Chhut Ai-ki̍p-kì 第 12 章 - 巴克禮全羅

1

Iâ-hô-hoa tī Ai-kı̍p tōe tùi Mô͘-se, A-lûn kóng,

2

Chit ge̍h tio̍h chòe lín ê chiaⁿ-ge̍h, chòe nî-nî ê thâu-chı̍t-ge̍h.

3

Lín tio̍h tùi Í-sek-lia̍t ê chôan-hōe kóng, Pún-ge̍h chhoe-cha̍p jı̍t, ta̍k-lâng tio̍h chiàu lāu-pē ê ke, chhú iûⁿ-á, chı̍t-ke chı̍t-chiah.

4

Nā sī chı̍t-ke ê lâng siuⁿ-chió, chı̍t-chiah iûⁿ-á chia̍h-bōe-liáu, i tio̍h kap keh-piah ê chhù-piⁿ, chiàu lâng-gia̍h, saⁿ-kap chhú chı̍t-chiah; lín pī-pān iûⁿ-á, tio̍h àn-sǹg ta̍k-lâng só͘ ōe chia̍h ê liōng.

5

Lín ê iûⁿ-á tio̍h bô hâ-chhû ê, bē-móa-nî ê iûⁿ-káng-á; lín tio̍h tùi mî-iûⁿ-tiong, á-sī soaⁿ-iûⁿ-tiong, chhú i, lóng thang;

6

lín tio̍h lâu kàu pún-ge̍h cha̍p-sì jı̍t, hông-hun ê sî, Í-sek-lia̍t chôan-hōe ê chèng-lâng tio̍h thâi iûⁿ-á.

7

In tio̍h chhú tām-po̍h huih, boah tī chia̍h iûⁿ-á hit keng chhù, siang-pêng ê mn̂g-khiā kap mn̂g-bâi.

8

Hit-mî tio̍h chia̍h iûⁿ-á ê bah, ēng hé pek i, kap bô-kàⁿ-piáⁿ khó͘-chhài chham-teh chia̍h.

9

M̄-thang chhiⁿ-chhiⁿ chia̍h, koat-tòan m̄-thang ēng chúi chú, tio̍h ēng hé pek; thâu, kha, kap ngó͘-chōng lóng tio̍h chia̍h.

10

Lóng m̄-thang lâu keh chá-khí, nā lâu kàu keh chá-khí tio̍h ēng hé sio.

11

Lín tio̍h án-ni chia̍h i; io hâ-tòa, kha chhēng-ôe, chhiú kia̍h kóaiⁿ-á, iā tio̍h kóaⁿ-kín chia̍h; che sī Iâ-hô-hoa ê pôaⁿ-kè-choeh.

12

In-ūi hit-mî Góa beh piàn-kiâⁿ Ai-kı̍p tōe, phah-sí Ai-kı̍p tōe it-chhè thâu-chiūⁿ-siⁿ-ê, bô-lūn lâng kap cheng-siⁿ; koh beh sím-phòaⁿ Ai-kı̍p it-chhè ê siōng-tè; Góa chiū-sī Iâ-hô-hoa.

13

Chit-ê huih tī lín só͘ khiā-khí ê chhù, beh chòe lín ê kì-hō; Góa chı̍t-ē khòaⁿ-kìⁿ chit-ê huih, chiū tùi lín pôaⁿ-kè-khì; Góa phah Ai-kı̍p tōe ê sî, chai-ē bô kàu tī lín, lâi bia̍t lín.

14

Lín tio̍h ēng chit-jı̍t chòe kì-liām, siú i chòe Iâ-hô-hoa ê choeh; lín tio̍h tāi-tāi siú chit-ê choeh, chòe éng-óan ê lē.

15

Lín tio̍h chia̍h bô-kàⁿ-piáⁿ chhit-jı̍t kú; thâu-chı̍t-jı̍t tio̍h tùi lín ta̍k keng chhù tû-khì kàⁿ; in-ūi tùi thâu-chı̍t jı̍t kàu tē-chhit jı̍t, hōan-nā chia̍h ū kàⁿ ê, beh tùi Í-sek-lia̍t-tiong tû-khì.

16

Thâu-chı̍t jı̍t lín tio̍h ū sèng-hōe, chhit-jı̍t iā tio̍h ū sèng-hōe; chit nn̄g-jı̍t, tû-khì pī-pān ta̍k-lâng só͘ tio̍h chia̍h ê í-gōa, bô-lūn sím-mı̍h kang lóng m̄-thang chòe.

