Chhut Ai-ki̍p-kì 第 25 章 - 巴克禮全羅

1

Iâ-hô-hoa kā Mô͘-se kóng,

2

Lí kā Í-sek-lia̍t lâng kóng, Tio̍h hiàn lé-mı̍h hō͘ Góa; kìⁿ-nā sim só͘ kam-gōan-ê, lín thang kā i siu-lâi, chòe lé-mı̍h hō͘ Góa.

3

Só͘ tio̍h siu ê lé-mı̍h, chiū-sī kim, gûn, tâng,

4

lâm-sek, chí-sek, chu-âng-sek ê liāu, iù-tōe, soaⁿ-iûⁿ-mn̂g,

5

ní âng ê kang-iûⁿ-phê, hái-káu phê,

6

chō-kiap-chhâ, tiám teng ê iû, phang-phang ê phín-liāu, thang chòe ko-iû lâi boah, iā chòe phang-hiuⁿ,

7

âng-bé-ló, kap pa̍t-iūⁿ ê pó-chio̍h, thang siuⁿ í-hut-tek kap pó͘-kòa.

8

In tio̍h kā Góa khí sèng ê só͘-chāi, hō͘ Góa thang tiàm tī in tiong-kan.

9

Chiàu Góa it-chhè só͘ chí-sī lí ê, chiū-sī hōe-bō͘ ê khóan-sit, kap lāi-tiong khì-kū khóan-sit, lín tio̍h chiàu án-ni lâi chō.

10

In tio̍h ēng chō-kiap-chhâ chòe chı̍t ê kūi, tn̂g nn̄g-tiú-pòaⁿ, khoah tiú-pòaⁿ, kôaiⁿ tiú-pòaⁿ.

11

Lí tio̍h ēng hó-kim pau, lāi-gōa lóng tio̍h pau; sì-ûi tio̍h khí kim-sòaⁿ.

12

Lí tio̍h kā i chù sì ê kim-khôan, an tī i ê sì-kha, chit-pêng nn̄g-khôan, hit-pêng nn̄g-khôan.

13

Tio̍h ēng chō-kiap-chhâ chòe nn̄g ki kǹg, ēng kim pau i.

14

Tio̍h chiong kǹg chhng tī kūi-piⁿ ê khôan-lāi, thang ēng lâi kng kūi;

15

chiah-ê kǹg tio̍h siông-siông tī kūi ê khôan-lāi, m̄-thang thiu-chhut-lâi.

16

Tio̍h ēng Góa só͘ beh siúⁿ-sù lí ê lu̍t-hoat hē tī kūi-lāi.

17

Tio̍h ēng hó-kim chòe si-un-só͘, tn̂g nn̄g-tiú-pòaⁿ, khoah tiú-pòaⁿ.

18

Tio̍h ēng kim chòe nn̄g ê ki-lō͘-peng, ēng phah ê hoat chòe-i, tī si-un-só͘ ê siang-thâu.

19

Chit-thâu chòe chı̍t ê ki-lō͘-peng, hit-thâu chòe chı̍t ê ki-lō͘-peng; siang-thâu ê ki-lō͘-peng, kap si-un-só͘, tio̍h kui-tè, chòe saⁿ-liân.

20

Nn̄g ê ki-lō͘-peng tio̍h kôaiⁿ-kôaiⁿ thí-khui sı̍t, ēng in ê sı̍t jia si-un-só͘; in ê bīn tio̍h saⁿ-tùi; ki-lō͘-peng ê bīn tio̍h àⁿ si-un-só͘.

21

Tio̍h chiong si-un-só͘ an tī kūi-téng, koh chiong Góa só͘ beh siúⁿ-sù lí ê lu̍t-hoat hē tī kūi-lāi.

22

Góa beh tī-hia kap lí chū-hōe, koh beh tùi si-un-só͘ téng, chiū-sī tùi hoat-kūi téng, nn̄g ê ki-lō͘-peng ê tiong-kan, kap lí kóng Góa só͘ beh hoan-hù lí thôan hō͘ Í-sek-lia̍t lâng it-chhè ê sū.

23

Lí tio̍h ēng chō-kiap-chhâ chòe chı̍t tè toh, tn̂g nn̄g-tiú, khoah chı̍t-tiú, kôaiⁿ tiú-pòaⁿ.

24

Tio̍h ēng hó-kim pau, sì-ûi khí kim-sòaⁿ.

25

Toh ê sì-ûi, kok chòe chı̍t pa-chiúⁿ khoah ê hôaiⁿ-niû, hôaiⁿ-niû-téng sì-ûi khí kim-sòaⁿ.

26

Lí tio̍h chòe sì ê kim-khôan, an tī i ê sì-kha ê sì-kak.

27

An khôan ê só͘-chāi tio̍h óa-kūn hôaiⁿ-niû, thang chhng-kǹg lâi kng toh.

28

Tio̍h ēng chō-kiap-chhâ chòe nn̄g ki kǹg ēng kim pau-i, thang ēng lâi kng toh.

29

Tio̍h chòe pôaⁿ, óaⁿ, poe, pân, thang lâi kòan-tiān, lóng tio̍h ēng hó-kim chòe.

30

Toh-téng siông-siông hē pâi-lia̍t ê piáⁿ tī Góa ê bīn-chêng.

31

Lí tio̍h ēng hó-kim chòe chı̍t ê teng-tâi; teng-tâi ê chō, kap tiong-thiāu, i ê poe, i ê ba̍k, i ê hoe, lóng ēng phah ê hoat, chòe kui-chō.

32

Tī i ê piⁿ-á tio̍h pun-chhut la̍k-ki; teng-tâi ê chit-pêng tio̍h ū saⁿ-ki, teng-tâi ê hit-pêng tio̍h ū saⁿ-ki.

33

Chit-pêng múi-ki ū saⁿ ê poe, khóan-sit chhin-chhiūⁿ hēng-hoe, ū ba̍k ū hoe; hit-pêng múi-ki iā ū saⁿ ê poe, khóan-sit chhin-chhiūⁿ hēng-hoe, ū ba̍k ū hoe; tùi teng-tâi pun-chhut ê la̍k-ki lóng sī án-ni.

34

Teng-tâi-thiāu ū sì ê poe, khóan-sit chhin-chhiūⁿ hēng-hoe, ū i ê ba̍k kap i ê hoe.

35

Nn̄g-ki ê ē-bīn ū chı̍t ba̍k kap i saⁿ-liân, koh nn̄g-ki ê ē-bīn ū chı̍t ba̍k kap i saⁿ-liân, koh nn̄g-ki ê ē-bīn ū chı̍t-ba̍k kap i saⁿ-liân; teng-tâi só͘ chhut ê la̍k-ki lóng sī án-ni.

36

Hiah-ê ba̍k kap hiah-ê ki, lóng kap i liân chòe chı̍t-ê, lóng ēng hó-kim, chiàu phah ê hoat chòe.

37

Tio̍h kā i chòe chhit-ê teng-chóaⁿ, tio̍h tiám hiah-ê teng, hō͘ i chiò-kng tī tùi-bīn.

38

Teng-tâi ê chián kap i ê pôaⁿ, lóng tio̍h ēng hó-kim chòe-i.

39

Chòe teng-tâi kap che it-chhè ê khì-kū, ēng hó-kim chı̍t tha-liân-tek.

40

Lí tio̍h kín-sīn chòe chiah-ê mı̍h-kiāⁿ, lóng tio̍h chiàu tī soaⁿ-téng chí-sī lí ê khóan-sit.