Chhòng-sè-kì 第 50 章 - 巴克禮全羅

1

Iok-sek phak tī i ê lāu-pē ê bīn, thî-khàu, chim-i.

2

Iok-sek hoan-hù su-hāu i ê i-seng, ēng hiuⁿ-liāu kòan i ê lāu-pē; i-seng chiū ēng hiuⁿ-liāu kòan Í-sek-lia̍t.

3

Kòan sin-si tiāⁿ-tio̍h ê lē tio̍h sì-cha̍p jı̍t; hit ê sì-cha̍p jı̍t móa, koh Ai-kı̍p lâng ūi i thî-khàu chhit-cha̍p jı̍t.

4

Ūi-tio̍h i thî-khàu ê jı̍t í-keng kè, Iok-sek tùi Hoat-ló ke-lāi ê lâng kóng, Góa nā tī lín ê bīn-chêng tit-tio̍h un-tián, chhiáⁿ lín thong-ti Hoat-ló, kā i kóng,

5

Góa ê lāu-pē kah góa chiù-chōa kóng, Góa beh sí lah, lí tio̍h chiong góa bâi-chòng tī Ka-lâm tōe, tī góa ūi pún-sin só͘ ku̍t ê bōng; taⁿ kiû lí chún góa chiūⁿ-khì bâi-chòng góa ê lāu-pē, jiân-āu góa beh tò-tńg-lâi.

6

Hoat-ló kóng, Lí thang chiūⁿ-khì bâi-chòng lí ê lāu-pē, chiàu i só͘ kah lí chiù ê chōa.

7

Tùi án-ni Iok-sek chiūⁿ-khì bâi-chòng i ê lāu-pē; kap i saⁿ-kap chiūⁿ-khì ê, ū Hoat-ló ê chèng jîn-sîn, kap Hoat-ló ke-lāi ê tióng-ló, kap Ai-kı̍p kok chèng tióng-ló.

8

Koh ū Iok-sek chôan-ke, kap i hiah ê hiaⁿ-tī, í-kı̍p i ê lāu-pē ê ke-kòan; chí-ū in ê gín-á, kap iûⁿ-kûn gû-kûn, lóng lâu tī Ko-san tōe.

9

Koh ū chhia kap khiâ-bé-ê, hit-tīn ê lâng put-chí chōe.

10

In kàu Iok-tàn hô gōa, A-ta̍t ê gō͘-kak-tiûⁿ, chiū tī-hia tōa thî-khàu, tōa ai-siong; Iok-sek ūi-tio̍h lāu-pē pi-ai chhit-jı̍t.

11

Ka-lâm tōe khiā-khí ê peh-sìⁿ khòaⁿ-kìⁿ A-ta̍t gō͘-kak-tiûⁿ ê thî-khàu, chiū kóng, Che sī Ai-kı̍p lâng chı̍t-tiûⁿ ê tōa thî-khàu; in-ūi án-ni, hit ê tōe miâ kiò A-pek-be̍k-se, sī tī Iok-tàn hô gōa.

12

Ngá-kok hiah ê kiáⁿ chiū chiàu lāu-pē só͘ hoan-hù-ê kā i chòe;

13

hiah ê kiáⁿ chiong i ūn kàu Ka-lâm tōe, bâi-chòng tī Bān-lī ê thâu-chêng, Be̍k-pí-la̍h chhân-nı̍h ê hia̍t, hit ê hia̍t kap chhân sī A-pek-la̍h-hán tùi Hek-lâng Í-hut-lûn bóe chòe gia̍p, lâi chòe bōng-tōe ê.

14

Iok-sek bâi-chòng in lāu-pē í-āu, chiū kap chèng hiaⁿ-tī, í-kı̍p it-chhè kap i chiūⁿ-khì bâi-chòng in lāu-pē ê lâng, lóng tò-tńg Ai-kı̍p.

15

Iok-sek hiah ê hiaⁿ khòaⁿ in lāu-pē í-keng sí, chiū kóng, Kiám-chhái Iok-sek beh òan-hūn lán, chiàu lán chêng khóan-thāi i lóng-chóng ê pháiⁿ, it-chīn pò-èng lán.

16

In chiū thok lâng khì kìⁿ Iok-sek kóng, Lí ê lāu-pē bē sí ê tāi-seng, hoan-hù kóng,

17

Lín tio̍h tùi Iok-sek án-ni kóng, Chêng lí chiah ê hiaⁿ pháiⁿ khóan-thāi lí, kiû lí sià-bián in ê kè-sit kap chōe-ok; taⁿ kiû lí sià-bián lí ê lāu-pē ê Siōng-tè ê lô͘-po̍k ê kè-sit. In tùi Iok-sek kóng chiah ê ōe, Iok-sek chiū thî-khàu.

18

I chiah ê hiaⁿ koh lâi phak tī i bīn-chêng kóng, Góan sī lí ê lô͘-po̍k.

19

Iok-sek kā in kóng, M̄-bián kiaⁿ; góa kiám thòe Siōng-tè mah?

20

Chêng lín ê ì-sù sī pháiⁿ, chóng-sī Siōng-tè ê ì-sù sī hó; beh pó-chôan chōe-chōe lâng ê sìⁿ-miā, chhin-chhiūⁿ kin-á-jı̍t.

21

Taⁿ lín m̄-bián kiaⁿ; góa beh iúⁿ-chhī lín, kap lín ê kiáⁿ-jî. Tùi án-ni Iok-sek ēng chhin-ài ê ōe an-ùi in.

22

Iok-sek kap in lāu-pē ê ke-kòan lóng tiàm Ai-kı̍p; Iok-sek chia̍h pah-it hè.

23

Iok-sek tit-tio̍h khòaⁿ-kìⁿ Í-hoat-liân tē-saⁿ tāi ê sun; Má-ná-se ê sun Má-kiat ê kiáⁿ, Iok-sek ia̍h phō in tī kha-thâu-u.

24

Iok-sek tùi i ê hiaⁿ-tī kóng, Góa beh sí lah; chóng-sī Siōng-tè tek-khak khòaⁿ-kò͘ lín, chhōa lín tùi chit só͘-chāi chiūⁿ-khì, kàu I chiù-chōa èng-ún hō͘ A-pek-la̍h-hán, Í-sat, Ngá-kok ê tōe.

25

Iok-sek kah Í-sek-lia̍t ê kiáⁿ-sun chiù-chōa kóng, Siōng-tè tek-khak chiàu-kò͘ lín, lín tio̍h chiong góa ê kut-thâu ūn-chiūⁿ-khì. Iok-sek sí, tú-á pah-it hè; lâng ēng hiuⁿ-liāu kā i kòan; chiong i siu-lo̍h koan, thêng tī Ai-kı̍p.53