Chhut Ai-ki̍p-kì 第 37 章 - 巴克禮全羅

1

Pí-sat-lia̍t ēng chō-kiap-chhâ chòe kūi, tn̂g nn̄g-tiú-pòaⁿ, khoah tiú-pòaⁿ, kôaiⁿ tiú-pòaⁿ;

2

lāi-gōa ēng hó-kim pau i, sì-ûi khí kim-sòaⁿ,

3

tī i ê sì-kha kā i chù sì ê kim-khôan; chit-pêng nn̄g khôan, hit-pêng nn̄g khôan.

4

Ēng chō-kiap-chhâ chòe nn̄g ki kǹg, ēng kim pau i.

5

Chiong kǹg chhng tī kūi-piⁿ ê khôan-lāi, thang kng kūi.

6

Ēng hó-kim chòe si-un-só͘, tn̂g nn̄g-tiú-pòaⁿ, khoah tiú-pòaⁿ.

7

Ēng kim chòe nn̄g ê ki-lō͘-peng; ēng chhia ê hoat chòe i, tī si-un-só͘ ê siang-thâu;

8

chit-thâu chı̍t ê ki-lō͘-peng, hit-thâu chı̍t ê ki-lō͘-peng; nn̄g ê ki-lō͘-peng tī si-un-só͘ ê siang-thâu kap i liân-chòe chı̍t-tè.

9

Nn̄g ê ki-lō͘-peng kôaiⁿ-kôaiⁿ thí-khui sı̍t, ēng in ê sı̍t jia si-un-só͘, in ê bīn saⁿ-tùi; ki-lō͘-peng ê bīn àⁿ si-un-só͘.

10

I ēng chō-kiap-chhâ chòe toh, tn̂g nn̄g-tiú, khoah chı̍t-tiú, kôaiⁿ tiú-pòaⁿ;

11

ēng hó-kim pau i, sì-ûi kā i khí kim-sòaⁿ.

12

Toh ê sì-ûi kok chòe chı̍t pa-chiúⁿ khoah ê hôaiⁿ-niû; hôaiⁿ-niû-téng sì-ûi khí kim-sòaⁿ.

13

Kā i chù sì ê kim-khôan, an tī i ê sì-kha ê sì-kak.

14

An khôan ê só͘-chāi óa-kūn hôaiⁿ-niû, thang chhng-kǹg lâi kng toh.

15

Ēng chō-kiap-chhâ chòe nn̄g ki kǹg, ēng kim pau i, thang kng toh.

16

Iā chòe toh-téng ê khì-kū, i ê pôaⁿ, óaⁿ, pân, poe, thang lâi kòan-tiān, lóng ēng hó-kim chòe.

17

I ēng hó-kim chòe teng-tâi; teng-tâi ê chō kap tiong-thiāu, i ê poe, i ê ba̍k, i ê hoe, lóng ēng phah ê hoat, chòe kui-chō;

18

i ê piⁿ-á pun-chhut la̍k-ki; teng-tâi ê chit-pêng ū saⁿ-ki, teng-tâi ê hit-pêng ū saⁿ-ki;

19

chit-pêng múi-ki ū saⁿ ê poe, khóan-sit chhin-chhiūⁿ hēng-hoe, ū ba̍k ū hoe; hit-pêng múi-ki iā ū saⁿ ê poe, khóan-sit chhin-chhiūⁿ hēng-hoe, ū ba̍k ū hoe; tùi teng-tâi pun-chhut ê la̍k-ki lóng sī án-ni.

20

Teng-tâi thiāu ū sì ê poe, khóan-sit chhin-chhiūⁿ hēng-hoe, ū i ê ba̍k, kap i ê hoe.

21

Nn̄g-ki ê ē-bīn ū chı̍t-ba̍k kap i saⁿ-liân; koh nn̄g-ki ê ē-bīn ū chı̍t-ba̍k kap i saⁿ-liân; koh nn̄g-ki ê ē-bīn ū chı̍t-ba̍k kap i saⁿ-liân; teng-tâi só͘ chhut ê la̍k-ki lóng sī án-ni.

22

Hiah-ê ba̍k kap hiah-ê ki lóng kap i liân-chòe chı̍t-ê; lóng ēng hó-kim, chiàu phah ê hoat chòe.

23

Iā kā i chòe chhit-ê teng-chóaⁿ, kap i ê chián, kap i ê pôaⁿ, lóng ēng hó-kim chòe ê.

24

Chòe teng-tâi kap it-chhè ê khì-kū ēng hó-kim chı̍t tha-liân-tek.

25

I ēng chō-kiap-chhâ chòe hiuⁿ-tôaⁿ, tn̂g chı̍t-tiú, khoah chı̍t-tiú, khóan-sit sù-hong-ê; kôaiⁿ nn̄g-tiú; i hiah-ê kak kap tôaⁿ liân-chòe chı̍t-tè.

26

Tôaⁿ kap i ê téng-bīn, kap i ê sì-ûi, kap i hiah-ê kak, lóng ēng hó-kim pau i, iā tī i ê sì-ûi khí kim-sòaⁿ.

27

Koh kā i chòe nn̄g ê kim-khôan, an tī khí-sòaⁿ ê ē-bīn, tī tôaⁿ ê siang-pêng nn̄g ki hôaiⁿ-koaiⁿ ê téng-bīn; chiah-ê khôan sī chòe chhng-kǹg ê lō͘-ēng, thang kng tôaⁿ.

28

Ēng chō-kiap-chhâ chòe kǹg, ēng kim pau in.

29

Koh chiàu chòe phang-bī ê hoat chòe thang boah ê sèng-iû, kap phang-liāu chheng-kiat ê hiuⁿ.