Thôan-tō 第 7 章 - 巴克禮全羅

1

Miâ-siaⁿ pí hó ê ko-iû khah-hó; lâng sí ê jı̍t pí chhut-sì ê jı̍t khah-hó.

2

Khì song-sū ê ke pí khì iàn-lo̍k ê ke khah-hó; in-ūi che sī chèng-lâng ê kiat-kio̍k, o̍ah ê lâng iā beh chiong che sū hē tī sim--nih.

3

Iu-būn pí chhiò khah-hó; in-ūi bīn tài-iu-iông, sī hō͘ sim khòai-lo̍k.

4

Tì-hūi ê lâng ê sim tī song-sū ê ke; gû-gōng ê lâng ê sim tī khòai-lo̍k ê ke.

5

Thiaⁿ tì-hūi ê lâng ê chek-pī, pí thiaⁿ gû-gōng lâng ê chhiùⁿ-khek khah-hó.

6

Gōng-lâng ê chhiò chhin-chhiūⁿ tiáⁿ-ē sio chhì-á ê siaⁿ; che iā sī khang-hu.

7

le̍k-sek ōe hō͘ tì-hūi ê lâng piàn-chòe gōng; pò͘-lō͘ ōe pāi-hōai lâng ê sim-su̍t.

8

Tāi-chì ê kiat-kio̍k iâⁿ-kè tāi-chì ê khí-thâu; sim thun-lún iâⁿ-kè sim kiau-ngō͘.

9

Lí ê sim bo̍h-tit sò-kip lâi siū-khì; in-ūi siū-khì chûn tī gōng-lâng ê sim-hôai.

10

Lí m̄-thang kóng, Àn-cháiⁿ-iūⁿ chêng ê jı̍t iâⁿ-kè hiān-kim ê jı̍t? in-ūi lí án-ni mn̄g m̄-sī chhut tī tì-hūi.

11

Tì-hūi kap sán-gia̍p pîⁿ-pîⁿ hó; tùi-tī khòaⁿ-kìⁿ jı̍t-kng ê lâng, koh khah ū lī-ek.

12

In-ūi tì-hūi ōe tì-ìm lâng, chîⁿ-gûn iā ōe tì-ìm lâng; to̍k-to̍k tì-hūi ōe pó-chôan i pún-lâng ê o̍ah-miā; che chiū-sī chai-bat te̍k-sek ê lī-ek.

13

Lí tio̍h siūⁿ Siōng-tè só͘ chòe, in-ūi I hō͘ i oan--ê, chī-chūi ōe hō͘ i tı̍t?

14

Heng-thong ê jı̍t, lí tio̍h hoaⁿ-hí, tú-tio̍h hōan-lān ê jı̍t, lí tio̍h siūⁿ; in-ūi Siōng-tè hō͘ nn̄g-hāng pîⁿ-pîⁿ pâi-teh, ūi-tio̍h beh hō͘ lâng chhâ-bōe-chhut sin-āu ū sím-mı̍h sū.

15

Ū gī-lâng kiâⁿ-gī, hóan-tńg bia̍t-bô, ū pháiⁿ-lâng kiâⁿ pháiⁿ, hóan-tńg chia̍h tn̂g hè-siū; góa tī khang-hu ê jı̍t lóng ū khòaⁿ-kìⁿ.

16

Bo̍h-tit kiâⁿ-gī siuⁿ-chōe, bo̍h-tit tì-hūi kè-thâu; siáⁿ-sū pāi-hōai ka-kī ah?

17

Bo̍h-tit kiâⁿ-pháiⁿ siuⁿ-chōe, iā bo̍h-tit chòe gōng-lâng; siáⁿ-sū bē kàu-kî lâi sí ah?

18

Lí chhî-siú chit-ê sī hó, hit-ê iā m̄-thang pàng chhiú; in-ūi kèng-ùi Siōng-tè ê lâng beh thoat-lī che it-chhè ê sū.

19

Tì-hūi hō͘ tì-hūi ê lâng ū lêng-le̍k, iâⁿ-kè siâⁿ-lāi cha̍p ê chiáng-kôan-ê.

20

Kiâⁿ-hó bô hōan-chōe ê gī-lâng, sè-chiūⁿ sı̍t-chāi bô.

21

Lâng só͘ kóng ê ōe, m̄-thang lóng-chóng hē tī sim--nih, kiaⁿ-liáu thiaⁿ-kìⁿ lí ê lô͘-po̍k chiù-chó͘ lí.

22

In-ūi lí ê sim ka-kī chai, lí iā bat chōe-chōe pái chiù-chó͘ pa̍t-lâng.

23

Góa bat ēng tì-hūi chhì-giām che it-chhè ê sū; góa kóng, Góa beh chòe tì-hūi-ê; chóng-sī che lī-khui góa hn̄g-hn̄g.

24

Só͘-ū-ê sī hn̄g koh chhim-chhim; chī-chūi ōe chhek-to̍k ah?

25

Góa o̍at-tńg siūⁿ góa choan-sim ài chai, ài chhâ-khó, iā chhē tì-hūi kap bān-sū ê lí-iû; koh ài chai siâ-ok sī gû-gōng, gû-chhún sī tian-kông.

26

Góa koh chhâ-chhut chı̍t-hāng pí sí khah-khó͘; chiū-sī chı̍t téng-hō ê hū-jîn-lâng, i ê sim sī o̍ah-tauh kap lô-bāng, i ê chhiú sī só-liān; hōan-nā tit-tio̍h Siōng-tè hoaⁿ-hí ê lâng tit-tio̍h siám-pī; chóng-sī ū-chōe ê lâng hō͘ i lia̍h--tio̍h.

27

Thôan-tō--ê kóng, Khòaⁿ ah, góa ài chai i ê siàu-gia̍h, chı̍t-hāng chı̍t-hāng pí-kàu i, chiū chhē-tio̍h chit-ê;

28

góa ê sim ài chhē--i iā bōe tit-tio̍h; tī chı̍t-chheng lâng ê tiong-kan góa ōe chhē-tio̍h chı̍t ê ta-po͘-lâng, tī hiah ê lâng ê tiong-kan, góa bô chhē-tio̍h chı̍t ê hū-jîn-lâng.

29

Khòaⁿ ah, góa chí-ū chhē-tio̍h chit-ê, chiū-sī Siōng-tè chhòng-chō lâng pún sī chèng-tı̍t, chóng-sī in chhē-chhut chōe-chōe kî-khiáu ê kè-bô͘.