⁿ-kìⁿ Iâ-hô-hoa lán Siōng-tè ê siaⁿ, chiū ōe sí.

26

In-ūi kìⁿ-ū jio̍k-thé ê, chī-chūi chhin-chhiūⁿ góan thiaⁿ-kìⁿ éng-o̍ah Siōng-tè tùi hé-tiong kóng-ōe ê siaⁿ, iáu ōe o̍ah-teh ah?

27

Lí tio̍h chìn-chêng khì, thiaⁿ Iâ-hô-hoa lán ê Siōng-tè só͘ beh kóng it-chhè ê ōe; chiong Iâ-hô-hoa só͘ tùi lí kóng it-chhè ê ōe, lí tio̍h tùi góan kóng; góan beh thiaⁿ iā beh kiâⁿ i.

28

Lín tùi góa kóng-ōe, Iâ-hô-hoa thiaⁿ-kìⁿ lín kóng-ōe ê siaⁿ, Iâ-hô-hoa tùi góa kóng, Góa ū thiaⁿ-kìⁿ chit ê peh-sìⁿ kóng-ōe ê siaⁿ, chiū-sī in só͘ tùi lí kóng ê; in só͘ kóng ê ōe lóng hó.

29

Gōan in chûn chit-hō sim, lâi kèng-ùi Góa, siông-siông siú Góa it-chhè ê kài-bēng, hō͘ in kap in ê kiáⁿ-sun éng-óan tit-tio̍h hok-khì.

30

Lí khì kā in kóng, Lín chòe lín tò-khì lín ê pò͘-pîⁿ.

31

Lūn-kàu lí, lí tio̍h khiā tī Góa chia, Góa beh chiong lí só͘ tio̍h kà-sī in it-chhè kài-bēng, lu̍t-lē, hoat-tō͘, kā lí kóng, hō͘ in tī Góa só͘ siúⁿ-sù in chòe-gia̍p ê tōe kiâⁿ i.

32

Só͘-í lín tio̍h chiàu Iâ-hô-hoa lín ê Siōng-tè só͘ bēng-lēng lín ê, tio̍h chip-siú lâi kiâⁿ i; m̄-thang phian tī chó, phian tī iū.

33

Iâ-hô-hoa lín ê Siōng-tè só͘ bēng-lēng lín ê lō͘, lín lóng tio̍h kiâⁿ i, hō͘ lín o̍ah-teh, tit-tio̍h hok-khì; iā hō͘ lín ê jı̍t-chí, tī lín só͘ beh sêng-chiap ê tōe, tit-tio̍h kú-tn̂g.