Chhut Ai-ki̍p-kì 第 17 章 - 巴克禮全羅

1

Í-sek-lia̍t lâng chôan-hōe thàn Iâ-hô-hoa ê bēng-lēng, chiàu lō͘-chām, tùi Sìn ê khòng-iá, chìn-chêng kiâⁿ, tī Lī-hui-tèng chat-iâⁿ, peh-sìⁿ bô chúi thang lim.

2

Peh-sìⁿ chiū kap Mô͘-se kè-kàu kóng, Hō͘ góan ū chúi thang lim. Mô͘-se kā in kóng, Lín siáⁿ-sū kap góa kè-kàu, siáⁿ-sū chhì Iâ-hô-hoa ah?

3

Peh-sìⁿ tī-hia chin chhùi-ta, ài lim chúi; chiū ai-òan Mô͘-se kóng, Lí siáⁿ-sū chhōa góan tùi Ai-kı̍p chiūⁿ-lâi, hō͘ góan kap góan ê kiáⁿ-jî, góan ê cheng-siⁿ, lóng chhùi-ta sí ah?

4

Mô͘-se chiū kiû-kiò Iâ-hô-hoa kóng, Góa tùi chit-ê peh-sìⁿ beh cháiⁿ-iūⁿ chòe ah? in chha-put-to beh ēng chio̍h-thâu tìm góa.

5

Iâ-hô-hoa kā Mô͘-se kóng, Lí chòe peh-sìⁿ ê thâu-chêng kiâⁿ, chhōa Í-sek-lia̍t ê tiúⁿ-ló kúi-nā lâng kap lí khì, lí ê chhiú tio̍h kia̍h chêng-jı̍t phah hô-chúi ê kóaiⁿ-á.

6

Khòaⁿ ah, Góa beh khiā tī lí ê bīn-chêng, tī Hô-lia̍t ê chio̍h-pôaⁿ-téng; lí phah hit-ê chio̍h-pôaⁿ, beh ū chúi tùi hia lâu-chhut hō͘ peh-sìⁿ lim. Mô͘-se chiū tī Í-sek-lia̍t tiúⁿ-ló ê bīn-chêng án-ni kiâⁿ.

7

I miâ hit-ê só͘-chāi kiò Má-sat, koh kiò-chòe Bí-lī-pa; in-ūi Í-sek-lia̍t lâng kè-kàu, koh in-ūi in chhì Iâ-hô-hoa, kóng, Iâ-hô-hoa tī góan tiong-kan á-bô?

8

Hit-sî A-má-le̍k lâng lâi kàu Lī-hui-tèng, kap Í-sek-lia̍t lâng kau-chiàn.

9

Mô͘-se kā Iok-su-a kóng, Lí thòe lán kéng lâng chhut-khì kap A-má-le̍k lâng kau-chiàn; bîn-á-jı̍t góa chhiú-nı̍h beh kia̍h Siōng-tè ê kóaiⁿ-á, khiā tī soaⁿ-téng.

10

Tùi hit-tia̍p Iok-su-a chiàu Mô͘-se só͘ kā i kóng-ê kiâⁿ; kap A-má-le̍k lâng kau-chiàn; Mô͘-se, A-lûn kap Hō͘-jíⁿ lóng chiūⁿ soaⁿ-téng.

11

Mô͘-se chhiú kia̍h-khí ê sî, Í-sek-lia̍t lâng chiū khah-iâⁿ; chhiú sûi-lo̍h-khì ê sî, A-má-le̍k lâng chiū khah-iâⁿ.

12

Chóng-sī Mô͘-se chhiú sng; in chiū sóa chio̍h, lâi hē tī i ê ē-bīn; i chē tī chio̍h-téng, A-lûn kap Hō͘-jíⁿ hû i ê chhiú, chı̍t-ê tī chit-pêng, chı̍t-ê tī hit-pêng; i ê chhiú chiū chū-chāi, tı̍t-tı̍t kàu jı̍t-lo̍h.

13

Iok-su-a ēng to thâi A-má-le̍k ông kap i ê peh-sìⁿ.

14

Iâ-hô-hoa kā Mô͘-se kóng, Góa beh chiong A-má-le̍k ê miâ-jī tùi thiⁿ-ē ôan-chôan chhat-bia̍t i; lí tio̍h ēng chit-ê siá tī chheh-nı̍h chòe kì-liām, koh kóng hō͘ Iok-su-a thiaⁿ.

15

Mô͘-se khí chı̍t chō tôaⁿ, hō i ê miâ kiò Iâ-hô-hoa-nî-se;

16

koh kóng, Iâ-hô-hoa í-keng chiù-chōa, Iâ-hô-hoa beh tāi-tāi kap A-má-le̍k lâng kau-chiàn.