Chhut Ai-ki̍p-kì 第 32 章 - 巴克禮全羅

1

Peh-sìⁿ khòaⁿ-kìⁿ Mô͘-se iân-chhiân bô lo̍h soaⁿ, peh-sìⁿ chiū chū-chı̍p kàu A-lûn hia, tùi i kóng, Khí-lâi, kā góan chng siōng-tè, thang kiâⁿ tī góan ê thâu-chêng; in-ūi hit-ê Mô͘-se, chiū-sī chhōa góan tùi Ai-kı̍p tōe chhut-lâi, hit-ê lâng, góan m̄-chai i tú-tio̍h sím-mı̍h.

2

A-lûn tùi in kóng, Lín ê bó͘, lín ê kiáⁿ, cha-bó͘-kiáⁿ, hī-á só͘ kòa ê kim khôan, pak i, the̍h-lâi hō͘ góa.

3

Peh-sìⁿ chiū lóng pak in hī-á-nı̍h ê kim-khôan, the̍h lâi hō͘ A-lûn.

4

A-lûn tùi in ê chhiú chih-lâi, chù chı̍t chiah gû-á, ēng chhiàm-to-á tiau-khek-i; in chiū kóng, Í-sek-lia̍t ah, che sī lí ê siōng-tè, chhōa lí chhut Ai-kı̍p tōe ê.

5

A-lûn khòaⁿ-liáu, chiū tī gû-á ê bīn-chêng khí-tôaⁿ; A-lûn koh soan-pò͘ kóng, Bîn-á-jı̍t tio̍h siú-choeh ho̍k-sāi Iâ-hô-hoa.

6

Keh jı̍t chheng-chá, in khí-lâi, hiàn sio-chè kap pêng-an-chè; peh-sìⁿ chiū chē-teh lim-chia̍h, khí-lâi kún-chhiò.

7

Iâ-hô-hoa tùi Mô͘-se kóng, Khì ah, lí lo̍h-khì; in-ūi lí ê peh-sìⁿ, chiū-sī tùi Ai-kı̍p tōe chhōa chhut-lâi ê, í-keng pāi-hōai ka-kī.

8

In kín-kín lī-khui Góa só͘ hoan-hù in ê lō͘, ūi ka-kī chù-chiâⁿ chı̍t chiah gû-á, kūi-pài-i, hiàn-chè-i, kóng, Í-sek-lia̍t ah, che chiū-sī chhōa lí chhut Ai-kı̍p tōe ê siōng-tè.

9

Iâ-hô-hoa tùi Mô͘-se kóng, Góa khòaⁿ chit-ê peh-sìⁿ, khòaⁿ ah, sī ām-kún ngī ê peh-sìⁿ.

10

Lí taⁿ chhut-chāi Góa, Góa beh tōa siū-khì in, bia̍t-bô in; ēng lí chiâⁿ-chòe tōa-kok.

11

Mô͘-se chiū tùi i ê Siōng-tè Iâ-hô-hoa kiû-chêng kóng, Iâ-hô-hoa ah, Lí siáⁿ-sū tōa siū-khì Lí ê peh-sìⁿ ah, sī Lí ēng tōa khùi-la̍t tōa kôan-lêng ê chhiú, tùi Ai-kı̍p tōe chhōa chhut-lâi-ê?

12

Siáⁿ-sū hō͘ Ai-kı̍p lâng ū ōe kóng, I chhōa in chhut-khì, sī beh hāi-in, hāi-sí in tī soaⁿ-tiong, tùi tōe-chiūⁿ tû-bia̍t in? kiû Lí hê-sim tńg-ì, soah Lí ê tōa siū-khì, bô kàng chai-ē hō͘ Lí ê peh-sìⁿ.

13

Kì-liām Lí ê lô͘-po̍k A-pek-la̍h-hán, Í-sat, Í-sek-lia̍t, Lí bat kí ka-kī tùi in chiù-chōa kóng, Góa beh hō͘ lín ê hō͘-è chhin-chhiūⁿ thiⁿ-téng ê chhiⁿ hiah-chōe; koh Góa só͘ kóng chit-ê chôan-tōe, Góa beh siúⁿ-sù lín ê hō͘-è, beh chòe in éng-óan ê gia̍p.

14

Tùi án-ni Iâ-hô-hoa thè-hóe, bô kàng-lo̍h I chêng só͘ kóng ê chai-ē, hō͘ I ê peh-sìⁿ.

15

Mô͘-se o̍at-tńg-sin lo̍h soaⁿ, chhiú the̍h nn̄g tè iok-pi, chiah-ê pi nn̄g-bīn lóng ū siá; chit-bīn hit-bīn lóng ū siá-jī.

16

Pi sī Siōng-tè chòe-ê, jī sī Siōng-tè siá-ê, khek tī pi-nı̍h.

