Ngá-ko 第 1 章 - 巴克禮全羅

1

Só͘-lô-bûn si-koa-tiong ê Ngá-ko.

2

Gōan i ēng i ê chhùi lâi chim góa, In-ūi lí ê ài-chêng pí chiú khah-hó.

3

Lí ê ko-iû phang koh hó; Lí ê miâ chhin-chhiūⁿ tò--chhut-lâi ê ko-iû; Só͘-í chèng cha-bó͘-gín-ná lóng thiàⁿ lí.

4

Gōan lí khan góa, góan chiū cháu lâi tè lí; Ông chhōa góa jı̍p i ê pâng-lāi; Góan beh in-ūi lí lâi hoaⁿ-hí khòai-lo̍k, Góan beh kì-liām lí ê ài-chêng, iâⁿ-kè hó chiú; In thiàⁿ lí sī eng-kai ê.

5

Iâ-lō͘-sat-léng ê chèng cha-bó͘-gín-ná ah, Góa sī o͘, iáu-kú siⁿ-chòe hó, Chhin-chhiūⁿ Ki-ta̍t ê pò͘-pîⁿ, Chhin-chhiūⁿ Só͘-lô-bûn ê tiùⁿ-lî.

6

M̄-thang khòaⁿ góa lî-á o͘-sek, Sī in-ūi jı̍t pha̍k góa, Góa ê lāu-bú chiah ê kiáⁿ bat siū-khì góa, In hō͘ góa kò͘-siú phû-tô-hn̂g; Chóng-sī góa ka-kī ê phû-tô-hn̂g, góa bô kò͘-siú.

7

Góa sim só͘-thiàⁿ--ê ah, kiû lí kā góa kóng, Lí tī sím-mı̍h só͘-chāi chhī iûⁿ, jı̍t-tiong-tàu hō͘ in hioh tī sím-mı̍h só͘-chāi; Tī lí tâng-phōaⁿ ê iûⁿ-kûn ê piⁿ-á, Góa siáⁿ-sū chhin-chhiūⁿ tà-bīn ê lâng ah?

8

Lú-kài-tiong tē-it súi--ê ah, lí nā m̄-chai, Chòe lí chhut-khì, tè iûⁿ-kûn ê kha-jiah khì; Chhī lí ê soaⁿ-iûⁿ-á, tī bo̍k-chiá ê pò͘-pîⁿ-piⁿ.

9

Góa só͘ thiàⁿ--ê, góa pí-phēng lí, Chhin-chhiūⁿ Hoat-ló ê chhia ê bé.

10

Lí pìn-piⁿ ê mn̂g pīⁿ chin-súi, Lí ê ām-kún kòa chin-chu ê liān-á, chin hó-khòaⁿ.

11

Góan beh kā lí chòe kim-liān-á, Siuⁿ gûn liú-á.

12

Ông chē i ê toh ê sî, Góa ná-ta̍t ê hiuⁿ-iû chhèng-chhut i ê phang-bī.

13

Góa só͘ lôan-ài-ê sī chòe góa chı̍t-pau ê bu̍t-io̍h, Tòa tī góa ê heng-chêng.

14

Góa só͘ lôan-ài-ê, sī chòe góa chı̍t-pha ê chńg-kah-hoe, Tī Ún-kî-tí ê phû-tô-hn̂g-lāi.

15

Góa só͘ thiàⁿ-ê, khòaⁿ ah, lí chin súi; khòaⁿ ah, lí chin súi; Lí ê ba̍k-chiu chhin-chhiūⁿ kap.

16

Góa só͘ lôan-ài-ê ah, khòaⁿ ah, lí chin súi, sı̍t-chāi thang hoaⁿ-hí; Lán ê bîn-chhn̂g lóng sī chhiⁿ-le̍k ê sek.

17

Lán ê chhù ê îⁿ-á sī pek-hiuⁿ-chhâ, I ê ka̍k(**kak)-á sī siông-peh-chhâ.