Ngá-ko 第 2 章 - 巴克禮全羅

1

Góa sī Sa-lûn ê mûi-khùi-hoe, Sī soaⁿ-kok tiong ê pek-ha̍p-hoe.

2

Góa só͘ thiàⁿ-ê tī chiah ê cha-bó͘-kiáⁿ ê tiong-kan, Chhin-chhiūⁿ chhì-á-lāi ê pek-ha̍p-hoe.

3

Góa só͘ lôan-ái-ê, tī chiah ê ta-po͘-kiáⁿ ê tiong-kan, Chhin-chhiūⁿ chhiū-nâ-tiong ê pîn-kó chhiū; Góa chin hoaⁿ-hí chē tī i ê ìm-ńg; I ê ké-chí góa chia̍h-liáu chin tiⁿ.

4

I chhōa góa jı̍p iân-sia̍h ê só͘-chāi, Ēng thiàⁿ chòe kî tī góa ê téng-bīn.

5

Kiû lín ēng phû-tô-piáⁿ lâi pó͘ góa ê la̍t, ēng pîn-kó lâi ióng góa cheng-sîn; In-ūi góa tùi ài-chêng lâi tì-pīⁿ.

6

I ê tò-chhiú phô͘ góa ê thâu-khak, I ê chiàⁿ-chhiú phō góa.

7

Iâ-lō͘-sat-léng ê chèng cha-bó͘-gín-ná ah, Góa kí lêng-iông í-kı̍p tiân-iá ê lo̍k-bú, chhiat-chhiat hoan-hù lí, Bo̍h-tit phah-chhíⁿ i, bo̍h-tit kiáu-jiáu góa só͘-thiàⁿ-ê, Thèng-hāu i ka-kī chêng-gōan.

8

Ā, góa só͘ lôan-ài--ê ê siaⁿ khòaⁿ ah, i lâi lah; Tiô tī soaⁿ--nih, thiàu tī niá--nih.

9

Góa só͘ lôan-ài-ê, chhin-chhiūⁿ lêng-iông á-sī lo̍k-á; Khòaⁿ ah, i khiā tī góan ê chhiûⁿ-piah-āu; Tùi thang-á teh khòaⁿ; Tùi thang-á-chí teh thàm.

10

Góa só͘ lôan-ài-ê chhut-siaⁿ tùi góa kóng, Góa só͘-thiàⁿ-ê, góa ê bí-jîn, khí-lâi kap góa saⁿ-kap khì.

11

Khòaⁿ ah, in-ūi tang-thiⁿ í-keng kè, Hō͘ í-keng chîⁿ, soah lah.

12

Piàn-tōe ê hoe í-keng khui, Chiáu-á háu ê sî kàu lah; Tī lán ê kéng-lāi thiaⁿ-kìⁿ ka-chui ê siaⁿ.

13

Bû-hoa-kó chhiū ê ké-chí chiām-chiām sêng-se̍k, Phû-tô-chhiū khui-hoe thò͘-chhut i ê phang; Góa só͘-thiàⁿ-ê, góa ê bí-jîn, khí-lâi kap góa saⁿ-kap khì.

14

Góa ê kap ah, lí tī chio̍h-phāng-lāi, tī soaⁿ-gâm ún-ba̍t ê só͘-chāi; Kiû lí chún góa khòaⁿ-kìⁿ lí ê bīn, thiaⁿ-kìⁿ lí ê siaⁿ; In-ūi lí ê siaⁿ un-hô, lí ê bīn siⁿ-chòe súi.

15

Tio̍h kā góan lia̍h hô͘-lî, sòe chiah hô͘-lî, chiū-sī pāi-hōai phû-tô-hn̂g ê; In-ūi góan ê phû-tô tú-á beh khui-hoe.

16

Góa só͘ lôan-ài-ê sio̍k góa, góa iā sio̍k i, I tī pek-ha̍p-hoe tiong chhī i ê iûⁿ-kûn.

17

Góa só͘ lôan-ài-ê ah, gōan lí jı̍t liâng-léng, iáⁿ chhun-tn̂g ê sî, tò-tńg lâi. Chhin-chhiūⁿ lêng-iông á-sī lo̍k-á, Tī Pek-te̍k ê soaⁿ--nih.