Chhut Ai-ki̍p-kì 第 27 章 - 巴克禮全羅

1

Lí tio̍h ēng chō-kiap-chhâ chòe tôaⁿ, tn̂g gō͘ tiú khoah gō͘ tiú; chit-ê tôaⁿ sī sù-hong-ê, kôaiⁿ saⁿ tiú.

2

Tio̍h tī tôaⁿ ê sì-kak-thâu chòe sì ki kak, kap tôaⁿ saⁿ-liân chòe chı̍t-ê, ēng tâng pau i.

3

Tio̍h chòe phûn, lâi siu i ê hu, koh chòe i ê thuh-á, i ê pôaⁿ, i ê chhe, i ê hé-tiáⁿ, i it-chhè ê khì-kū, lóng ēng tâng chòe.

4

Tio̍h ēng tâng kā i chòe chı̍t ê bāng, tī bāng ê sì-kak chòe sì ê tâng khôan.

5

Ēng bāng hē tī tôaⁿ sì-bīn ûi-io-pán ê ē-bīn, hō͘ bāng thàu kàu tôaⁿ ê pòaⁿ-io.

6

tio̍h ēng chō-kiap-chhâ kā tôaⁿ chòe kǹg, ēng tâng pau i.

7

Hiah-ê kǹg tio̍h chhng tī khôan-lāi, kǹg tio̍h tī tôaⁿ ê siang-pêng, lâi kng-i.

8

Tio̍h ēng pán chòe tôaⁿ, tiong-ng khang-khak; lóng tio̍h chiàu soaⁿ-téng chí-sī lí ê khóan-sit lâi chòe.

9

Lí tio̍h chòe hōe-bō͘ ê tiûⁿ; tiûⁿ ê lâm-bīn ê lâm-sì, tio̍h ēng kè-pháng ê iù-tōe chòe ûi tī chı̍t-pêng, tn̂g chı̍t-pah tiú.

10

I ê thiāu jī-cha̍p ki, tâng-khū jī-cha̍p ê; thiāu ê kau kap hôaiⁿ-koaiⁿ, lóng tio̍h ēng gûn chòe i.

11

Pak-bīn iā tio̍h ū ûi, tn̂g chı̍t-pah tiú; i ê thiāu jī-cha̍p ki, tâng-khū jī-cha̍p-ê; thiāu ê kau kap hôaiⁿ-koaiⁿ, lóng tio̍h ēng gûn chòe.

12

Tiûⁿ ê sai-bīn tio̍h ū ûi, khoah gō͘-cha̍p tiú; ûi ê thiāu cha̍p-ki, khū cha̍p-ê.

13

Tiûⁿ ê tang-bīn ê tang-sì khoah gō͘-cha̍p tiú.

14

Mn̂g chit-pêng ê ûi tio̍h cha̍p-gō͘ tiú, ûi ê thiāu saⁿ-ki, khū saⁿ-ê.

15

Mn̂g hit-pêng ê ûi iā tio̍h cha̍p-gō͘ tiú; ûi ê thiāu saⁿ-ki, khū saⁿ-ê.

16

Tiûⁿ ê mn̂g tio̍h ū mn̂g-lî, khoah jī-cha̍p tiú, tio̍h ēng lâm-sek, chí-sek, chu-âng-sek ê liāu, kap kè-pháng ê iù-tōe, ēng siù-hoe ê kang chòe; thiāu sì-ki, khū sì-ê.

17

Tiûⁿ sì-ûi it-chhè ê thiāu, lóng tio̍h ū gûn ê hôaiⁿ-koaiⁿ, gûn ê kau, tâng ê khū.

18

Tiûⁿ ê tn̂g chı̍t-pah tiú, khoah ta̍k-bīn gō͘-cha̍p tiú, kôaiⁿ gō͘ tiú; ûi tio̍h ēng kè-pháng ê iù-tōe chòe; i ê khū lóng ēng tâng chòe.

19

Hōe-bō͘ só͘ ēng ta̍k-hāng ê khì-kū, kap só͘ tèng ê teng, í-kı̍p tiûⁿ-lāi só͘ tèng ê teng, lóng tio̍h ēng tâng chòe.

20

Lí tio̍h hoan-hù Í-sek-lia̍t lâng, chiong hit-ê ūi-tio̍h beh chiò-kng só͘ khoeh-chheng ê kaⁿ-ná-iû, the̍h-lâi hō͘ lí, hō͘ teng siông-siông tiám-teh.

21

Tī hōe-bō͘-tiong hoat-kūi-chêng ê tiùⁿ-lî gōa, A-lûn kap i ê kiáⁿ, tùi ê-hng kàu thiⁿ-kng tio̍h tī Iâ-hô-hoa bīn-chêng liāu-lí-i; sī chòe Í-sek-lia̍t lâng tāi-tāi éng-óan ê lē.