Chhut Ai-ki̍p-kì 第 11 章 - 巴克禮全羅

1

Iâ-hô-hoa kā Mô͘-se kóng, Góa beh koh hō͘ chı̍t-hāng chai-ē kàu tī Hoat-ló kap Ai-kı̍p, jiân-āu i beh chún lín lī-khui chia; i chún lín khì ê sî beh kóaⁿ lín lóng tùi chia chhut-khì.

2

Lí tio̍h thôan hō͘ peh-sìⁿ thiaⁿ, hō͘ in lâm-lú ta̍k-lâng tùi in ê chhù-piⁿ thó kim-khì, gûn-khì.

3

Iâ-hô-hoa hō͘ peh-sìⁿ tit-tio̍h un-tián tī Ai-kı̍p lâng ê bīn-chêng; koh Mô͘-se chit-lâng tī Ai-kı̍p tōe, tī Hoat-ló jîn-sîn ê ba̍k-chiu-tiong, kap peh-sìⁿ ê ba̍k-chiu-tiong, khòaⁿ-chòe chun-tōa.

4

Mô͘-se kóng, Iâ-hô-hoa án-ni kóng, Iok-lio̍k pòaⁿ-mî, Góa beh chhut-khì piàn kiâⁿ Ai-kı̍p.

5

Kìⁿ-nā tī Ai-kı̍p tōe ê tōa-kiáⁿ, tùi chē-ūi ê Hoat-ló ê tōa-kiáⁿ, kàu tī oe-bō ê lú-pī ê tōa-kiáⁿ, kap it-chhè ê cheng-siⁿ thâu-chúi-siⁿ-ê, lóng beh sí.

6

Ai-kı̍p piàn-tōe beh ū tōa thî-khàu ê siaⁿ, chiong-chêng bē bat ū án-ni, āu-lâi iā bô koh án-ni.

7

Lūn-kàu Í-sek-lia̍t-tiong, bô-lūn sī lâng sī cheng-siⁿ, liân káu iā m̄-káⁿ pūi in; hō͘ lín chai Iâ-hô-hoa tī Ai-kı̍p lâng kap Í-sek-lia̍t lâng ê tiong-kan ū hun-piat in.

8

Lí hiah-ê jîn-sîn, lóng beh lo̍h lâi kìⁿ góa, phak tī góa bīn-chêng, kóng, Kiû lí kap kun-tè lí ê peh-sìⁿ lóng chhut-khì; jiân-āu góa beh chhut-khì. Tùi án-ni Mô͘-se tōa siū-khì, lī-khui Hoat-ló chhut-khì.

9

Iâ-hô-hoa kā Mô͘-se kóng, Hoat-ló bô beh thiaⁿ lín, hō͘ Góa ê kî-sū tī Ai-kı̍p tōe ke-thiⁿ ná chōe.

10

Mô͘-se, A-lûn tī Hoat-ló ê bīn-chêng kiâⁿ che it-chhè ê kî-sū; chóng-sī Iâ-hô-hoa hō͘ Hoat-ló ê sim ngī, m̄-chún Í-sek-lia̍t lâng lī-khui i ê tōe.