Chhut Ai-ki̍p-kì 第 35 章 - 巴克禮全羅

1

Mô͘-se chio-chı̍p Í-sek-lia̍t lâng chôan-hōe, tùi in kóng, Iâ-hô-hoa só͘ hoan-hù ê ōe, kah lín tio̍h kiâⁿ-ê, chiū-sī chiah-ê.

2

La̍k-jı̍t tio̍h chòe-kang, tē-chhit jı̍t sī lín ê sèng-jı̍t, sī tōa ê an-hioh-jı̍t, lâi ho̍k-sāi Iâ-hô-hoa; hōan-nā tī chit-jı̍t chòe-kang-ê, tio̍h hō͘ i sí.

3

Tng an-hioh-jı̍t, tī lín ta̍k keng chhù-lāi m̄-thang khí-hé.

4

Mô͘-se tùi Í-sek-lia̍t lâng chôan-hōe kóng, Iâ-hô-hoa só͘ hoan-hù ê ōe, sī án-ni kóng,

5

Lín tiong-kan tio̍h the̍h lé-mı̍h hiàn hō͘ Iâ-hô-hoa; kìⁿ-nā sim gōan-ê, thang the̍h i lâi, chòe hiàn hō͘ Iâ-hô-hoa ê lé-mı̍h;

6

chiū-sī kim, gûn, tâng, lâm-sek, chí-sek, chu-âng-sek ê liāu, iù-tōe,

7

soaⁿ-iûⁿ-mn̂g, ní-âng ê iûⁿ-káng-phê, hái-káu-phê,

8

chō-kiap-chhâ, tiám-teng ê iû, phang ê liāu, thang chòe boah ê iû kap phang-hiuⁿ,

9

âng-bé-ló kap pa̍t-iūⁿ ê pó-chio̍h, thang siuⁿ tī í-hut-tek kap pó͘-kòa.

10

Lín tiong-kan kìⁿ-nā sim ū tì-hūi-ê, lóng tio̍h lâi chòe Iâ-hô-hoa it-chhè só͘ hoan-hù-ê;

11

chiū-sī hōe-bō͘, i ê pò͘-pîⁿ, kap i ê kòa, i ê kau, i ê pán, i ê hôaiⁿ-kông, i ê thiāu, i ê khū;

12

kūi, kap i ê kǹg, si-un-só͘, kap jia-cha̍h ê tiùⁿ-lî;

13

toh kap i ê kǹg, kap i ê khì-kū, kap pâi-lia̍t ê piáⁿ;

14

tiám-kng ê teng-tâi kap i ê khì-kū, teng-chóaⁿ kap tiám-kng ê iû;

15

hiuⁿ-tôaⁿ kap i ê kǹg, boah ê iû, kap phang-hiuⁿ, í-kı̍p hōe-bō͘ mn̂g ê mn̂g-lî;

16

sio-chè ê tôaⁿ kap i tâng ê bāng, kap i ê kǹg, í-kı̍p i it-chhè ê khì-kū, sóe-tn̄g ê phûn kap i ê chō;

17

tiûⁿ ê tiùⁿ-ûi, kap i ê thiāu, in ê khū, kap tiûⁿ-mn̂g ê mn̂g-lî;

18

hōe-bō͘ só͘ tèng ê teng, kap tiûⁿ só͘ tèng ê teng, kap in ê soh;

19

cheng-kong ê i-ho̍k, tī sèng-só͘ chhēng lâi ho̍k-sāi-ê, chiū-sī chè-si A-lûn ê sèng-saⁿ kap i ê kiáⁿ ê saⁿ, chhēng lâi tam-tng chè-si ê chit.

20

Í-sek-lia̍t lâng chôan-hōe tùi Mô͘-se ê bīn-chêng chhut-khì.

21

Kìⁿ-nā siū kám-tōng, tùi sim hoaⁿ-hí-ê, lóng-chóng lâi, the̍h lé-mı̍h hiàn hō͘ Iâ-hô-hoa, ēng lâi chòe hōe-bō͘ ê kang, kap it-chhè ê lō͘-ēng, iā ēng lâi chòe sèng-saⁿ.

