Chhut Ai-ki̍p-kì 第 16 章 - 巴克禮全羅

1

In tùi Í-lîm khí-sin, tī chhut Ai-kı̍p tōe í-āu, tē-jī ge̍h cha̍p-gō͘ jı̍t, Í-sek-lia̍t lâng chôan-hōe kàu Í-lîm kap Se-nái ê tiong-kan, Sìn ê khòng-iá.

2

Í-sek-lia̍t lâng chôan-hōe tī khòng-iá ai-òan Mô͘-se, A-lûn.

3

Í-sek-lia̍t lâng tùi in kóng, M̄-ta̍t-tio̍h góan tī Ai-kı̍p tōe sí tī Iâ-hô-hoa ê chhiú. Hit-sî góan ū bah móa-tiáⁿ, ū piáⁿ thang chia̍h kàu-pá; lín chhōa góan chhut-lâi kàu chit-ê khòng-iá, sī beh hō͘ chit-ê chôan-hōe lóng gō-sí.

4

Iâ-hô-hoa tùi Mô͘-se kóng, Khòaⁿ ah, Góa beh tùi thiⁿ lo̍h bí-niû hō͘ lín; peh-sìⁿ tio̍h chhut-khì, ta̍k-jı̍t khioh ta̍k-jı̍t ê gia̍h; Góa thang chhì-giām in, khòaⁿ in beh thàn Góa ê hoat-tō͘ á m̄.

5

Kàu tē-la̍k jı̍t, in tio̍h chiong só͘ khioh jı̍p-lâi-ê, pī-pān hó-sè, pí ta̍k-jı̍t só͘-khioh-ê têng-pē chōe.

6

Mô͘-se, A-lûn tùi Í-sek-lia̍t chèng-lâng kóng, Kàu ê-hng lín beh chai, chhōa lín chhut Ai-kı̍p tōe ê sī Iâ-hô-hoa.

7

Bîn-á-chá-khí lín beh khòaⁿ-kìⁿ Iâ-hô-hoa ê êng-kng; in-ūi Iâ-hô-hoa thiaⁿ-kìⁿ lín ai-òan I; góan sǹg sím-mı̍h, lín kèng-jiân ai-òan góan?

8

Mô͘-se koh kóng, Iâ-hô-hoa ê-hng-sî beh hō͘ lín chia̍h-bah, chá-khí-sî beh hō͘ lín chia̍h-piáⁿ kàu pá; in-ūi lín ai-òan Iâ-hô-hoa, I lóng thiaⁿ-kìⁿ; góan sǹg sím-mı̍h? lín m̄-sī ai-òan góan, sī ai-òan Iâ-hô-hoa.

9

Mô͘-se tùi A-lûn kóng, Lí tio̍h kā Í-sek-lia̍t lâng chôan-hōe kóng, Lín tio̍h chiū-kūn Iâ-hô-hoa ê bīn-chêng; in-ūi I í-keng thiaⁿ-kìⁿ lín ê ai-òan lah.

10

A-lûn tú-tú tùi Í-sek-lia̍t lâng chôan-hōe kóng-ōe ê sî, in ǹg khòng-iá teh khòaⁿ, khòaⁿ ah, Iâ-hô-hoa ê êng-kng tī hûn-tiong hián-hiān.

11

Iâ-hô-hoa tùi Mô͘-se kóng,

12

Góa í-keng thiaⁿ-kìⁿ Í-sek-lia̍t lâng ê ai-òan; lí tio̍h kā in kóng, Kàu hông-hun ê sî, lín beh chia̍h-bah, chá-khí beh ū piáⁿ thang chia̍h-pá; lín chiū chai Góa sī Iâ-hô-hoa lín ê Siōng-tè.

13

Kàu ê-hng ū ian-chhun pe-lâi, jia-khàm iâⁿ-pôaⁿ; thiⁿ-kng-chá tī iâⁿ-pôaⁿ sì-ûi ê tōe-bīn, ū chı̍t-têng ê lō͘-chúi.

14

Lō͘-chúi ta ê sî, khòaⁿ ah, khòng-iá ê tōe-bīn ū sòe-sòe îⁿ-îⁿ ê mı̍h; sòe kàu chhin-chhiūⁿ sng.

15

Í-sek-lia̍t lâng khòaⁿ-kìⁿ, m̄-chai sī sím-mı̍h, tāi-ke saⁿ-kap kóng, Che sī sím-mı̍h ah? Mô͘-se kā in kóng, Che chiū-sī Iâ-hô-hoa hō͘ lín chia̍h ê piáⁿ.

16

Iâ-hô-hoa só͘ hoan-hù-ê sī án-ni; lín tio̍h chiàu ta̍k-lâng só͘ ōe chia̍h ê liōng lâi khioh, ta̍k-lâng ūi i pò͘-pîⁿ-lāi ê lâng, chiàu i ê lâng-gia̍h lâi khioh, chı̍t-lâng chı̍t gô-mûi-jíⁿ.

