Chhut Ai-ki̍p-kì 第 38 章 - 巴克禮全羅

1

I ēng chō-kiap-chhâ chòe sio-chè ê tôaⁿ; tn̂g gō͘-tiú, khoah gō͘-tiú, chit-ê tôaⁿ sī sù-hong-ê; kôaiⁿ saⁿ-tiú.

2

Tī tôaⁿ ê sì kak-thâu chòe sì ki kak, kap tôaⁿ saⁿ-liân chòe chı̍t-ê, ēng tâng pau i.

3

Koh chòe tôaⁿ it-chhè ê khì-kū, i ê phûn, thuh-á, pôaⁿ, chhe, hé-tiáⁿ; it-chhè ê khì-kū lóng ēng tâng chòe.

4

Koh ūi-tio̍h tôaⁿ ēng tâng-bāng chòe chı̍t ê chân, an tī tôaⁿ sì-bīn ûi-io-pán ê ē-bīn, hō͘ i thàu-kàu tôaⁿ ê pòaⁿ-io.

5

Ūi-tio̍h tâng ê chân ê sì-kak chù sì ê khôan, chòe chhng-kǹg ê lō͘-ēng.

6

Ēng chō-kiap-chhâ chòe kǹg, ēng tâng pau in.

7

Chiong kǹg chhng tī tôaⁿ siang-pêng ê khôan-lāi, ēng i lâi kng tôaⁿ; iā ēng pán chòe tôaⁿ, tôaⁿ sī khang-khak.

8

I ēng tâng chòe sóe-tn̄g ê phûn, kap tâng-chō; sī ēng hōe-bō͘ mn̂g-chêng chòe-kang ê hū-jîn-lâng ê tâng-kiàⁿ chòe-ê.

9

I chòe hōe-bō͘ ê tiûⁿ; hit-ê tiûⁿ ê lâm-sì, ēng kè-pháng ê iù-tōe chòe ûi, chı̍t-pah tiú.

10

Ûi ê thiāu jī-cha̍p ki, tâng-chòe ê khū jī-cha̍p-ê; thiāu ê kau kap hôaiⁿ-koaiⁿ sī ēng gûn chòe-ê.

11

Pak-bīn iā chı̍t-pah tiú, ûi ê thiāu jī-cha̍p ki, tâng-chòe ê khū jī-cha̍p ê; thiāu ê kau kap hôaiⁿ-koaiⁿ sī ēng gûn chòe-ê.

12

Sai-bīn ū ûi gō͘-cha̍p tiú, ûi ê thiāu cha̍p-ki, khū cha̍p-ê; thiāu ê kau kap hôaiⁿ-koaiⁿ sī ēng gûn chòe-ê.

13

Tang-bīn ê tang-sì gō͘-cha̍p tiú.

14

Mn̂g chit-pêng ê ûi cha̍p-gō͘ tiú, ûi ê thiāu saⁿ-ki, ū khū saⁿ-ê.

15

Hit-pêng iā sī án-ni; tiûⁿ-mn̂g ê chó-iū, kok ū ûi cha̍p-gō͘ tiú; ûi ê thiāu saⁿ-ki, khū saⁿ-ê.

16

Tiûⁿ sì-bīn ê tiùⁿ-ûi lóng sī ēng kè-pháng ê iù-tōe chòe.

17

Thiāu ê khū sī tâng-ê, thiāu ê kau kap hôaiⁿ-koaiⁿ sī gûn-ê; thiāu-táu sī ēng gûn pau-ê; tiûⁿ lóng chóng ê thiāu sī ēng gûn ê hôaiⁿ-koaiⁿ chhēng saⁿ-liân-ê.

18

Tiûⁿ-mn̂g ê mn̂g-lî sī ēng siù-hoe ê kang, ēng lâm-sek, chí-sek, chu-âng-sek ê liāu kap kè-pháng ê iù-tōe chòe-ê; tn̂g jī-cha̍p tiú, kôaiⁿ gō͘ tiú, kap tiûⁿ ê ûi saⁿ-phòe.

