Chhut Ai-ki̍p-kì 第 36 章 - 巴克禮全羅

1

Pí-sat-lia̍t kap A-hô-lī-a-pek, kap lóng-chóng sim ū tì-hūi ê lâng, chiū-sī tit-tio̍h Iâ-hô-hoa siúⁿ-sù tì-hūi chhang-miâ hō͘ in chai chòe sèng-só͘ ta̍k-iūⁿ lō͘-ēng ê kang-ê, lóng tio̍h chiàu Iâ-hô-hoa só͘ hoan-hù-ê chòe kang.

2

Mô͘-se tiàu Pí-sat-lia̍t, A-hô-lī-a-pek, kap kìⁿ-nā sim ū tì-hūi ê lâng lâi, chiū-sī Iâ-hô-hoa ēng tì-hūi siúⁿ-sù in ê sim, sim siū kám-tōng lâi chòe-kang-ê.

3

In tùi Mô͘-se the̍h it-chhè ê lé-mı̍h, chiū-sī Í-sek-lia̍t lâng ūi-tio̍h chòe sèng-só͘ kap lāi-bīn só͘ ēng ê mı̍h the̍h-lâi-ê. Peh-sìⁿ ta̍k chá-khí iû-gôan ēng kam-sim hiàn ê lé-mı̍h the̍h-lâi hō͘-i.

4

Kìⁿ-nā chòe sèng-só͘ ê kang chiah-ê ū tì-hūi ê lâng, lóng chiām-thêng in só͘ chòe ê kang;

5

lâi tùi Mô͘-se kóng, Peh-sìⁿ só͘ the̍h-lâi-ê, pí Iâ-hô-hoa bēng-lēng chòe ê kang só͘ tio̍h ēng ê liāu, kè-gia̍h ū chhun.

6

Mô͘-se chhut-bēng, in chiū soan-pò͘ tī chôan-iâⁿ, kóng, Bô-lūn lâm-lú bo̍h-tit koh chòe sím-mı̍h lâi, hiàn hō͘ sèng-só͘; tùi án-ni chó͘-chí peh-sìⁿ bô koh the̍h-lâi.

7

In-ūi in só͘ ū ê chhâi-liāu, kàu-gia̍h thang chòe it-chhè só͘ tio̍h chòe chiah-ê kang, soah ū chhun.

8

In tiong-kan kìⁿ-nā sim ū tì-hūi chòe-kang-ê, ēng cha̍p-pak ê tiùⁿ chòe hōe-bō͘; chiah-ê tiùⁿ sī ēng kè-pháng ê iù-tōe, kap lâm-sek, chí-sek, chu-âng-sek ê liāu; iā ēng kî-khiáu ê kang chit-chiâⁿ ki-lō͘-peng chòe-i.

9

Múi pak tiùⁿ tn̂g jī-cha̍p-poeh tiú, khoah sì-tiú; tiùⁿ lóng sī chı̍t-iūⁿ ê chhùn-chhioh.

10

Chit gō͘ pak tiùⁿ, i chhòng hō͘ in ta̍k pak saⁿ-liân; hit gō͘ pak tiùⁿ iā ta̍k-pak saⁿ-liân.

11

Tī chit-ê saⁿ-liân ê tiùⁿ, lō͘-bé pak ê piⁿ-á chòe lâm-sek ê liú-phàn; tī hit-ê saⁿ-liân ê tiùⁿ, lō͘-bé pak ê piⁿ-á iā án-ni chòe.

12

I tī chit niá tiùⁿ chòe gō͘-cha̍p ê liú-phàn, koh tī tē-jī niá tiùⁿ saⁿ-liân ê piⁿ-á, iā chòe gō͘-cha̍p ê liú-phàn; liú-phàn lóng nn̄g-ê nn̄g-ê saⁿ-tùi.

13

Koh chòe gō͘-cha̍p ê kim-kau, ēng i lâi kau hō͘ tiùⁿ saⁿ-liân; chiū chiâⁿ-chòe chı̍t ê hōe-bō͘.

14

I koh ēng soaⁿ-iûⁿ-mn̂g chit cha̍p-it pak ê tiùⁿ, chòe hōe-bō͘-téng ê pò͘-pîⁿ;

15

múi-pak tiùⁿ tn̂g saⁿ-cha̍p tiú, khoah sì-tiú; cha̍p-it pak tiùⁿ lóng chı̍t-iūⁿ ê chhùn-chhioh.

