Chhut Ai-ki̍p-kì 第 14 章 - 巴克禮全羅

1

Iâ-hô-hoa kā Mô͘-se kóng,

2

Lí hoan-hù Í-sek-lia̍t lâng o̍at-tò-tńg, chat-iâⁿ tī Pí-hap-hi-lio̍k ê thâu-chêng, tī Bı̍t-to̍at kap hái ê tiong-kan, tī Pa-le̍k-sé-hun ê thâu-chêng, tī hit tùi-bīn chat-iâⁿ tī hái-piⁿ.

3

Hoat-ló beh gī-lūn Í-sek-lia̍t lâng kóng, In tī tōe-tiong se̍h bô lō͘, khòng-iá kā in ûi-khùn teh.

4

Góa beh hō͘ Hoat-ló ê sim ngī, i beh tui-jip in; Góa chiū tī Hoat-ló kap i ê chôan-kun lâi tit-tio̍h êng-kng; Ai-kı̍p lâng chiū chai Góa sī Iâ-hô-hoa. In chiū án-ni kiâⁿ.

5

Ū lâng pò Ai-kı̍p ông kóng, Hit-ê peh-sìⁿ cháu-khì; Hoat-ló kap i ê jîn-sîn tùi-thāi hit-ê peh-sìⁿ ê sim chiū piàn-ōaⁿ, kóng, Lán chún Í-sek-lia̍t lâng khì, bô koh ho̍k-sāi lán, che sī sím-mı̍h iân-kò͘ ah?

6

Hoat-ló chiū pī-pān i ê chhia, tòa i ê peh-sìⁿ saⁿ-kap khì.

7

Iā tòa la̍k-pah tiuⁿ te̍k-pia̍t chhia, kap Ai-kı̍p só͘ ū ê chhia, ta̍k tiuⁿ chhia lóng ū peng-thâu teh kóan.

8

Iâ-hô-hoa hō͘ Ai-kı̍p ông Hoat-ló ê sim ngī; i chiū tui-jip Í-sek-lia̍t lâng; nā-sī Í-sek-lia̍t lâng khò tōa kôan-lêng ê chhiú chhut-khì.

9

Ai-kı̍p lâng tui-jip in, Hoat-ló it-chhè ê bé, chhia, kap i ê bé-peng, kap i ê kun-tūi, chiū tī hái-piⁿ óa-kūn Pí-hap-hi-lio̍k, tī Pa-le̍k-sé-hun ê tùi-bīn, tī in an-iâⁿ ê só͘-chāi, jip-tio̍h in.

10

Hoat-ló kūn-óa ê sî, Í-sek-lia̍t lâng kia̍h-ba̍k khòaⁿ-kìⁿ Ai-kı̍p lâng jip-óa-lâi, chiū chin kiaⁿ, âu-kiò Iâ-hô-hoa.

11

In tùi Mô͘-se kóng, Kiám sī Ai-kı̍p bô thióng-tōe, lí chiah chhōa góan chhut-lâi sí tī khòng-iá mah? lí siáⁿ-sū án-ni khóan-thāi góan, chhōa góan chhut Ai-kı̍p ah?

12

Góan tī Ai-kı̍p kiám bô tùi lí án-ni kóng, Bo̍h-tit chhap góan, chhut-chāi góan ho̍k-sāi Ai-kı̍p lâng mah? In-ūi ho̍k-sāi Ai-kı̍p lâng, khah-tit sí tī khòng-iá.

13

Mô͘-se tùi peh-sìⁿ kóng, M̄-bián kiaⁿ, chòe lín khiā-teh, khòaⁿ Iâ-hô-hoa kin-á-jı̍t ūi-tio̍h lín só͘ beh kiâⁿ ê chín-kiù; in-ūi lín kin-á-jı̍t só͘ khòaⁿ-kìⁿ ê Ai-kı̍p lâng, tek-khak éng-óan bô koh khòaⁿ-kìⁿ.

14

Iâ-hô-hoa beh ūi lín kau-chiàn, chòe lín tiām-tiām, bo̍h chòe-siaⁿ.

15

Iâ-hô-hoa tùi Mô͘-se kóng, Lí siáⁿ-sū âu-kiò Góa ah? lí tio̍h kah Í-sek-lia̍t lâng chìn-chêng khì.

