Thôan-tō 第 1 章 - 巴克禮全羅

1

Tī Iâ-lō͘-sat-léng chòe-ông, Tāi-pı̍t ê kiáⁿ, Thôan-tō ê ōe.

2

Thôan-tō--ê kóng, Khang-hu ê khang-hu; khang-hu ê khang-hu; hōan-sū lóng sī khang-hu.

3

Lâng it-chhè ê tio̍h-bôa, chiū-sī i tī jı̍t-kng ê ē-bīn só͘ tio̍h-bôa-ê ū sím-mı̍h lī-ek ah?

4

Chı̍t-tāi kè-khì, koh chı̍t-tāi lâi, chóng-sī tōe iû-gôan tī-teh.

5

Jı̍t-chhut, jı̍t-lo̍h, kín-kín cháu tò-tńg i só͘ chhut-lâi ê só͘-chāi.

6

Hong chhe ǹg lâm, koh tò-tńg ǹg pak, tńg-se̍h bô soah, iā tò-tńg tī i tńg-se̍h ê khôan.

7

Kang-hô lóng lâu-lo̍h hái, chóng-sī hái iā bô móa; kang-hô lâu kàu toh-lo̍h, chiū koh lâu kàu hia.

8

Bān-sū lô-khó͘ kàu-ke̍k, lâng kóng bōe chīn; ba̍k-chiu khòaⁿ, khòaⁿ bōe pá, hī-khang thiaⁿ, thiaⁿ bōe tīⁿ.

9

Só͘ beh ū ê, sī chêng í-keng ū, só͘ beh chòe--ê sī chêng í-keng chòe; tī jı̍t-kng ê ē-bīn bô ū sin ê sū.

10

Kiám ū sím-mı̍h sū, lâng thang kí i kóng, Lí khòaⁿ chit-ê sī sin ê? Tī lán í-chêng ê sè-tāi, chá-chá í-keng ū lah.

11

Í-keng kè ê sè-tāi, bô lâng kì-tit; chiong-lâi ê sè-tāi, āu-lâi ê lâng iā bōe-kì-tit.

12

Góa Thôan-tō--ê, bat tī Iâ-lō͘-sat-léng chòe Í-sek-lia̍t ông.

13

Góa choan-sim ēng tì-hūi gián-kiù chhâ-khó thiⁿ-ē só͘ chòe it-chhè ê sū, chiū chai Siōng-tè só͘ hō͘ lâng tio̍h-bôa--ê sī khó͘-thàng ê tio̍h-bôa.

14

Góa khòaⁿ-kìⁿ jı̍t-kng ê ē-bīn só͘ chòe it-chhè ê sū; khòaⁿ ah, lóng sī khang-hu, lóng sī lia̍h-hong.

15

Oan-khiau--ê bōe-ōe hō͘ i tı̍t, khoat-hām--ê bōe-ōe sǹg--tit.

16

Góa ê sim-lāi siūⁿ kóng, Khòaⁿ ah, góa tit-tio̍h tōa tì-hūi, iâⁿ-kè góa í-chêng it-chhè tī Iâ-lō͘-sat-léng ê lâng; koh góa sim le̍k-kè chōe-chōe tì-sek kap chai-bat.

17

Góa choan-sim tì-ì ài chai tì-hūi, ài chai tian-kông kap gû-gōng, chiū chai che iā-sī lia̍h-hong.

18

In-ūi chōe-chōe tì-hūi chiū chōe-chōe hôan-ló, ke-thiⁿ chai-bat chiū ke-thiⁿ iu-siong.