16

Chiong gō͘ pak tiùⁿ liân-chòe chı̍t-pak, koh chiong la̍k pak tiùⁿ liân-chòe chı̍t-pak.

17

Tī chit-ê saⁿ-liân ê tiùⁿ lō͘-bé pak ê piⁿ-á, i chòe gō͘-cha̍p ê liú-phàn, tī hit-ê saⁿ-liân lō͘-bé pak ê piⁿ-á iā chòe gō͘-cha̍p ê liú-phàn.

18

I koh chòe gō͘-cha̍p ê tâng-kau, hō͘ pò͘-pîⁿ liân-chòe chı̍t-ê.

19

Koh ēng ní-âng ê iûⁿ-phê chòe pò͘-pîⁿ ê kòa; koh ēng hái-káu-phê kòa tī téng-bīn.

20

I ēng chō-kiap-chhâ chòe hōe-bō͘ khiā ê pán.

21

Khiā ê pán tn̂g cha̍p-tiú, khoah chı̍t-tiú-pòaⁿ.

22

Ta̍k tè pán ū nn̄g ê sún saⁿ-pâi; hōe-bō͘ it-chhè ê pán lóng chiàu án-ni chòe.

23

I chòe hōe-bō͘ ê pán, lâm-pêng ê lâm-sì jī-cha̍p tè pán;

24

tī chiah-ê jī-cha̍p tè pán ê ē-bīn chòe sì-cha̍p ê gûn-khū; chı̍t tè pán ê ē-bīn ū nn̄g ê khū lâi chhēng i nn̄g ki sún; koh chı̍t tè pán ê ē-bīn iā ū nn̄g ê khū lâi chhēng i nn̄g ki sún.

25

Hōe-bō͘ tē-jī bīn, chiū-sī pak-bīn, iā chòe pán jī-cha̍p-tè,

26

kap in ê gûn-khū sì-cha̍p-ê; chit-ê pán ê ē-bīn ū nn̄g ê khū, hit-ê pán ê ē-bīn iā ū nn̄g ê khū.

27

Hōe-bō͘ ê āu-bīn, chiū-sī sai-bīn, iā chòe la̍k tè pán.

28

Hōe-bō͘ āu-bīn ê nn̄g ê kak-thâu, chòe nn̄g tè pán.

29

Pán ê ē-tn̂g, nn̄g-ê saⁿ-tâng, tı̍t-kàu téng-bīn tē-it ê khôan lóng sī ka-nn̂g-ê; nn̄g ê kak-thâu ê pán lóng sī án-ni chòe.

30

Ū poeh ê pán, kap cha̍p-la̍k ê gûn-khū; ta̍k tè pán ê ē-bīn ū nn̄g ê khū.

31

I ēng chō-kiap-chhâ chòe hôaiⁿ-kông; ūi-tio̍h hōe-bō͘ chit-pêng ê pán chòe gō͘-ki,

32

ūi-tio̍h hōe-bō͘ hit-pêng ê pán chòe gō͘-ki; koh ūi-tio̍h hōe-bō͘-āu sai-bīn ê pán chòe gō͘-ki.

33

Pán ê tùi-tiong hit ki hôaiⁿ-kông, hō͘ i tùi chit-thâu kàu hit-thâu.

34

Pán ēng kim pau; koh chòe pán ê kim-khôan lâi thò kông; kông iā ēng kim pau.

35

Koh ēng lâm-sek, chí-sek, chu-âng-sek ê liāu, kap kè-pháng ê iù-tōe chit tiùⁿ-lî; chit-ê tiùⁿ-lî ēng kî-khiáu ê kang chit-chiâⁿ ki-lō͘-peng lâi chòe-ê.

36

Koh ēng chō-kiap-chhâ ūi-tio̍h i chòe sì ki thiāu, ēng kim pau i; in ê kau sī kim-ê; koh ūi-tio̍h in chù sì ê gûn-khū.

37

Ēng lâm-sek, chí-sek, chu-âng-sek ê liāu, kap kè-pháng ê iù-tōe, ēng siù-hoe ê kang chòe pò͘-pîⁿ mn̂g ê mn̂g-lî,

38

kap i gō͘ ki thiāu, kap in ê kau; in ê thiāu-táu kap hôaiⁿ-koaiⁿ ēng kim pau i; hit gō͘ ê khū sī tâng-ê.