Chhut Ai-ki̍p-kì 第 13 章 - 巴克禮全羅

1

Iâ-hô-hoa hoan-hù Mô͘-se kóng,

2

Í-sek-lia̍t-tiong, bô-lūn lâng kap cheng-siⁿ, kìⁿ-nā thâu-chiūⁿ ê tōa-kiáⁿ, lóng tio̍h hun-piat chòe-sèng, kui tī Góa; in-ūi pún sī Góa ê.

3

Mô͘-se kā peh-sìⁿ kóng, Lín tio̍h kì-liām chit-jı̍t, chiū-sī lín tùi Ai-kı̍p tōe, tùi chòe lô͘-châi ê ke, chhut-lâi; in-ūi Iâ-hô-hoa ēng tōa kôan-lêng ê chhiú chhōa lín tùi chia chhut; ū kàⁿ ê piáⁿ lóng m̄-thang chia̍h.

4

Tī A-pit ge̍h-kan, chit-jı̍t sī lín chhut-lâi ê jı̍t.

5

Chiong-lâi Iâ-hô-hoa chhōa lín jı̍p Ka-lâm, Hek, A-mô͘-lī, Hi-bī, Iâ-pò͘-su, hiah-ê cho̍k ê tōe, chiū-sī tùi lí ê chó͘-kong chiù-chōa èng-ún hō͘ lí, hit-ê lâu lin kap bı̍t ê tōe, hit-sî lí tio̍h tī chit-ge̍h-kan siú chit-ê lé.

6

Lí tio̍h chia̍h bô-kàⁿ-piáⁿ chhit-jı̍t; kàu tē-chhit jı̍t chiū-sī Iâ-hô-hoa ê choeh.

7

Chit chhit-jı̍t kú tio̍h chia̍h bô-kàⁿ-piáⁿ; tī lí ê sì-kéng lāi, m̄-thang khòaⁿ-kìⁿ lí ū hē-kàⁿ ê piáⁿ, iā m̄-thang khòaⁿ-kìⁿ lí ū kàⁿ-bú.

8

Tng hit-jı̍t, lí tio̍h kā lí ê kiáⁿ kóng, Che sī in-ūi Iâ-hô-hoa, tī góa chhut Ai-kı̍p ê sî, só͘ kā góa kiâⁿ ê sū.

9

Che beh kā lí chòe kì-hō tī lí ê chhiú, chòe kì-liām tī lí ê thâu-hia̍h; hō͘ Iâ-hô-hoa ê lu̍t-hoat siông-siông tī lí ê chhùi; in-ūi Iâ-hô-hoa bat ēng tōa kôan-lêng ê chhiú chhōa lí chhut Ai-kı̍p;

10

só͘-í ta̍k-nî kàu-kî lí tio̍h siú chit-ê lē.

11

Chiong-lâi Iâ-hô-hoa beh chiàu I tùi lí kap lí ê chó͘-kong só͘ chiù-chōa ê, chhōa lí jı̍p Ka-lâm lâng ê tōe, chiong chit-ê tōe siúⁿ-sù lí;

12

hit-sî lí tio̍h chiong it-chhè thâu-thai ê ta-po͘-kiáⁿ kap só͘ ū thâu-chúi kang ê cheng-siⁿ, kui hō͘ Iâ-hô-hoa; chiah-ê lóng sio̍k Iâ-hô-hoa.

13

Kìⁿ-nā thâu-chúi-siⁿ ê lû, tio̍h ēng iûⁿ-á thòe-sio̍k; nā bô beh thòe-sio̍k, chiū tio̍h kòng-chı̍h i ê ām-kún; kìⁿ-nā lí thâu-chiūⁿ ê ta-po͘-kiáⁿ lóng tio̍h thòe-sio̍k.

14

Jı̍t-āu lí ê kiáⁿ mn̄g lí kóng, Che sī sím-mı̍h iân-kò͘? lí tio̍h tùi i kóng, Iâ-hô-hoa ēng tōa kôan-lêng ê chhiú, chhōa góan tùi Ai-kı̍p, tùi chòe lô͘-châi ê ke, chhut-lâi.

15

Hit-sî Hoat-ló kò͘-chip m̄-chún góan khì, Iâ-hô-hoa chiū chiong Ai-kı̍p tōe só͘-ū thâu-thai-ê, bô-lūn sī lâng ê tōa-kiáⁿ, á-sī cheng-siⁿ ê thâu-chúi-ê, lóng hāi-sí; in-ūi án-ni, góa chiong thâu-chúi ê kang-ê hiàn hō͘ Iâ-hô-hoa chòe-chè; to̍k-to̍k góa ê tōa-kiáⁿ lóng ēng thòe-sio̍k.

16

Che beh chòe kì-hō tī lí ê chhiú, chòe kì-liām hâ tī lí ê thâu-hia̍h; in-ūi Iâ-hô-hoa ēng tōa kôan-lêng ê chhiú, chhōa góan tùi Ai-kı̍p chhut-lâi.

17

Hoat-ló chún peh-sìⁿ khì ê sî, Hui-lī-sū tōe ê lō͘ sui-jiân khah-kūn, chóng-sī Siōng-tè bô chhōa in tùi hia khì; in-ūi Siōng-tè kóng, Kiaⁿ-liáu peh-sìⁿ tú-tio̍h kau-chiàn, chiū thè-hóe, tò-tńg-khì Ai-kı̍p.

18

Só͘-í Siōng-tè chhōa peh-sìⁿ oan tùi Âng-hái khòng-iá hit-tiâu lō͘ khì; Í-sek-lia̍t lâng lóng pâi tūi-ngó͘, tùi Ai-kı̍p tōe chhut-khì.

19

Mô͘-se tòa Iok-sek ê kut-thâu kap i khì; in-ūi Iok-sek bat chhiat-chhiat kah Í-sek-lia̍t lâng chiù-chōa, tùi in kóng, Siōng-tè tek-khak kòan-kò͘ lín, lín tio̍h tòa góa ê kut-thâu tùi chia saⁿ-kap khì.

20

In tùi So͘-kat khí-sin, chat-iâⁿ tī kūn khòng-iá ê Í-thóng.

21

Iâ-hô-hoa kiâⁿ tī in ê thâu-chêng, jı̍t-sî tī hûn-thiāu-tiong chhōa in ê lō͘, mî-sî tī hé-thiāu-tiong kng-chiò in; hō͘ in jı̍t-mî lóng thang kiâⁿ.

22

Jı̍t-sî ê hûn-thiāu, mî-sî ê hé-thiāu, lóng bô lī-khui peh-sìⁿ ê thâu-chêng.