17

Lín tio̍h siú bô-kàⁿ-choeh; in-ūi Góa tú-tú tī hit-jı̍t chhōa lín ê kun-tūi tùi Ai-kı̍p tōe chhut-lâi; só͘-í lín tio̍h siú chit-jı̍t, ta̍k sè-tāi chòe éng-óan ê lē.

18

Tùi chiaⁿ-ge̍h cha̍p-sì ê-hng kàu jī-it ê-hng, lín tio̍h chia̍h bô-kàⁿ-piáⁿ.

19

Tī lín ta̍k keng chhù, chhit-jı̍t-lāi m̄-thang ū kàⁿ; in-ūi kìⁿ-nā chia̍h ū kàⁿ ê mı̍h, bô-lūn sī kià-kha-ê, á-sī pún-tōe-ê, hit-lâng tio̍h tùi Í-sek-lia̍t hōe-tiong tû-khì.

20

Ū-kàⁿ ê mı̍h, lín lóng m̄-thang chia̍h; tī lín it-chhè khiā-khí ê só͘-chāi, tio̍h chia̍h bô-kàⁿ-piáⁿ.

21

Mô͘-se chiū kiò Í-sek-lia̍t chèng tiúⁿ-ló lâi, kā in kóng, Lín ta̍k-lâng tio̍h chiàu ke-kháu chhú iûⁿ-á, thâi i chòe pôaⁿ-kè-choeh.

22

Lín tio̍h the̍h chı̍t-pé ê gû-chhek-chháu, ùn phûn-lāi ê huih, ēng phûn-lāi ê huih boah mn̂g-bâi, kap siang-pêng ê mn̂g-khiā; lín bô-lūn sím-mı̍h lâng m̄-thang tùi i ê chhù chhut-mn̂g, tı̍t-kàu bîn-á-chá-khí.

23

In-ūi Iâ-hô-hoa beh piàn-kiâⁿ, phah-sí Ai-kı̍p lâng; I khòaⁿ-kìⁿ huih tī mn̂g-bâi, kap siang-pêng ê mn̂g-khiā, Iâ-hô-hoa chiū beh pôaⁿ-kè hit-ê mn̂g, m̄-chún bia̍t sìⁿ-miā-ê jı̍p lín ê chhù, lâi phah-sí lín.

24

Chit-ê sū, lín tio̍h siú i, chòe lín kap lín ê kiáⁿ-sun éng-óan ê lē.

25

Āu-lâi lín kàu Iâ-hô-hoa chiàu I só͘ èng-ún siúⁿ-sù lín hit-ê tōe, chiū tio̍h siú chit-ê lé.

26

Lín ê kiáⁿ-jî nā mn̄g lín, Ūi siáⁿ-sū kiâⁿ chit-ê lé?

27

lín chiū tio̍h kóng, Che sī Iâ-hô-hoa pôaⁿ-kè-choeh ê chè; tng Í-sek-lia̍t lâng tī Ai-kı̍p ê sî, I phah-sí Ai-kı̍p lâng, pôaⁿ-kè Í-sek-lia̍t lâng ê chhù, kiù lán ta̍k-ke. Tùi án-ni peh-sìⁿ àⁿ-thâu kèng-pài.

28

Í-sek-lia̍t lâng chiū khì án-ni kiâⁿ; Iâ-hô-hoa só͘ hoan-hù Mô͘-se, A-lûn-ê, in chiàu án-ni kiâⁿ.

29

Kàu pòaⁿ-mî Iâ-hô-hoa chiong Ai-kı̍p tōe só͘ ū ê tōa-kiáⁿ, chiū-sī tùi chē-ūi ê Hoat-ló ê tōa-kiáⁿ kàu kaⁿ-hōan ê tōa-kiáⁿ, í-kı̍p thâu-chúi-siⁿ ê cheng-siⁿ, it-chīn thâi-sí.

30

Hoat-ló kap it-chhè ê jîn-sîn, kap Ai-kı̍p ê chèng-lâng, mî-sî lóng khí-lâi; tī Ai-kı̍p ū tōa thî-khàu ê siaⁿ, in-ūi bô chı̍t-ke bô sí-lâng.

