Chhut Ai-ki̍p-kì 第 26 章 - 巴克禮全羅

1

Lí chòe hōe-bō͘ tio̍h ēng cha̍p-pak ê tiùⁿ; chiah-ê tiùⁿ sī ēng kè-pháng ê iù-tōe, kap lâm-sek, chí-sek, chu-âng-sek ê liāu, iā ēng kî-khiáu ê kang chit-chiâⁿ ki-lō͘-peng, lâi chòe-ê.

2

Múi pak tiùⁿ tio̍h tn̂g jī-cha̍p poeh tiú, khoah sì-tiú; tiùⁿ lóng tio̍h chı̍t-iūⁿ ê chhùn-chhioh.

3

Chit gō͘ pak tiùⁿ tio̍h ta̍k-pak saⁿ-liân; hit gō͘ pak tiùⁿ iā tio̍h ta̍k-pak saⁿ-liân.

4

Tī chit-ê saⁿ-liân ê tiùⁿ, lō͘-bé pak ê piⁿ-á, tio̍h chòe lâm-sek ê liú-phàn; tī hit-ê saⁿ-liân ê tiùⁿ, lō͘-bé pak ê piⁿ-á, ia̍h tio̍h án-ni chòe.

5

Lí tī chit-niá tiùⁿ chòe gō͘-cha̍p ê liú-phàn; koh tī tē-jī niá tiùⁿ, saⁿ-liân ê piⁿ-á, iā chòe gō͘-cha̍p ê liú-phàn; liú-phàn lóng tio̍h nn̄g-ê nn̄g-ê saⁿ-tùi.

6

Koh tio̍h chòe gō͘-cha̍p ê kim-kau lâi kau, hō͘ tiùⁿ saⁿ-liân; chiū chiâⁿ-chòe chı̍t ê hōe-bō͘.

7

Lí tio̍h ēng soaⁿ-iûⁿ-mn̂g chit cha̍p-it pak ê tiùⁿ, chòe hōe-bō͘-téng ê pò͘-pîⁿ;

8

múi pak tiùⁿ tio̍h tn̂g saⁿ-cha̍p tiú, khoah sì tiú; cha̍p-it pak tiùⁿ lóng tio̍h chı̍t-iūⁿ ê chhùn-chhioh.

9

Tio̍h chiong gō͘ pak tiùⁿ liân-chòe chı̍t-pak, koh chiong la̍k pak tiùⁿ liân-chòe chı̍t-pak, hit-ê tē-la̍k pak ê chı̍t-pòaⁿ, hō͘ i sûi-lo̍h tī pò͘-pîⁿ ê thâu-chêng.

10

Tī chit-ê saⁿ-liân ê tiùⁿ, lō͘-bé pak ê piⁿ-á, tio̍h chòe gō͘-cha̍p ê liú-phàn, tī hit-ê saⁿ-liân, lō͘-bé pak ê piⁿ-á, iā chòe gō͘-cha̍p ê liú-phàn.

11

Koh tio̍h chòe gō͘-cha̍p ê tâng-kau, kau tī liú-phàn, hō͘ pò͘-pîⁿ liân chòe chı̍t-ê.

12

Pò͘-pîⁿ ê tiùⁿ só͘ chhun sûi-lo̍h-lâi, chiū-sī só͘ chhun hit-ê pòaⁿ pak tiùⁿ, tio̍h sûi tī hōe-bō͘-āu.

13

Pò͘-pîⁿ ê tiùⁿ só͘ chhun ê tn̂g, chit-pêng chı̍t tiú, hit-pêng chı̍t tiú, tio̍h sûi tī hōe-bō͘ ê siang-pêng lâi jia-i.

14

Koh tio̍h ēng ní-âng kang ê iûⁿ-phê, chòe pò͘-pîⁿ ê kòa; koh ēng hái-káu-phê chòe kòa tī téng-bīn.

15

Lí tio̍h ēng chō-kiap-chhâ chòe hōe-bō͘ khiā ê pán.

16

Khiā ê pán tn̂g cha̍p-tiú, khoah chı̍t tiú pòaⁿ.

17

Ta̍k tè pán tio̍h ū nn̄g ê sún saⁿ-pâi; hōe-bō͘ it-chhè ê pán lóng tio̍h chiàu án-ni chòe.