17

Í-sek-lia̍t lâng chiàu án-ni kiâⁿ, ū-ê khioh chōe, ū-ê khioh chió.

18

Kàu ēng gô-mûi-jíⁿ niû i, khioh chōe-ê bô chhun, khioh chió-ê iā bô khiàm; ta̍k-lâng chiàu in ōe chia̍h ê liōng lâi khioh i.

19

Mô͘-se kā in kóng, Lâng m̄-thang chiong só͘ chhun-ê lâu kàu keh chá-khí.

20

Chóng-sī in bô thiaⁿ Mô͘-se ê ōe, ū lâng lâu kàu keh chá-khí, chiū siⁿ-thâng chhàu-bī; Mô͘-se siū-khì in.

21

In ta̍k chá-khí, chiàu ta̍k-lâng ōe chia̍h ê liōng khioh i; jı̍t-thâu chı̍t-ē pha̍k, chiū iûⁿ-khì.

22

Kàu tē-la̍k jı̍t, in khioh têng-pē ê gia̍h, ta̍k-lâng nn̄g gô-mûi-jíⁿ; chôan-hōe hiah-ê thâu-lâng lâi kā Mô͘-se kóng.

23

Mô͘-se kā in kóng, Iâ-hô-hoa án-ni kóng, bîn-á-jı̍t sī tiōng-iàu ê an-hioh, chiū-sī ho̍k-sāi Iâ-hô-hoa sèng ê an-hioh-jı̍t; lín ài pek-ê chiū pek i, ài chú-ê chiū chú i; só͘-chhun-ê, tio̍h ka-kī siu-teh, lâu kàu keh chá-khí.

24

In chiū chiàu Mô͘-se só͘ hoan-hù siu-teh lâu kàu keh chá-khí, iā bô chhàu-bī, lāi-bīn iā bô thâng.

25

Mô͘-se kóng, Lín kin-á-jı̍t chia̍h chit-ê, in-ūi kin-á-jı̍t sī ho̍k-sāi Iâ-hô-hoa ê an-hioh-jı̍t; lín tī chhân-iá, kin-á-jı̍t tek-khak chhē-bô.

26

La̍k-jı̍t-kan thang khioh, tē-chhit jı̍t sī an-hioh-jı̍t, hit-jı̍t chiū bô.

27

Tē-chhit-jı̍t peh-sìⁿ-tiong ū lâng chhut-khì khioh, iā chhē-bô.

28

Iâ-hô-hoa tùi Mô͘-se kóng, Lín m̄-khéng siú Góa ê bēng-lēng, Góa ê lu̍t-hoat, beh kàu tī-sî ah?

29

Lín tio̍h khòaⁿ, Iâ-hô-hoa í-keng chiong an-hioh-jı̍t siúⁿ-sù lín, só͘-í tē-la̍k jı̍t I hō͘ lín nn̄g-jı̍t ê bí-niû, tē-chhit jı̍t ta̍k-lâng tio̍h tiàm ka-kī ê só͘-chāi, lóng m̄-thang chhut-khì.

30

Tùi án-ni peh-sìⁿ chiū tī tē-chhit jı̍t an-hioh.

31

Chit-ê mı̍h, Í-sek-lia̍t-ke kiò i chòe má-ná; khóan-sit chhin-chhiūⁿ ôan-sui-jîn, sek-tì sī pe̍h-ê, chu-bī chhin-chhiūⁿ chham-bı̍t ê piáⁿ.

32

Mô͘-se kóng, Iâ-hô-hoa án-ni hoan-hù, tio̍h chiong chı̍t gô-mûi-jíⁿ tīⁿ-tīⁿ ê má-ná , lâu kàu lín ê āu-tāi, hō͘ in khòaⁿ Góa tng-jı̍t chhōa lín chhut Ai-kı̍p-tōe, tī khòng-iá só͘ hō͘ lín chia̍h ê piáⁿ.

33

Mô͘-se kā A-lûn kóng, Lí the̍h chı̍t ê khì-kū, tóe chı̍t gô-mûi-jíⁿ tīⁿ-tīⁿ ê má-ná, khǹg tī Iâ-hô-hoa ê bīn-chêng, lâu kàu lín ê āu-tāi.

34

A-lûn chiàu Iâ-hô-hoa só͘ hoan-hù Mô͘-se-ê, chiong má-ná hē tī kan-chèng ê iok-kūi chêng lâu-teh.

35

Í-sek-lia̍t lâng chia̍h má-ná kiōng sì-cha̍p nî kú, tı̍t-kàu in kàu tī ū lâng khiā-khí ê tōe. In chia̍h má-ná, tı̍t-kàu in kàu Ka-lâm ê kéng-kài.

36

Chı̍t gô-mûi-jíⁿ chiū-sī i-hoat ê cha̍p-hūn-chı̍t.