31

Hoat-ló thàu-mî tiàu Mô͘-se, A-lûn kóng, Khí-lâi, kap Í-sek-lia̍t lâng tio̍h tùi góa ê peh-sìⁿ tiong-kan chhut-khì, chiàu lín só͘ kóng ê, khì ho̍k-sāi Iâ-hô-hoa;

32

iā chiàu lín só͘ kóng ê, liân iûⁿ-kûn gû-kûn tòa-tòa khì; iā tio̍h kā góa chiok-hok.

33

Ai-kı̍p lâng pek peh-sìⁿ; kah in kín-kín chhut in ê tōe, kóng, Góan lóng sí-lah.

34

Peh-sìⁿ chiū the̍h bô-kàⁿ ê chhiⁿ-mī, chiong chhiau-mī ê khì-kū pau tī saⁿ-lāi, pē tī keng-thâu-téng.

35

Í-sek-lia̍t lâng chiàu Mô͘-se ê ōe kiâⁿ, tùi Ai-kı̍p thó gûn-khì kim-khì kap i-chiûⁿ.

36

Iâ-hô-hoa hō͘ peh-sìⁿ tit-tio̍h un-tián tī Ai-kı̍p lâng ê bīn-chêng, chiàu in só͘-thó-ê hō͘ in; tùi án-ni in chhiúⁿ Ai-kı̍p lâng.

37

Í-sek-lia̍t lâng tùi Lân-sek khì So͘-kat, tû gín-á í-gōa, pō͘-kiâⁿ ê tōa-lâng iok ū la̍k-cha̍p-bān.

38

Koh ū chōe-chōe cha̍p-cho̍k ê lâng, iā ū iûⁿ-kûn gû-kûn chōe-chōe cheng-siⁿ kap in chiūⁿ-khì.

39

In ēng Ai-kı̍p tòa-chhut-lâi ê chhiⁿ-mī pek-chòe bô-kàⁿ-piáⁿ; bô hoat-kàⁿ, sī in-ūi siū-pek chhut Ai-kı̍p, bōe-ōe iân-chhiân-tit, iā bô ūi ka-kī pī-pān sím-mı̍h chia̍h-mı̍h.

40

Í-sek-lia̍t lâng chhut-gōa tī Ai-kı̍p sì-pah saⁿ-cha̍p nî.

41

Kàu sì-pah saⁿ-cha̍p nî móa, tú-tú hit-jı̍t, Iâ-hô-hoa ê kun-tūi lóng tùi Ai-kı̍p tōe chhut-lâi.

42

Chit-mî tio̍h ūi Iâ-hô-hoa siú i, in-ūi I chhōa in chhut Ai-kı̍p tōe; che sī Iâ-hô-hoa ê mî, sī Í-sek-lia̍t chèng lâng tāi-tāi só͘ tio̍h siú-ê.

43

Iâ-hô-hoa tùi Mô͘-se, A-lûn kóng, Pôaⁿ-kè-choeh ê lē sī án-ni;

44

gōa-pang lâng lóng m̄-thang chia̍h i; to̍k-to̍k ta̍k-lâng ēng gûn bóe ê lô͘-po̍k, í-keng kā i kiâⁿ kat-lé, chiū thang chia̍h.

45

Kià-kha-ê kap chhiàⁿ-kang lâng lóng m̄-thang chia̍h.

46

Tio̍h tī chı̍t keng chhù chia̍h i, chı̍t tè bah iā m̄-thang tòa-chhut chhù-gōa; i ê kut chı̍t-ki iā m̄-thang phah-chı̍h.

47

Í-sek-lia̍t chôan-hōe lóng tio̍h siú i.

48

Nā ū gōa-cho̍k lâng chhut-gōa tī lín tiong-kan, ài siú pôaⁿ-kè-choeh lâi ho̍k-sāi Iâ-hô-hoa, i só͘-ū ê ta-po͘-lâng tio̍h siū kat-lé, jiân-āu i thang lâi siú, chiū kap pún-cho̍k ê lâng bô koh-iūⁿ; chóng-sī bô siū kat-lé ê lâng, lóng m̄-thang chia̍h i.

49

Pún-cho̍k ê lâng kap gōa-cho̍k ê lâng chhut-gōa tī lín tiong-kan, lóng tâng-chı̍t-iūⁿ ê lē.

50

Í-sek-lia̍t chèng-lâng chiū án-ni kiâⁿ, chiàu Iâ-hô-hoa só͘ hoan-hù Mô͘-se, A-lûn ê khì chòe.

51

Tng hit-jı̍t Iâ-hô-hoa chhōa Í-sek-lia̍t lâng, chiàu in ê kun-tūi, chhut Ai-kı̍p tōe.