19

In ê thiāu sì-ki, tâng ê khū sì-ê, thiāu ê kau sī gûn-ê, thiāu-táu sī gûn pau-ê, hôaiⁿ-koaiⁿ sī gûn-ê.

20

Hōe-bō͘ í-kı̍p tiûⁿ-lāi sì-ûi só͘ tèng ê teng, lóng sī tâng-ê.

21

Chit-ê hōe-bō͘ sī chèng-kù ê hōe-bō͘; hit tiong-kan Lī-bī lâng só͘ beh ēng mı̍h-kiāⁿ ê chóng-gia̍h, sī chiàu Mô͘-se só͘ hoan-hù, keng-kè chè-si A-lûn ê kiáⁿ, Í-tha-má ê chhiú só͘ sǹg-ê.

22

Kìⁿ-nā Iâ-hô-hoa só͘ hoan-hù Mô͘-se-ê, Iû-tāi ê chi-phài, Hō͘-jíⁿ ê sun, Ou-lī ê kiáⁿ, Pí-sat-lia̍t lóng chòe-i.

23

Kap i saⁿ-kap chòe-ê, ū Tàn ê chi-phài, A-hi-sat-boat ê kiáⁿ, A-hô-lī-a-pek, i sī gâu tiau-khek, koh kî-khiáu ê sai-hū, koh ōe ēng lâm-sek, chí-sek, chu-âng-sek ê liāu kap iù-tōe lâi siù-hoe.

24

Chòe sèng-só͘ it-chhè ê kang só͘ ēng ê kim, chiū-sī lâng só͘ hiàn ê kim, chiàu sèng-só͘ ê phêng, ū jī-cha̍p-káu tha-liân-tek, koh chhit-pah saⁿ-cha̍p sià-khek-le̍k.

25

Hōe-tiong siū sǹg ê lâng só͘ chhut ê gûn, chiàu sèng-só͘ ê phêng, ū chı̍t-pah tha-liân-tek, koh chı̍t-chheng chhit-pah chhit-cha̍p gō͘ sià-khek-le̍k.

26

Kìⁿ-nā kè-khì kui tī hiah-ê kè-sǹg-ê, tùi jī-cha̍p hè í-chiūⁿ, ū la̍k-cha̍p-bān liân saⁿ-chheng gō͘-pah gō͘-cha̍p lâng, chiàu sèng-só͘ ê phêng, ta̍k-lâng chhut-gûn pòaⁿ sià-khek-le̍k, chiū-sī chı̍t pí-ka.

27

Ēng hit-ê chı̍t-pah tha-liân-tek ê gûn, chù sèng-só͘ ê khū, kap tiùⁿ-lî-thiāu ê khū; chı̍t pah tha-liân-tek chòe chı̍t-pah ê khū, chı̍t ê khū ēng chı̍t tha-liân-tek.

28

Ēng hit-ê chı̍t-chheng chhit-pah chhit-cha̍p-gō͘ sià-khek-le̍k ê gûn, chòe thiāu ê kau, iā pau thiāu-táu, iā chòe i ê hôaiⁿ-koaiⁿ.

29

Só͘ hiàn ê tâng, ū chhit-cha̍p tha-liân-tek, koh nn̄g-chheng sì-pah sià-khek-le̍k.

30

Ēng chit-ê tâng chòe hōe-bō͘ mn̂g ê khū, kap tâng-tôaⁿ, kap i ê tâng-bāng ê chân, kap tôaⁿ lóng-chóng ê khì-kū,

31

í-kı̍p tiûⁿ sì-ûi ê khū, kap tiûⁿ-mn̂g ê khū, kap hōe-bō͘ lóng-chóng só͘ tèng ê teng, kap tiûⁿ sì-ûi só͘ tèng ê teng.