Chhut Ai-ki̍p-kì 第 21 章 - 巴克禮全羅

1

Lí tī peh-sìⁿ ê bīn-chêng só͘ tio̍h lı̍p ê hoat-tō͘ sī án-ni.

2

Lí nā bóe Hi-pek-lâi lâng chòe lô͘-po̍k, i beh ho̍k-sāi lí, la̍k-nî kú, tē-chhit nî i thang chū-iû pe̍h-pe̍h chhut-khì;

3

i nā toaⁿ-sin lâi, chiū toaⁿ-sin chhut-khì; i nā ū bó͘, i ê bó͘ chiū kap i chhut-khì;

4

i ê chú-lâng nā kā i chhōa-bó͘, bó͘ kā i siⁿ-kiáⁿ á sī cha-bó͘-kiáⁿ, bó͘ kap kiáⁿ-jî tio̍h kui chú-lâng; i tio̍h toaⁿ-sin chhut-khì.

5

Siat-sú lô͘-po̍k bêng-bêng kóng, Góa thiàⁿ góa ê chú-lâng, kap góa ê bó͘, góa ê kiáⁿ-jî, m̄-ài chhut-khì chū-iû;

6

i ê chú-lâng chiū tio̍h tòa i kàu koaⁿ-hú hia, koh tio̍h chhōa i óa-kūn mn̂g, á-sī mn̂g-khiā, chú-lâng tio̍h ēng chǹg-á chǹg i ê hī-á; i chiū éng-óan ho̍k-sāi-i.

7

Lâng nā bōe cha-bó͘-kiáⁿ chòe lú-pī, i bô thang chhin-chhiūⁿ lô͘-po̍k án-ni chhut-khì.

8

Chú-lâng nā tiāⁿ-tio̍h siu-i, āu-lâi khòaⁿ bô tiòng-ì, chiū tio̍h chún i sio̍k-sin; chú-lâng í-keng phiàn i, chiū bô kôan thang bōe i hō͘ gōa-pang lâng.

9

Chú-lâng nā tiāⁿ-tio̍h i hō͘ ka-kī ê kiáⁿ, chiū tio̍h khóan-thāi i chhin-chhiūⁿ cha-bó͘-kiáⁿ.

10

Nā ū koh chhōa chı̍t-ê, chiū i ê chia̍h, chhēng, kap phòe-ha̍p ê sū, iû-gôan m̄-thang kiám-chió.

11

Nā bô tùi i kiâⁿ chit saⁿ-hāng, i chiū thang pe̍h-pe̍h chhut-khì, bián ēng gûn sio̍k.

12

Phah-sí lâng-ê tek-khak tio̍h hō͘ i sí.

13

Lâng nā m̄-sī bâi-ho̍k-teh thâi-lâng, chiū-sī Siōng-tè kau tī i ê chhiú, Góa chiū kā lí siat chı̍t ê só͘-chāi, i thang cháu-khì hia.

14

Lâng nā chū-choan kong-kek i ê chhù-piⁿ, ēng khúi-khiat ê kè-bô͘, chiū nā tī Góa ê tôaⁿ, ia̍h tio̍h lia̍h-khì hō͘ i sí.

15

Phah lāu-pē á-sī lāu-bú-ê, tek-khak tio̍h hō͘ i sí.

16

Kóai lâng khì bōe-ê, á-sī iáu tī i ê chhiú, tek-khak tio̍h hō͘ i sí.

17

Chiù-chó͘ lāu-pē á-sī lāu-bú-ê, tek-khak tio̍h hō͘ i sí.

18

Lâng nā oan-ke, chit-ê ēng chio̍h-thâu á-sī kûn-thâu-bú phah hit-ê, iáu bô tì-kàu sí, put-kò tó tī bîn-chhn̂g;

19

nā ōe koh khí-lâi, óa kóaiⁿ-á chhut-khì, hit-ê phah i-ê, thang sǹg bô-chōe; to̍k-to̍k tio̍h pê i bōe chòe kang ê chîⁿ, iā tio̍h kā-i i kàu lóng hó.

