Thôan-tō 第 6 章 - 巴克禮全羅

1

Góa khòaⁿ-kìⁿ jı̍t-kng ê ē-bīn ū chı̍t-hāng chai-ē, tāng-tāng teh lâng ê.

2

Chiū-sī ū lâng tit-tio̍h Siōng-tè siúⁿ-sù i chîⁿ-châi, hó-gia̍h, chun-kùi, tì-kàu i ê sim só͘ ài ê bô khiàm chı̍t-hāng; chóng-sī Siōng-tè bô hō͘ i ōe chia̍h--i, hóan-tńg hō͘ gōa-lâng lâi chia̍h--i; che iā sī khang-hu, iā sī tōa pē-pēng.

3

Lâng siat-sú siⁿ chı̍t-pah ê kiáⁿ, koh chia̍h tn̂g hè-siū, le̍k-kè chōe-chōe nî, i ê sim bô tit-tio̍h hióng-hok lâi móa-chiok, koh bô tit-tio̍h bâi-chòng; chiàu góa kóng, hit ê bô kàu-kî lâi tūi-lo̍h ê thai pí i khah-hó.

4

In-ūi i tī khang-hu lâi, tī o͘-àm khì, i ê miâ siū o͘-àm khàm-ba̍t.

5

Koh i bô khòaⁿ-kìⁿ jı̍t-thâu, iā lóng bô ti-kak, chit-ê pí hit-ê khah pêng-an.

6

Hit-lâng sui-jiân o̍ah kàu chı̍t-chheng nî, koh chı̍t-chheng nî, chóng-sī bô hióng-hok; chèng-lâng kiám m̄-sī lóng kui chı̍t só͘-chāi khì mah?

7

Lâng ê lô-lo̍k lóng sī ūi-tio̍h khó͘-hok, sim iā bô ti-chiok.

8

Tì-hūi ê lâng pí gû-gōng ê lâng ū sím-mı̍h khah-iâⁿ ah? sòng-hiong ê lâng tī chèng-lâng ê bīn-chêng chai só͘ thang kiâⁿ ê, ū sím-mı̍h khah-iâⁿ ah?

9

Ba̍k-chiu só͘ khòaⁿ-ê iâⁿ-kè sim-lāi ê hòan-hòan siūⁿ; che iā sī khang-hu, iā sī lia̍h-hong.

10

Chêng só͘ ū ê, í-keng kú-kú hō i ê miâ, chai i sī lâng, i iā bōe-ōe kap hit-ê pí i khah ū la̍t--ê lâi saⁿ-chiⁿ.

11

Í-keng ū chōe-chōe sū ke-thiⁿ khang-hu, tùi tī lâng ū sím-mı̍h lī-ek ah?

12

Lâng it-seng hu-tō͘ kong-im, chhin-chhiūⁿ iáⁿ kè--khì, chī-chūi ōe chai sím-mı̍h sū chòe lâng siⁿ-chêng ê lī-ek ah? in-ūi chī-chūi ōe kā lâng kóng i kè-sì liáu-āu, tī jı̍t-kng ê ē-bīn beh ū sím-mı̍h sū ah?