18

Tio̍h chòe hōe-bō͘ ê pán, lâm-pêng ê lâm-sì jī-cha̍p tè pán.

19

Tī chiah-ê jī-cha̍p tè pán ê ē-bīn, tio̍h chòe sì-cha̍p ê gûn-khū; chı̍t tè pán ê ē-bīn ū nn̄g ê khū lâi chhēng i nn̄g ki sún; koh chı̍t tè pán ê ē-bīn iā ū nn̄g ê khū lâi chhēng i nn̄g ki sún.

20

Hōe-bō͘ tē-jī-bīn, chiū-sī pak-bīn, iā tio̍h chòe pán jī-cha̍p tè, kap in ê gûn-khū sì-cha̍p-ê;

21

chit-ê pán ê ē-bīn ū nn̄g ê khū, hit-ê pán ê ē-bīn iā ū nn̄g ê khū.

22

Hōe-bō͘ ê āu-bīn, chiū-sī sai-bīn, tio̍h chòe la̍k tè pán.

23

Hōe-bō͘ āu-bīn ê nn̄g ê kak-thâu, tio̍h chòe nn̄g tè pán.

24

Pán ê ē-tn̂g, nn̄g-ê saⁿ-tâng, tı̍t-kàu téng-bīn tē-it ê khôan, lóng-sī ka-nn̂g ê; nn̄g-tè lóng sī án-ni, beh chòe kak-thâu ê lō͘-ēng.

25

Tio̍h ū poeh ê pán, kap cha̍p-la̍k ê gûn-khū; chit-ê pán ê ē-bīn ū nn̄g ê khū, hit-ê pán ê ē-bīn iā ū nn̄g ê khū.

26

Lí tio̍h ēng chō-kiap-chhâ chòe hôaiⁿ-kông; ūi-tio̍h hōe-bō͘ chit-pêng ê pán chòe gō͘-ki;

27

ūi-tio̍h hōe-bō͘ hit-pêng ê pán chòe gō͘-ki, koh ūi hōe-bō͘-āu ê sai-bīn chòe gō͘-ki.

28

Pán ê tùi-tiong hit ki hôaiⁿ-kông, tio̍h tùi chit-thâu thàu kàu hit-thâu.

29

Pán tio̍h ēng kim pau; koh tio̍h chòe pán ê kim-khôan lâi thò-kông; kông iā tio̍h ēng kim pau.

30

Tio̍h chiàu tī soaⁿ-téng chí-sī lí ê khóan-sit khí hōe-bō͘.

31

Lí tio̍h ēng lâm-sek, chí-sek, chu-âng-sek ê liāu, kap kè-pháng ê iù-tōe, chit tiùⁿ-lî; chit-ê tiùⁿ-lî ēng kî-khiàu ê kang, chit-chiâⁿ ki-lō͘-peng, lâi chòe-ê.

32

Lí tio̍h ēng chō-kiap-chhâ chòe sì ki thiāu, ēng kim pau i, lâi tiàu tiùⁿ-lî; thiāu ê kau tio̍h kim-ê; thiāu tī sì ê gûn-khu téng.

33

Lí tiàu tiùⁿ-lî tio̍h tī kau ê ē-tóe ê só͘-chāi, chiong hoat-kūi kng-jı̍p tiùⁿ-lî-lāi, chit-ê tiùⁿ-lî sī kā lín keh-khui sèng-só͘ kap chì-sèng-só͘.

34

Koh tio̍h chiong si-un-só͘ an tī chì-sèng-só͘ lāi ê hoat-kūi-téng.

35

Lí tio̍h ēng toh hē tī tiùⁿ-lî-gōa; iā ēng teng-tâi hē tī hōe-bō͘ ê lâm-sì, kap toh saⁿ-tùi; hit-ê toh tio̍h hē tī pak-sì.

36

Lí tio̍h ēng lâm-sek, chí-sek, chu-âng-sek ê liāu, kap kè-pháng ê iù-tōe, ēng siù-hoe ê kang, chòe pò͘-pîⁿ mn̂g ê mn̂g-lî.

37

Tio̍h ēng chō-kiap-chhâ kā mn̂g-lî chòe gō͘ ki thiāu, ēng kim pau-i, thiāu ê kau tio̍h kim-ê. Koh tio̍h kā thiāu chù gō͘ ê tâng-khū.