Chhut Ai-ki̍p-kì 第 24 章 - 巴克禮全羅

1

Iâ-hô-hoa kā Mô͘-se kóng, Lí kap A-lûn, Ná-tap, A-pí-hō͘, kap Í-sek-lia̍t tiúⁿ-ló-tiong chhit-cha̍p lâng, lóng tio̍h chiūⁿ kàu Iâ-hô-hoa chia, hn̄g-hn̄g phak-lo̍h-khì pài.

2

To̍k-to̍k Mô͘-se thang chhin-kūn Iâ-hô-hoa, kî-û m̄-thang chhin-kūn; peh-sìⁿ iā m̄-thang kap i chiūⁿ-lâi.

3

Mô͘-se kàu, chiong Iâ-hô-hoa it-chhè ê ōe, it-chhè ê hoat-tō͘, kóng hō͘ peh-sìⁿ thiaⁿ; chèng peh-sìⁿ tâng-siaⁿ ìn kóng, Iâ-hô-hoa só͘ kóng ê ōe, góan beh lóng chun-thàn.

4

Mô͘-se chiong Iâ-hô-hoa ê ōe, lóng siá-khí-lâi; thàu-chá khí-lâi, tī soaⁿ-ē khí chı̍t chō tôaⁿ, chiàu Í-sek-lia̍t cha̍p-jī chi-phài, khiā cha̍p-jī ki thiāu.

5

Koh chhe Í-sek-lia̍t-tiong ê siàu-liân lâng, khì hiàn sio-chè. Iā ēng gû chòe pêng-an-chè, hiàn hō͘ Iâ-hô-hoa.

6

Mô͘-se chiong huih ê chı̍t-pòaⁿ tóe tī phûn-nı̍h, chı̍t-pòaⁿ hiù tī tôaⁿ-nı̍h.

7

Koh the̍h iok ê chheh, tha̍k hō͘ peh-sìⁿ thiaⁿ; in kóng, Iâ-hô-hoa só͘ kóng-ê, góan beh lóng chun-thàn lâi kiâⁿ.

8

Mô͘-se chiong huih hiù peh-sìⁿ, kóng, Khòaⁿ ah, che sī lı̍p-iok ê huih, sī Iâ-hô-hoa chiàu che it-chhè ê ōe kap lín só͘ lı̍p-ê.

9

Mô͘-se, A-lûn, Ná-tap, A-pí-hō͘, kap Í-sek-lia̍t tiúⁿ-ló-tiong chhit-cha̍p-lâng, lóng chiūⁿ-khì.

10

In khòaⁿ-kìⁿ Í-sek-lia̍t ê Siōng-tè, I ê kha-ē ū chhin-chhiūⁿ pîⁿ-pho͘ ê lâm-pó-chio̍h, chhin-chhiūⁿ thiⁿ gôan-chit-ê kng-liāng.

11

I bô chhut-chhiú hāi Í-sek-lia̍t chun-kùi ê lâng; in khòaⁿ-kìⁿ Siōng-tè, in iā chia̍h iā lim.

12

Iâ-hô-hoa kā Mô͘-se kóng, Lí chiūⁿ-soaⁿ chiū-kūn Góa, tiàm tī-chia, Góa beh chiong chio̍h-pi kap lu̍t-hoat, í-kı̍p kài-bēng, Góa só͘ siá-ê, siúⁿ-sù lí, thang kà-sī in.

13

Mô͘-se kap kun-sûi i ê Iok-su-a khí-lâi; Mô͘-se chiūⁿ Siōng-tè ê soaⁿ;

14

kā tiúⁿ-ló kóng, Lín tiàm chia tán góan, thèng-hāu góan tò-tńg-lâi lín chia; khòaⁿ ah, A-lûn Hō͘-jíⁿ kap lín tī-teh; lâng nā ū tāi-chì, thang lâi chhē in.

15

Mô͘-se chiūⁿ soaⁿ, soaⁿ ū hûn jia-khàm.

16

Iâ-hô-hoa ê êng-kng thêng tī Se-nái soaⁿ, hûn jia i la̍k-jı̍t kú; tē-chhit jı̍t I tùi hûn-tiong kiò Mô͘-se.

17

Iâ-hô-hoa êng-kng ê khóan-sit, chhin-chhiūⁿ hé sio tī soaⁿ-téng; Í-sek-lia̍t lâng chhin-ba̍k khòaⁿ-kìⁿ.

18

Mô͘-se jı̍p hûn-tiong chiūⁿ-soaⁿ; Mô͘-se tī soaⁿ-téng sì-cha̍p jı̍t sì-cha̍p-mî.