Chhut Ai-ki̍p-kì 第 15 章 - 巴克禮全羅

1

Hit-sî Mô͘-se kap Í-sek-lia̍t lâng chhiùⁿ chit-ê koa o-ló Iâ-hô-hoa, kóng; Góa beh chhiùⁿ-koa o-ló Iâ-hô-hoa, in-ūi I chì-kôaiⁿ chì-tōa; Chiong bé kap khiâ-bé-ê hiat tī hái-tiong.

2

Iâ-hô-hoa sī góa ê khùi-la̍t, sī góa ê si-ko, Iā sī chòe góa chín-kiù ê Chú; I sī góa ê Siōng-tè, góa beh o-ló-I, Sī góa ê pē ê Siōng-tè, góa beh chun I chòe-tōa.

3

Iâ-hô-hoa sī chiàn-sū; I ê miâ sī Iâ-hô-hoa.

4

Hoat-ló ê chhia, kap i ê kun-peng, Iâ-hô-hoa hiat i tī hái-tiong; I te̍k-pia̍t kéng ê kun-tiúⁿ, lóng tîm tī Âng-hái.

5

Chhim-ian khàm-in; In chhin-chhiūⁿ chio̍h-thâu, tūi kàu chhim ê só͘-chāi.

6

Iâ-hô-hoa ah, Lí ê chiàⁿ-chhiú tián-chhut lêng-le̍k, tit-tio̍h êng-kng; Iâ-hô-hoa ah, Lí ê chiàⁿ-chhiú phah-chhùi tùi-te̍k.

7

Lí hoat-chhut tōa ui-giâm, chhia-tó hiah-ê khí-lâi kong-kek Lí-ê; Lí hoat-chhut tōa siū-khì, sio-húi in chhin-chhiūⁿ sio-chháu.

8

Lí hoat-chhut phīⁿ-tiong ê khì, chúi chiū ná-chhèng ná-kôaiⁿ, Tōa-chúi khiā-khí-lâi chhin-chhiūⁿ kui-tui; Hái-tiong ê chhim-chúi kian-tēng.

9

Tùi-te̍k kóng, Góa beh tui in, góa beh jip-tio̍h in, góa beh pun só͘ chhiúⁿ ê mı̍h; Góa beh tī in lâi chiok góa ê sim-gōan; Góa beh pu̍ih-to, góa ê chhiú beh bia̍t in.

10

Lí chı̍t-ē pûn-hong, hái chiū khàm-ba̍t-in; In chhin-chhiūⁿ iân, tîm tī tōa-chúi-tiong.

11

Iâ-hô-hoa ah, chiah-ê siōng-tè ê tiong-kan, chī-chūi ōe chhin-chhiūⁿ Lí? Chī-chūi chhin-chhiūⁿ Lí, chì-sèng thang êng-kng, Ui-giâm thang o-ló, kiâⁿ-chhut kî-sū?

12

Lí chhun-chhut chiàⁿ-chhiú, Tōe chiū thun-bia̍t-in.

13

Lí ēng Lí ê chû-ài, chhōa Lí só͘ kiù-sio̍k ê peh-sìⁿ; Lí ēng Lí ê kôan-lêng, chhōa in jı̍p Lí sèng ê só͘-chāi.

14

Lia̍t-pang thiaⁿ-kìⁿ chiū ngia̍uh-ngia̍uh-chhoah; Khiā-khí tī Hui-lī-sū tōe ê, tú-tio̍h thòng-khó͘.

15

Hit-sî Í-tong ê cho̍k-tiúⁿ gông-ngia̍h; Mô͘-ap eng-hiông ê lâng tì-kàu ngia̍uh-ngia̍uh-chhoah, Ka-lâm tōe khiā-khí ê peh-sìⁿ, sim lóng siau-iûⁿ.

16

Gông-ngia̍h kiaⁿ-hiâⁿ kàu tī in; Iâ-hô-hoa ah, in-ūi Lí ê chhiú ê tōa kôan-lêng, in tiāⁿ-tiāⁿ chhin-chhiūⁿ chio̍h-thâu, Thèng-hāu Lí ê peh-sìⁿ keng-kè, Thèng-hāu Lí só͘ tit-tio̍h ê peh-sìⁿ kè-khì.

17

Lí beh chhōa in jı̍p-khì, chai-pôe in tī Lí ê sán-gia̍p ê soaⁿ, Iâ-hô-hoa ah, chiū-sī Lí ūi ka-kī só͘ pī-pān khiā-khí ê só͘-chāi, Chú ah, chiū-sī Lí ê chhiú só͘ kiàn-lı̍p ê sèng-só͘.

18

Iâ-hô-hoa beh chòe-ông, tı̍t-kàu éng-óan.

19

In-ūi Hoat-ló ê bé, kap i ê chhia, i ê bé-peng, kàu tī hái-tiong, Iâ-hô-hoa hō͘ hái-chúi hoan-lâu im-ba̍t-in; to̍k-to̍k Í-sek-lia̍t lâng tī hái-tiong kiâⁿ ta-tōe.

20

A-lûn ê tōa-chí lú sian-ti Bí-lī-àm, chhiú-nı̍h kia̍h lin-long-kó͘, chèng hū-lú iā tè i chhut-khì, kia̍h lin-long-kó͘ thiàu-bú.

21

Bí-lī-àm hô só͘-chhiùⁿ-ê kóng, Lín tio̍h chhiùⁿ-koa o-ló Iâ-hô-hoa, in-ūi I chì-kôaiⁿ chì-tōa; Chiong bé kap khiâ-bé-ê, hiat tī hái-tiong.

22

Mô͘-se chhōa Í-sek-lia̍t lâng tùi Âng-hái chìn-chêng kiâⁿ; in chhut-khì, kàu Su-jíⁿ ê khòng-iá; tī khòng-iá kiâⁿ saⁿ-jı̍t, chhē bô chúi.

23

Kàu Má-la̍h ê sî, Má-la̍h ê chúi bōe lim-tit, in-ūi chúi khó͘; só͘-í miâ hit-ê tōe kiò Má-la̍h.

24

Peh-sìⁿ chiū tùi Mô͘-se ai-òan kóng, Góan beh lim sím-mı̍h ah?

25

Mô͘-se kiû-kiò Iâ-hô-hoa; Iâ-hô-hoa chí-sī i chı̍t châng chhiū, i chiū hiat i tī chúi-nı̍h, chúi chiū piàn-kam. I tī-hia, ūi in tēng lu̍t-lē hoat-tō͘, tī-hia chhì-giām in.

26

Koh kóng, Lí nā tì-ì thiaⁿ Iâ-hô-hoa lí ê Siōng-tè ê siaⁿ, koh kiâⁿ I só͘ khòaⁿ chòe ha̍p-gî ê sū, liû-sim thiaⁿ I ê kài-bēng, siú I it-chhè ê lu̍t-lē, chiū Góa hō͘ Ai-kı̍p lâng só͘ tú-tio̍h ê phòa-pīⁿ, tek-khak bô hō͘ lí tú-tio̍h; in-ūi Góa Iâ-hô-hoa sī i-tī lí-ê.

27

In kàu Í-lîm, tī-hia ū cha̍p-jī ê chúi-chôaⁿ, chhit-cha̍p châng ê chó-chhiū; in chiū tī-hia ê chúi-piⁿ chat-iâⁿ.