Chhut Ai-ki̍p-kì 第 1 章 - 巴克禮全羅

1

Í-sek-lia̍t ê chèng-kiáⁿ ta̍k-ê tòa i ê ke-kòan kap Ngá-kok kàu Ai-kı̍p, in ê miâ kì tī ē-tóe.

2

Liû-piān, Se-biān, Lī-bī, Iû-tāi;

3

Í-sat-ka, Se-pò͘-lûn, Piān-ngá-bín;

4

Tàn, Ná-hut-tha-lī, Ka-tek, A-siat.

5

Tùi Ngá-kok só͘-siⁿ-ê, kiōng ū chhit-cha̍p lâng; Iok-sek í-keng tī Ai-kı̍p.

6

Iok-sek kap i ê hiaⁿ-tī kap hit-tāi ê lâng lóng sí.

7

Í-sek-lia̍t lâng gâu siⁿ, gâu thôan, ke-thiⁿ chōe-chōe, koh heng-ōng, ke̍k-kî kiông-sēng; chhiong-móa hit-ê tōe.

8

Ai-kı̍p ū sin ê ông heng-khí, m̄-bat Iok-sek ê.

9

I tùi i ê peh-sìⁿ kóng, Khòaⁿ ah, chit-ê peh-sìⁿ, Í-sek-lia̍t lâng, pí lán khah-chōe, khah-kiông;

10

lâi ah, lán tio̍h ēng kè-chhek lâi khóan-thāi in, kiaⁿ-liáu in ke-thiⁿ chin-chōe; āu-lâi nā tú-tio̍h kau-chiàn ê sū, in kap lán ê tùi-te̍k liân-ha̍p, lâi kong-kek lán, koh tùi chit-ê tōe chiūⁿ-khì.

11

Tùi án-ni siat-lı̍p tok-kang-ê kóan-hat in, ēng tāng-tàⁿ khó͘-chhó͘ in; in chiū kā Hoat-ló khí Pí-tong Lân-sek nn̄g ê siâⁿ chòe hú-khò͘.

12

Chóng-sī ná khó͘-chhó͘ in, in ná chōe ná khui-khoah. Tùi án-ni chiū ūi-tio̍h Í-sek-lia̍t lâng khòa-lū.

13

Ai-kı̍p lâng chiū tok-chek Í-sek-lia̍t lâng chòe khó͘-kang;

14

hō͘ in chòe-kang tio̍h-bôa, seng-ho̍at kan-khó͘, chhiau-thô͘ chòe-chng, kap choh chhân-nı̍h hiah-ê kang; tī it-chhè só͘ chòe ê kang bô-m̄-sī chin-giâm.

15

Ū Hi-pek-lâi ê khioh-chiá-bú, chı̍t-ê miâ Si-hut-la̍h, chı̍t-ê miâ Phó͘-a.

16

Ai-kı̍p ông tùi in kóng, Lín kā Hi-pek-lâi ê hū-jîn-lâng khioh kiáⁿ, khòaⁿ in lîm-phûn ê sî; nā sī ta-po͘ gín-á, tio̍h hō͘ i sí; nā sī cha-bó͘ gín-á, thang hō͘ i o̍ah.

17

Chóng-sī khioh-chiá-bú kèng-ùi Siōng-tè, bô chiàu Ai-kı̍p ông ê bēng-lēng lâi kiâⁿ, kéng-jiân lâu ta-po͘ gín-á ê o̍ah-miā.

18

Ai-kı̍p ông chiū kiò khioh-chiá-bú lâi, tùi in kóng, Lín siáⁿ-sū án-ni chòe, lâu ta-po͘ gín-á ê o̍ah-miā?

19

Khioh-chiá-bú tùi Hoat-ló kóng, Hi-pek-lâi ê hū-jîn-lâng kap Ai-kı̍p ê hū-jîn-lâng bô tâng; in khah khòai-piān, khioh-chiá-bú iáu-bē kàu, in í-keng siⁿ-liáu.

20

Siōng-tè hó khóan-thāi khioh-chiá-bú; peh-sìⁿ ke-thiⁿ chin-chōe, ke̍k-kî kiông-sēng.

21

Khioh-chiá-bú in-ūi kèng-ùi Siōng-tè, Siōng-tè chiū hō͘ in chiâⁿ-ke.

22

Hoat-ló hoan-hù i ê chèng peh-sìⁿ kóng, Hōan só͘ siⁿ ê ta-po͘-kiáⁿ lín tio̍h kā i hiat-lo̍h hô; it-chhè ê cha-bó͘-gín-á, lín tio̍h lâu i ê sìⁿ-miā.