Thôan-tō 第 12 章 - 巴克禮全羅

1

Lí tio̍h tī siàu-liân ê jı̍t, kì-liām chhòng-chō lí ê Chú, chiū-sī hōan-lān ê jı̍t iáu-bē kàu, iā lí só͘ kóng, Góa bô thang tī i khòai-lo̍k, hiah ê nî iáu-bē kūn ê sî.

2

tī jı̍t kap kng kap ge̍h kap chhiⁿ bē piàn-chòe o͘-àm, í-kı̍p hō͘ kè-sin, hûn bē koh lâi ê tāi-seng.

3

Tng hit-jı̍t, kò͘-chhù--ê ngia̍uh-ngia̍uh-chhoah; ū la̍t ê lâng so͘-io, oe-bō--ê, in-ūi in chió, chiū soah; tùi thang-á khòaⁿ--chhut-khì--ê lóng o͘-àm;

4

thàng koe-lō͘ ê mn̂g koaiⁿ--teh, oe-bō ê siaⁿ sòe-sòe; chiáu-á chı̍t-ē háu, lâng chiū khí-lâi; chhiùⁿ-koa ê cha-bó͘-gín-ná iā lóng kàng-kē;

5

kìⁿ-tio̍h kôaiⁿ chiū kiaⁿ, tī lō͘-tiong iā ū só͘ kiaⁿ-ùi; hēng-chhiū khui hoe, chháu-meh chòe tāng-tàⁿ, io̍k-sim lóng bô--khì; in-ūi lâng kui tī i éng-óan ê chhù, ai-khàu ê lâng óng-lâi tī koe-lō͘;

6

tng gûn-liān-á bē tn̄g, kim-óaⁿ bē phòa, tī chúi-chôaⁿ-piⁿ ê chúi-pân bē sún-hōai, ka-lak bē pháiⁿ tī chíⁿ-téng;

7

tîn-ai kui thô͘ lâi hóan-pún, lêng-hûn kui tī hō͘ i lâi ê Siōng-tè ê tāi-seng, tio̍h kì-liām chhòng-chō lí ê Chú.

8

Thôan-tō--ê kóng, Khang-hu ê khang-hu, hôan-sū lóng sī khang-hu.

9

Koh in-ūi Thôan-tō--ê ū tì-hūi, i iû-gôan kà-sī peh-sìⁿ chai-bat; iā chēng-chēng siūⁿ, chhâ-khó, koh chiàu chhù-sū pâi-lia̍t chōe-chōe chim-giân.

10

Thôan-tō--ê choan-sim chhē thang hoaⁿ-hí ê ōe, sī chiàu chèng-tı̍t siá ê sêng-sı̍t ōe.

11

Tì-hūi ê lâng ê ōe chhin-chhiūⁿ chhì; hōe-tiúⁿ ê ōe chhin-chhiūⁿ tèng-tiâu ê teng, lóng sī tùi chı̍t ê bo̍k-chiá só͘ sù ê.

12

Góa ê kiáⁿ ah, iáu ū chı̍t-chân, lí tio̍h siū khòan-kài; tù chheh chōe, bô kiông-chīn; tha̍k-chheh chōe, seng-khu ōe ià-siān.

13

Chiah ê sū lóng í-keng thiaⁿ-liáu lah; kiat-bé chiū-sī kèng-ùi Siōng-tè, kín-sīn siú I ê kài-bēng; che chiū-sī lâng chiâu-pī ê pún-hūn.

14

In-ūi kìⁿ só͘-chòe-ê kap it-chhè ún-ba̍t ê sū, bô-lūn sī hó sī pháiⁿ, Siōng-tè lóng beh sím-phòaⁿ.