16

Lí kia̍h kóaiⁿ-á chhun-chhiú kí hái, lâi pun-khui i; Í-sek-lia̍t lâng beh tī hái-tiong kiâⁿ ta-tōe;

17

to̍k-to̍k Góa, Góa beh hō͘ Ai-kı̍p lâng ê sim ngī, in beh tè-lo̍h-khì; Góa beh tī Hoat-ló kap i ê chôan-kun, i ê chhia, i ê bé-peng, lâi tit-tio̍h êng-kng.

18

Góa tī Hoat-ló kap i ê chhia, i ê bé-peng, tit-tio̍h êng-kng ê sî, Ai-kı̍p lâng chiū chai Góa sī Iâ-hô-hoa.

19

Siōng-tè ê sù-chiá, pún kiâⁿ tī Í-sek-lia̍t ê iâⁿ-chêng-ê, sóa lâi kiâⁿ tī in ê āu-bīn; hûn-thiāu iā tùi in ê thâu-chêng, sóa lâi khiā tī in ê āu-bīn,

20

tī Ai-kı̍p iâⁿ kap Í-sek-lia̍t iâⁿ ê tiong-kan; hit-pêng ū hûn ū o͘-àm, chit-pêng mî-sî hoat-chhut kng; thong-mî nn̄g pêng bōe saⁿ-kūn.

21

Mô͘-se chiū chhun-chhiú kí hái, Iâ-hô-hoa thong-mî hō͘ tang-hong tōa khí, hō͘ hái thè-khì, chúi chiū pun-khui, hái chiū chiâⁿ-chòe ta-tōe.

22

Í-sek-lia̍t lâng lo̍h hái-tiong kiâⁿ ta-tōe, chúi tī in ê siang-pêng chiâⁿ-chòe chhiûⁿ-piah.

23

Ai-kı̍p lâng tui-jip-in; Hoat-ló it-chhè ê bé, chhia, kap bé-peng, lóng tè in kàu hái-tiong.

24

Kàu thiⁿ beh kng ê sî, Iâ-hô-hoa tùi hûn kap hé ê thiāu-tiong àⁿ-lo̍h, khòaⁿ Ai-kı̍p ê kun-tūi, phah-lōan in ê tūi-ngó͘;

25

koh hō͘ in ê chhia-lûn lak-lo̍h, oh-tit kiâⁿ; tì-kàu Ai-kı̍p lâng kóng, Lán tio̍h tùi Í-sek-lia̍t lâng ê bīn-chêng tô-cháu, in-ūi Iâ-hô-hoa ūi-tio̍h in kap Ai-kı̍p lâng kau-chiàn.

26

Iâ-hô-hoa kā Mô͘-se kóng, Lí chhun-chhiú kí hái, hō͘ chúi tò-tńg-lâi im Ai-kı̍p lâng, kap in ê chhia, in ê bé-peng.

27

Mô͘-se chiū chhun-chhiú kí hái; kàu thiⁿ chı̍t-ē kng, hái-chúi koh chiàu-kū; Ai-kı̍p lâng tô-cháu, chúi cha̍h tī in ê thâu-chêng; Iâ-hô-hoa chiū chiong Ai-kı̍p lâng chhia-tó tī hái-tiong.

28

Chúi chiū hoan-lâu, im-ba̍t hiah-ê chhia kap bé-peng; Hoat-ló ê chôan-kun tè Í-sek-lia̍t lâng lo̍h hái-ê, liân chı̍t-ê iā bô lâu-teh.

29

Chóng-sī Í-sek-lia̍t lâng tī hái-tiong kiâⁿ ta-tōe, chúi tī in ê siang-pêng chiâⁿ-chòe in ê chhiûⁿ-piah.

30

Hit-jı̍t Iâ-hô-hoa án-ni kiù Í-sek-lia̍t lâng thoat-lī Ai-kı̍p lâng ê chhiú; Í-sek-lia̍t lâng khòaⁿ-kìⁿ Ai-kı̍p lâng ê sin-si tī hái-piⁿ.

31

Í-sek-lia̍t lâng khòaⁿ-kìⁿ Iâ-hô-hoa tùi Ai-kı̍p lâng só͘ kiâⁿ ê tōa-sū, chiū kèng-ùi Iâ-hô-hoa; koh sìn-ho̍k Iâ-hô-hoa kap I ê lô͘-po̍k Mô͘-se.