22

Kìⁿ-nā chhut tī sim hoaⁿ-hí-ê, ta-po͘ hū-jîn lóng lâi, ta̍k-ê chiong kim-khì, chiū-sī heng-chêng ê pín-chiam, hī-kau, phah-ìn ê chhiú-chí, kap chhiú-khôan; che sī ta̍k-lâng chiong i ê lé-mı̍h hiàn hō͘ Iâ-hô-hoa.

23

Kìⁿ-nā lâng ū lâm-sek, chí-sek, chu-âng-sek ê liāu, iù-tōe, soaⁿ-iûⁿ-mn̂g, ní-âng ê iûⁿ-káng-phê, hái-káu-phê, lóng the̍h-lâi.

24

Kìⁿ-nā hiàn gûn kap tâng, chòe lé-mı̍h-ê, lóng the̍h-lâi hiàn hō͘ Iâ-hô-hoa; kìⁿ-nā ū chō-kiap-chhâ thang chòe sím-mı̍h lō͘-ēng-ê, iā the̍h-lâi.

25

Kìⁿ-nā sim-lāi ū tì-hūi ê hū-lú, chhin-chhiú pháng sòaⁿ, chiong só͘ pháng ê lâm-sek, chí-sek, chu-âng-sek ê liāu, kap iù-tōe lóng the̍h-lâi.

26

Kìⁿ-ū tì-hūi ê sim siū kám-tōng ê hū-lú, chiū pháng soaⁿ-iûⁿ-mn̂g.

27

Chiah-ê thâu-lâng chiong âng-bé-ló, kap pa̍t-iūⁿ ê pó-chio̍h, thang siuⁿ tī í-hut-tek kap pó͘-kòa-ê, lóng the̍h-lâi.

28

Koh the̍h hiuⁿ-liāu kap iû, thang ēng i lâi tiám teng, chòe boah ê iû, chòe phang ê hiuⁿ.

29

Í-sek-lia̍t lâng, bô-lūn lâm-lú, kìⁿ-nā sim hoaⁿ-hí hiàn lé-mı̍h hō͘ Iâ-hô-hoa-ê, lóng hoaⁿ-hí the̍h lé-mı̍h lâi, chòe Iâ-hô-hoa thok-tiōng Mô͘-se só͘ hoan-hù in chòe it-chhè ê kang.

30

Mô͘-se tùi Í-sek-lia̍t lâng kóng, Lín khòaⁿ, Iû-tāi ê chi-phài Hō͘-jíⁿ ê sun, Ou-lī ê kiáⁿ Pí-sat-lia̍t, Iâ-hô-hoa í-keng chí miâ tiàu i.

31

Koh ēng Siōng-tè ê sîn chhiong-móa i, hō͘ i ū tì-hūi, ū chhang-miâ, ū chai-bat, ōe chòe ta̍k-iūⁿ ê kang;

32

ōe siūⁿ-chhut kî-khiáu ê kang, lâi chòe kim, gûn, tâng hiah-ê mı̍h,

33

iā ōe khek pó-chio̍h lâi jı̍p-i; iā ōe khek chhâ, ōe chòe ta̍k-iūⁿ kî-khiáu ê kang.

34

Koh hō͘ i kap Tàn ê chi-phài, A-hi-sat-boat ê kiáⁿ A-hô-lī-a-pek, sim ū lêng-khiàu, ōe kà-sī lâng.

35

Chiah-ê lâng I ēng tì-hūi chhiong-móa in ê sim; hō͘ in ōe chòe ta̍k-iūⁿ ê kang, bô-lūn tiau-khek ê kang, kî-khiáu ê kang, ēng lâm-sek, chí-sek, chu-âng-sek ê liāu, kap iù-tōe, siù hoe-ê, chit-pò͘-ê, ta̍k-iūⁿ ê kang lóng ōe chòe, iā ōe siūⁿ-chhut kî-khiáu ê kang.