20

Lâng nā ēng thûi-á phah i ê lô͘-po̍k, á-sī i ê lú-pī, tì-kàu liâm-piⁿ sí, i tek-khak tio̍h siū hêng-ho̍at;

21

nā kè chı̍t-nn̄g jı̍t chiah sí, chiū thang bián siū hêng-ho̍at, in-ūi sī i ê gûn bóe-ê.

22

Lâng nā saⁿ-phah, siong-hāi ū sin-īn ê hū-jîn-lâng, tì-kàu ka-la̍uh-sin, āu-lâi bô pa̍t-hāng ê hāi, hit-lâng tio̍h ho̍at-gûn, chiàu hū-jîn-lâng ê tiōng-hu só͘ tēng-ê; tī koaⁿ-hú ê bīn-chêng hō͘ i.

23

Nā ū pa̍t-hāng ê siong-hāi, chiū tio̍h ēng miā pê miā.

24

Ba̍k-chiu pê ba̍k-chiu, chhùi-khí pê chhùi-khí, chhiú pê chhiú,

25

kha pê kha, sio pê sio, siong pê siong, phah pê phah.

26

Lâng nā phah-pháiⁿ i ê lô͘-po̍k, á-sī i ê lú-pī, chı̍t-lúi ba̍k-chiu, chiū tio̍h in-ūi i ê ba̍k-chiu pàng i khì chū-iû.

27

Nā phah-lak i ê lô͘-po̍k, á-sī i ê lú-pī, chı̍t ki chhùi-khí, chiū tio̍h in-ūi i ê chhùi-khí pàng i khì chū-iû.

28

Gû nā tak-sí chı̍t ê ta-po͘-lâng, á-sī chı̍t ê hū-jîn-lâng, tio̍h ēng chio̍h-thâu tìm-sí hit chiah gû, chóng-sī m̄-thang chia̍h i ê bah; gû ê chú-lâng sǹg bô chōe.

29

Siat-sú hit chiah gû pêng-sò͘ ōe tak-lâng, ū lâng pò i ê chú-lâng chai, i kèng-jiân bô chiong gû koaiⁿ-teh, tì-kàu tak-sí ta-po͘-lâng á-sī hū-jîn-lâng; chiū tio̍h ēng chio̍h-thâu tìm-sí hit chiah gû, gû ê chú-lâng iā tio̍h sí.

30

Nā sī gí-tiāⁿ ēng gûn sio̍k sìⁿ-miā, chiū tio̍h chiàu só͘ gí-tiāⁿ-ê, lâi sio̍k i ê sìⁿ-miā.

31

Gû bô-lūn tak-tio̍h lâng ê kiáⁿ á-sī cha-bó͘-kiáⁿ, tio̍h chiàu chit-ê lē pān-i.

32

Gû nā tak-tio̍h lô͘-po̍k á-sī lú-pī, tio̍h ēng gûn saⁿ-cha̍p sià-khek-le̍k hō͘ in ê chú-lâng; iā tio̍h ēng chio̍h-thâu tìm-sí gû.

33

Lâng nā hian-khui chíⁿ, á-sī ku̍t chíⁿ, bô khàm-kòa, ū gû á-sī lû po̍ah tī hit lāi-bīn,

34

chíⁿ ê chú-lâng tio̍h pê, iā tio̍h the̍h gûn hō͘ i ê chú; sí ê cheng-siⁿ kui ka-kī.

35

Chit-lâng ê gû nā tak-tio̍h hit lâng ê gû, tì-kàu sí, in tio̍h bōe o̍ah ê gû, kè-chîⁿ pîⁿ-pun, sí ê gû iā tio̍h pîⁿ-pun.

36

Lâng nā chai chit chiah gû pêng-sò͘ ōe tak-lâng, chú-lâng kèng-jiân bô chiong gû koaiⁿ-teh, i chiū tio̍h ēng gû pê gû, sí ê gû kui ka-kī.