Chhut Ai-ki̍p-kì 第 22 章 - 巴克禮全羅

1

Lâng nā thau-khan gû, á-sī iûⁿ, bô-lūn thâi á-sī bōe, chı̍t chiah gû tio̍h pê i gō͘ chiah, chı̍t chiah iûⁿ tio̍h pê sì-chiah.

2

Chha̍t nā iah-khang, hō͘ lâng tú-tio̍h, kā i phah-sí, chiū bô sǹg i ū phah-sí lâng ê chōe.

3

Nā jı̍t-thâu í-keng chhut, chiū sǹg i ū phah-sí lâng ê chōe. Chha̍t tek-khak tio̍h pê; nā bô thang pê, chha̍t tio̍h bōe sin, lâi tí i só͘ thau-ê.

4

Nā i só͘ thau-ê, kiám-chhái gû, á-sī lû, iûⁿ, iáu o̍ah tī i ê chhiú, chiū tio̍h pê têng-pē.

5

Lâng nā tī chhân-nı̍h, á-sī phû-tô-hn̂g, pàng cheng-siⁿ, chhut-chāi i chia̍h pa̍t-lâng ê chhân, chiū tio̍h ēng ka-kī ê chhân-nı̍h siōng hó-ê, kap phû-tô-hn̂g siōng hó-ê lâi pê-i.

6

Nā hé sio chhì-phè, sòa sio-tio̍h tiū-tui, á-sī iáu-bē koah ê tiū, á-sī chhân-hn̂g, chiū khí-hé ê lâng tek-khak tio̍h pê.

7

Lâng nā chiong gûn á-sī mı̍h-kiāⁿ, kau-tài chhù-piⁿ kò͘-siú, chiah-ê mı̍h, nā tùi hit-lâng ê ke tio̍h chha̍t thau, chha̍t nā lia̍h-tio̍h, chha̍t tio̍h pê têng-pē;

8

chha̍t nā lia̍h-bô-tio̍h, hit-ê ke-chú tio̍h kàu koaⁿ-hú bīn-chêng, khòaⁿ i ū the̍h chhù-piⁿ ê mı̍h-kiāⁿ á-bô.

9

Kìⁿ-nā ū kè-sit, kiám-chhái sī ūi-tio̍h gû, lû, iûⁿ, á-sī ūi-tio̍h i-chiûⁿ á-sī sím-mı̍h sit-lo̍h ê mı̍h, ū lâng jīn-tit sī i-ê, siang-pêng ê àn-kiāⁿ tio̍h kàu koaⁿ-hú ê bīn-chêng; koaⁿ-hú nā tòan-tēng sím-mı̍h lâng ū chōe, hit-lâng tio̍h pê i ê chhù-piⁿ têng-pē.

10

Lâng nā chiong lû, á-sī gû, á-sī iûⁿ, á-sī pa̍t-hō cheng-siⁿ, kau-tài chhù-piⁿ kò͘-siú, cheng-siⁿ kiám-chhái sí, á-sī siū-siong, á-sī hō͘ lâng khan-khì, bô lâng khòaⁿ-kìⁿ;

11

nn̄g-lâng ê tiong-kan, tio̍h kí Iâ-hô-hoa chiù-chōa, m̄-bat the̍h chhù-piⁿ ê mı̍h, gôan-chú chiū tio̍h soah, kò͘-siú ê lâng m̄-bián pê.

12

Cheng-siⁿ nā tùi kò͘-siú ê lâng hia hō͘ lâng thau-khì, i chiū tio̍h pê gôan-chú.

13

Nā siū iá-siù thiah-chhùi, kò͘-siú ê lâng tio̍h tòa i lâi chòe chèng-kù; só͘ thiah-chhùi-ê chiū m̄-bián pê.

14

Lâng nā tùi chhù-piⁿ chioh sím-mı̍h mı̍h, só͘ chioh-ê kiám-chhái siū-siong á-sī sí, gôan-chú bô saⁿ-kap tī-teh, i tek-khak tio̍h pê.

15

Nā gôan-chú saⁿ-kap tī-teh, i chiū m̄-bián pê; nā sī cho͘-ê, iā m̄-bián pê, in-ūi pún ū cho͘-chîⁿ.

16

Lâng nā ín-iú bē siū phèng ê cha-bó͘-gín-ná kap i tâng-pâng, i tio̍h phèng i chòe-bó͘.

17

Nā i ê lāu-pē koat-tòan m̄-khéng chiong cha-bó͘-kiáⁿ phòe-i, i chiū tio̍h chiàu chāi-sek-lú ê phèng-lé, hō͘ i gûn.

18

Chòe ang-î-ê, tio̍h hō͘ i sí.

19

Kìⁿ-nā kap siù îm-ê, tek-khak tio̍h hō͘ i sí.

20

Bô choan-choan chè-sū Iâ-hô-hoa, lâi chè-sū pa̍t ê siōng-tè-ê, tio̍h bia̍t-i.

21

M̄-thang khi-hū chhut-gōa lâng, iā m̄-thang ap-chè i; in-ūi lín tī Ai-kı̍p tōe iā bat chòe chhut-gōa lâng.

22

M̄-thang pháiⁿ khóan-thāi kóaⁿ-hū kap ko͘-jî.

23

Nā sió-khóa pháiⁿ khóan-thāi-in, in kiû-kiò Góa, Góa tek-khak beh thiaⁿ in ê kiû-kiò.

24

Iā beh tōa siū-khì, ēng to thâi-lín; hō͘ lín ê bó͘ chòe kóaⁿ-hū, lín ê kiáⁿ chòe ko͘-jî.

25

Góa ê peh-sìⁿ-tiong ū sòng-hiong lâng kap lín khiā-khí, lí nā chioh i gûn, lí m̄-thang chhin-chhiūⁿ chè-chú khóan-thāi i, iā m̄-thang the̍h i ê lī-sek.

26

Lí nā the̍h chhù-piⁿ ê i-chiûⁿ chòe chún-tǹg, jı̍t-lo̍h chiū tio̍h hêng-i;

27

i chí-ū chit-kiāⁿ thang kah, sī i jia seng-khu ê saⁿ; nā bô, i beh cháiⁿ-iūⁿ khùn? i kiû-Góa, Góa beh thiaⁿ, in-ūi Góa sī chû-pi-ê.

28

M̄-thang húi-pòng koaⁿ-hú; iā m̄-thang mē lí ê peh-sìⁿ ê sī-tōa.

29

Lí tio̍h tùi só͘ siu-sêng ê gō͘-kak, kap chiú-khut-lāi só͘ lâu-chhut ê chiú, the̍h-lâi hiàn, m̄-thang iân-chhiân.

30

Lí tio̍h chiong thâu-chiūⁿ ê kiáⁿ kui tī Góa; lí ê gû, lí ê iûⁿ, iā tio̍h án-ni; chhit-jı̍t thang tè i ê bú, tī poeh-jı̍t tio̍h kui tī Góa.

31

Lín tio̍h ūi-tio̍h Góa chòe sèng ê peh-sìⁿ; só͘-í chhân-nı̍h iá-siù só͘ thiah-lı̍h ê bah, lín m̄-thang chia̍h, tio̍h hiat hō͘ káu.