17

Iok-su-a chı̍t-ē thiaⁿ-kìⁿ peh-sìⁿ hán-hōa ê siaⁿ, chiū tùi Mô͘-se kóng, Tī iâⁿ-tiong ū kau-chiàn ê siaⁿ.

18

I kóng, Góa só͘ thiaⁿ-kìⁿ m̄-sī thâi-iâⁿ tek-sèng ê siaⁿ, iā m̄-sī thâi-su âu-kiò ê siaⁿ, chiū-sī chhiùⁿ-koa ê siaⁿ.

19

Kiâⁿ kūn iâⁿ-pôaⁿ, khòaⁿ-kìⁿ gû-á, koh khòaⁿ-kìⁿ lâng teh thiàu-bú, Mô͘-se chiū tōa siū-khì, tùi i ê chhiú hiat nn̄g tè chio̍h-pi, chı̍h tī soaⁿ-kha.

20

Koh chiong in só͘ chù ê gû-á, ēng hé sio, géng chòe hún, iā tī chúi-bīn, hō͘ Í-sek-lia̍t lâng lim-i.

21

Mô͘-se tùi A-lûn kóng, Chit-ê peh-sìⁿ tùi lí chòe sím-mı̍h, lí chiah hō͘ in hām-lo̍h tāng-chōe?

22

A-lûn kóng, Góa ê chú bo̍h-tit tōa siū-khì; chiah-ê peh-sìⁿ koat-ì chòe pháiⁿ, sī lí só͘ chai-ê.

23

In tùi góa kóng, Lí kā góan chng siōng-tè, thang kiâⁿ tī góan ê thâu-chêng, in-ūi hit-ê Mô͘-se, chiū-sī chhōa góan tùi Ai-kı̍p tōe chhut-lâi, hit-ê lâng, góan m̄ chai i tú-tio̍h sím-mı̍h.

24

Góa tùi in kóng, Kìⁿ-nā ū kim-ê, pak-khí-lâi; in chiong kim hō͘ góa, góa hiat i tī hé-nı̍h, chit chiah gû-á chiū chhut-lâi.

25

Mô͘-se khòaⁿ-kìⁿ peh-sìⁿ hòng-chhiòng, in-ūi A-lûn pàng chhut-chāi in, hō͘ in tī tùi-te̍k ê tiong-kan siū ki-chhì,

26

Mô͘-se khiā tī iâⁿ-pôaⁿ ê mn̂g, kóng, Chī-chūi óa Iâ-hô-hoa-ê, thang lâi góa chia; Lī-bī lâng chiū lóng chū-chı̍p tī i hia.

27

I tùi in kóng, Iâ-hô-hoa Í-sek-lia̍t ê Siōng-tè án-ni kóng, Lín ta̍k-lâng tio̍h chhah to tī tōa-thúi-nı̍h, óng-lâi tī iâⁿ-tiong, tùi chit-ê mn̂g kàu hit-ê mn̂g, ta̍k-lâng thâi-sí i ê hiaⁿ-tī, kap i ê tâng-phōaⁿ, í-kı̍p i ê chhù-piⁿ.

28

Lī-bī lâng chiàu Mô͘-se ê ōe kiâⁿ; hit-jı̍t peh-sìⁿ-tiong sí-ê iok-lio̍k saⁿ-chheng lâng.

29

Mô͘-se kóng, Lín hiàn ka-kī hō͘ Iâ-hô-hoa, ta̍k-lâng kong-kek i ê kiáⁿ, i ê hiaⁿ-tī , kin-á-jı̍t tit-tio̍h I sù-hok lín.

30

Keh-jı̍t Mô͘-se tùi peh-sìⁿ kóng, Lín ū hōan tāng-chōe, góa taⁿ beh chiūⁿ-khì Iâ-hô-hoa hia, kiám-chhái thang kā lín sio̍k-chōe.

31

Mô͘-se tò-tńg kàu Iâ-hô-hoa hia kóng, Ai-ah, chit-ê peh-sìⁿ hōan tāng-chōe, ūi ka-kī chòe kim ê siōng-tè.

32

Taⁿ Lí nā beh sià-bián in ê chōe; nā m̄, kiû Lí tùi Lí só͘ siá ê chheh, chhat-khì góa ê miâ.

33

Iâ-hô-hoa tùi Mô͘-se kóng, Sím-mı̍h lâng tek-chōe Góa chiū tùi Góa ê chheh chhat i ê miâ.

34

Taⁿ lí khì chhōa chit-ê peh-sìⁿ khì Góa só͘ kā lí kóng ê só͘-chāi; khòaⁿ ah, Góa ê sù-chiá beh kiâⁿ tī lí ê thâu-chêng; to̍k-to̍k kàu Góa pān-chōe ê jı̍t, Góa beh pān in ê chōe.

35

Iâ-hô-hoa kàng chai-ē hō͘ peh-sìⁿ, in-ūi in chō gû-á, chiū-sī A-lûn só͘ chō-ê.