Chhut Ai-ki̍p-kì 第 2 章 - 巴克禮全羅

1

Ū chı̍t ê Lī-bī cho̍k ê lâng, khì chhōa chı̍t ê Lī-bī cho̍k ê cha-bó͘-gín-á.

2

Hit-ê hū-jîn-lâng hôai-īn, siⁿ chı̍t ê kiáⁿ; khòaⁿ-kìⁿ i sī chheng-siù ê gín-á, chiū khǹg i saⁿ-ge̍h-jı̍t kú.

3

Āu-lâi khòaⁿ bōe koh khǹg-tit, chiū ūi-tio̍h i chhú lô͘-tek-á ê siuⁿ, ēng chio̍h-iû kap le̍k-chhiⁿ kô͘ i; chiong gín-á hē ti7hit lāi-bīn, lok tī hô-piⁿ, lô͘-úi ê tiong-kan.

4

I ê tōa-chí hn̄g-hn̄g khiā-teh, ài chai i ōe tú-tio̍h cháiⁿ-iūⁿ.

5

Hoat-ló ê cha-bó͘-kiáⁿ lo̍h-lâi hô-nı̍h, beh sóe-e̍k; i hiah-ê lú-pī kiâⁿ-iû tī hô-piⁿ; i khòaⁿ-kìⁿ lô͘-úi ê tiong-kan ū siuⁿ, chiū chhe chı̍t ê lú-pī giâ-lâi.

6

Hian-khui khòaⁿ-kìⁿ gín-á; khòaⁿ ah, gín-á teh háu. I chiū lîn-bín i, kóng, Che chiū-sī Hi-pek-lâi lâng ê gín-á.

7

I ê tōa-chí kā Hoat-ló ê cha-bó͘-kiáⁿ kóng, Góa khì tī Hi-pek-lâi hū-jîn-lâng ê tiong-kan kiò chı̍t ê lin-bú, kā lí io chit-ê gín-á, hó mah?

8

Hoat-ló ê cha-bó͘-kiáⁿ kā i kóng, Lí thang khì ah. Cha-bó͘-kiáⁿ chiū khì, kiò gín-á ê lāu-bú.

9

Hoat-ló ê cha-bó͘-kiáⁿ kā i kóng, Phō chit-ê gín-á khì, kā góa io i, góa beh hō͘ lí kang-chîⁿ. Hū-jîn-lâng chiū phō gín-á khì io i.

10

Gín-á chiām-chiām tōa, hū-jîn-lâng chiū tòa i kàu Hoat-ló ê cha-bó͘-kiáⁿ hia, chòe i ê kiáⁿ. I kā i hō-miâ kiò Mô͘-se, kóng, In-ūi góa tùi chúi-nı̍h kiù i chhut-lâi.

11

Āu-lâi Mô͘-se í-keng tióng-sêng, i chhut-khì kàu i ê hiaⁿ-tī hia, khòaⁿ-kìⁿ in teh taⁿ-teh; khòaⁿ-kìⁿ chı̍t ê Ai-kı̍p lâng phah chı̍t ê Hi-pek-lâi lâng, chiū-sī i ê hiaⁿ-tī.

12

I khòaⁿ chó-iū, khòaⁿ bô lâng tī-hia, chiū phah-sí Ai-kı̍p lâng, iám tī soa-nı̍h.

13

Keh-jı̍t koh chhut-khì, khòaⁿ-kìⁿ ū nn̄g ê Hi-pek-lâi ê lâng saⁿ-phah, chiū tùi hit-ê m̄-tio̍h-ê kóng, Lí siáⁿ-sū phah lí ê tâng-phōaⁿ?

14

Hit-ê lâng kóng, Chī-chūi siat-lı̍p lí chòe siú-léng kap sím-phòaⁿ-koaⁿ lâi kóan góan? Lí siūⁿ beh phah-sí góa, chhin-chhiūⁿ phah-sí hit-ê Ai-kı̍p lâng mah? Mô͘-se kiaⁿ kóng, Chit-ê tāi-chì chin-chiàⁿ lō͘-chhut.

15

Hoat-ló thiaⁿ-kìⁿ chit-ê tāi-chì, chiū siūⁿ beh thâi Mô͘-se. Chóng-sī Mô͘-se siám-pī Hoat-ló, cháu-khì Bí-tiân tōe khiā-khí; chē tī chíⁿ-piⁿ.

16

Bí-tiân ê chè-si ū chhit-ê cha-bó͘-kiáⁿ; in lâi chhiūⁿ-chúi kàu móa chô, hō͘ lāu-pē ê iûⁿ-kûn lim.

17

Hiah-ê kò͘-iûⁿ-ê kàu, kóaⁿ in; Mô͘-se chiū khí-lâi pang-chān in, hō͘ in ê iûⁿ-kûn lim.

18

In lâi kàu lāu-pē, Liû-jíⁿ, hia; i kóng, Kin-á-jı̍t lín cháiⁿ-iūⁿ hiah-kín tò-lâi?

19

In kóng, Ū chı̍t ê Ai-kı̍p lâng kiù góan thoat-lī kò͘-iûⁿ ê lâng ê chhiú, koh thòe góan chhut-la̍t chhiūⁿ chúi, hō͘ iûⁿ-kûn lim.

20

I tùi i hiah-ê cha-bó͘-kiáⁿ kóng, Hit-ê lâng tī tah-lo̍h? Lín siáⁿ-sū pàng i tī-hia? tio̍h chhiáⁿ i lâi chia̍h.

21

Mô͘-se gōan kap hit-lâng tiàm; i chiū chiong i ê cha-bó͘-kiáⁿ Se-pho-la̍h, kè hō͘ Mô͘-se.

22

Siⁿ chı̍t ê kiáⁿ; Mô͘-se kā i hō miâ kiò Kek-sūn; in-ūi kóng, Góa kià-kha tī gōa-pang.

23

Le̍k-kè chōe-chōe nî Ai-kı̍p ông sí; Í-sek-lia̍t lâng, in-ūi chòe khó͘-kang, chiū thó͘-khùi âu-kiò; in chòe khó͘-kang âu-kiò ê siaⁿ kàu hō͘ Siōng-tè thiaⁿ-kìⁿ.

24

Siōng-tè thiaⁿ-kìⁿ in ê hiⁿ-hiⁿ-chhan; Siōng-tè chiū kì-tit I kap A-pek-la̍h-hán, Í-sat, Ngá-kok só͘ lı̍p ê iok.

25

Siōng-tè khòaⁿ-kò͘ Í-sek-lia̍t lâng, Siōng-tè iā chai in ê tāi-chì.