Chhut Ai-ki̍p-kì 第 31 章 - 巴克禮全羅

1

Iâ-hô-hoa tùi Mô͘-se kóng,

2

Khòaⁿ ah, Iû-tāi chi-phài, Hō͘-jíⁿ ê sun, Ou-lī ê kiáⁿ, Pí-sat-lia̍t, Góa í-keng chí-miâ lâi tiàu i;

3

Góa ēng Siōng-tè ê sîn chhiong-móa i, hō͘ i ū tì-hūi, ū chhang-miâ, ū chai-bat, ōe chòe ta̍k-iūⁿ ê kang;

4

ōe siūⁿ-chhut kî-khiáu ê kang, lâi chòe kim, gûn, tâng, hiah-ê mı̍h;

5

iā ōe khek pó-chio̍h lâi jı̍p i; iā ōe khek chhâ, ōe chòe ta̍k-iūⁿ kî-khiáu ê kang.

6

Góa iā phài Tàn ê chi-phài, A-hi-sat-boat ê kiáⁿ, A-hô-lī-a-pek, kap i saⁿ-kap chòe; kìⁿ-nā sim-lāi ū tì-hūi ê, Góa koh siúⁿ-sù tì-hūi tī in ê sim, hō͘ in ōe chòe Góa it-chhè só͘ hoan-hù lí ê;

7

chiū-sī hōe-bō͘, hoat-kūi, kaphit téng-bīn ê si-un-só͘, í-kı̍p pò͘-pîⁿ it-chhè ê khì-kū,

8

toh kap toh-téng ê khì-kū, hó-kim ê teng-tâi kap i it-chhè ê khì-kū,

9

í-kı̍p hiuⁿ-tôaⁿ, sio-chè ê tôaⁿ kap i it-chhè ê khì-kū, í-kı̍p sóe-tn̄g ê phûn kap i ê chō;

10

cheng-kong ê i-ho̍k, chè-si A-lûn ê sèng-saⁿ kap i ê kiáⁿ ê saⁿ, hō͘ in chòe chè-si lâi ho̍k-sāi;

11

thang boah ê iû, í-kı̍p sèng-só͘ só͘ ēng phang-liāu ê hiuⁿ; chiàu Góa it-chhè só͘ bēng-lēng lí ê, in tio̍h chòe.

12

Iâ-hô-hoa hoan-hù Mô͘-se kóng,

13

Lí tio̍h hoan-hù Í-sek-lia̍t lâng kóng, Lín tek-khak tio̍h siú Góa hiah-ê an-hioh-jı̍t; in-ūi che sī Góa kap lín ê tiong-kan ê chèng-kù, kàu tī lín ta̍k sè-tāi, hō͘ lín chai Góa chiū-sī Iâ-hô-hoa, hō͘ lín chiâⁿ-sèng ê.

14

Só͘-í lín tio̍h siú an-hioh-jı̍t, in-ūi sī lín ê sèng-jı̍t, kìⁿ-nā hōan-tio̍h chit-jı̍t-ê, tio̍h hō͘ i sí; hōan-nā tī chit-jı̍t chòe kang-ê, tio̍h tùi i ê peh-sìⁿ-tiong siū chián-tû.

15

La̍k-jı̍t tio̍h chòe-kang, to̍k-to̍k tē-chhit jı̍t sī an-hioh ê tōa-jı̍t, sī Iâ-hô-hoa ê sèng-jı̍t; hōan-nā tī an-hioh-jı̍t chòe-kang-ê, tek-khak tio̍h hō͘ i sí.

16

Só͘-í Í-sek-lia̍t lâng tio̍h siú an-hioh-jı̍t, tāi-tāi kín-sīn chit-ê an-hioh-jı̍t, chòe éng-óan ê iok.

17

Che sī Góa kap Í-sek-lia̍t lâng tiong-kan éng-óan ê chèng-kù; in-ūi la̍k-jı̍t-lāi Iâ-hô-hoa chhòng-chō thiⁿ tōe, tē-chhit jı̍t chiū hioh-khùn lâi chheng-êng.

18

Iâ-hô-hoa tī Se-nái soaⁿ kap Mô͘-se kóng-ōe bêng-pe̍k, chiū chiong nn̄g tè iok-pi hō͘-i, sī Siōng-tè ēng chńg-thâu-á siá ê chio̍h-pi.