Chhut Ai-ki̍p-kì 第 6 章 - 巴克禮全羅

1

Iâ-hô-hoa tùi Mô͘-se kóng, Góa só͘ beh kiâⁿ tī Hoat-ló-ê, taⁿ lí beh khòaⁿ-kìⁿ; in-ūi ēng kôan-lêng ê chhiú, i beh chún in khì, koh ēng kôan-lêng ê chhiú, i beh kóaⁿ in chhut i ê tōe.

2

Siōng-tè koh tùi Mô͘-se kóng, Góa chiū-sī Iâ-hô-hoa;

3

Góa miâ chòe chôan-lêng ê Siōng-tè chhut-hiān tī A-pek-la̍h-hán, Í-sat, Ngá-kok, chóng-sī Góa ê miâ chòe Iâ-hô-hoa Góa bē ū hō͘ in bat Góa.

4

Góa koh kap in lı̍p Góa kian-kò͘ ê iok, beh chiong in só͘ chhut-gōa ê Ka-lâm tōe siúⁿ-sù in, chiū-sī in kià-kha ê tōe.

5

Góa iā thiaⁿ-kìⁿ Í-sek-lia̍t lâng hiⁿ-hiⁿ-chhan, chiū-sī Ai-kı̍p lâng tok in chòe khó͘-kang; Góa iā kì-liām Góa ê iok.

6

Só͘-í lí tio̍h kā Í-sek-lia̍t lâng kóng, Góa sī Iâ-hô-hoa; Góa beh tùi Ai-kı̍p lâng só͘ hō͘ lín taⁿ ê tāng-tàⁿ chhōa lín chhut-lâi, koh beh kiù lín thoat-lī in só͘ hō͘ lín chòe ê khó͘-kang. Góa iā beh ēng chhun-chhut ê chhiú kap tōa ê sím-phòaⁿ kiù-sio̍k lín.

7

Góa iā beh lia̍h lín chòe Góa ê peh-sìⁿ, Góa iā beh chòe lín ê Siōng-tè; lín beh chai Góa sī Iâ-hô-hoa, lín ê Siōng-tè, sī tùi Ai-kı̍p lâng só͘ hō͘ lín taⁿ ê tāng-tàⁿ chhōa lín chhut-lâi.

8

Góa chiù-chōa èng-ún beh hō͘ A-pek-la̍h-hán, Í-sat, Ngá-kok hit-ê tōe, Góa beh chhōa lín jı̍p khì hia, chiong hit-ê tōe siúⁿ-sù lín chòe gia̍p; Góa sī Iâ-hô-hoa.

9

Mô͘-se chiong chit-ê kā Í-sek-lia̍t lâng kóng; chóng-sī in ūi-tio̍h sim-lāi iu-būn, iā chòe khó͘-kang, m̄-khéng thiaⁿ Mô͘-se.

10

Iâ-hô-hoa hoan-hù Mô͘-se kóng,

11

Lí jı̍p-khì kā Ai-kı̍p ông Hoat-ló kóng, tio̍h chún Í-sek-lia̍t lâng chhut i ê tōe.

12

Mô͘-se tī Iâ-hô-hoa ê bīn-chêng kóng, Khòaⁿ ah, Í-sek-lia̍t lâng siōng-chhiáⁿ m̄-thiaⁿ góa, Hoat-ló thái-thó beh thiaⁿ góa chit-ê chhùi-chı̍h tun ê lâng ah?

13

Iâ-hô-hoa hoan-hù Mô͘-se, A-lûn tio̍h thôan-bēng hō͘ Í-sek-lia̍t lâng kap Ai-kı̍p ông Hoat-ló, thang chhōa Í-sek-lia̍t lâng chhut Ai-kı̍p tōe.

14

Í-sek-lia̍t chiah-ê pâng-tiúⁿ ê miâ kì tī ē-tóe; Í-sek-lia̍t tōa-kiáⁿ Liû-piān ê kiáⁿ; Hap-lo̍k, Hoat-lō͘, Hi-su-lûn, Ka-bí; chiah-ê sī Liû-piān hiah-ê ke.

15

Se-biān ê kiáⁿ; Iâ-bó͘-lī, Ngá-bín, O-hat, Ngá-kun, Só-hat, í-kı̍p Ka-lâm tōe ê cha-bó͘-kiáⁿ só͘ siⁿ ê Sò-lô; chiah-ê sī Se-biān hiah-ê ke.

16

Lī-bī chiah-ê kiáⁿ ê miâ chiàu in ê sè-hē kì tī ē-tóe; Kek-sūn, Ko-hat, Bí-la̍h-lī; Lī-bī hióng-siū chı̍t-pah saⁿ-cha̍p-chhit hè.

17

Kek-sūn ê kiáⁿ, chiàu in ê ka-cho̍k; Lı̍p-nî, Sī-múi.

18

Ko-hat ê kiáⁿ; Àm-lân, Í-su-hap, Hi-kek-lûn, Ou-siat; Ko-hat hióng-siū chı̍t-pah saⁿ-cha̍p-saⁿ hè.

19

Bí-la̍h-lī ê kiáⁿ; Bo̍at-lī, Bó͘-sī. Chiah-ê sī Lī-bī hiah-ê ke, chiàu in ê sè-hē.

20

Àm-lân chhōa i ê ko͘, Iok-ki-piat, chòe-bó͘; i kā i siⁿ A-lûn kap Mô͘-se; Àm-lân hióng-siū chı̍t-pah saⁿ-cha̍p-chhit hè.

21

Í-su-hap ê kiáⁿ; Khó-la̍h, Nî-húi, Sè-ki-lī.

22

Ou-siat ê kiáⁿ; Bí-sa-lī, Í-lī-sat-hóan, Se-thê-lī.

23

A-lûn chhōa A-bí-ná-ta̍t ê cha-bó͘-kiáⁿ, Ná-sūn ê sió-bē, Í-lī-sa-pa chòe bó͘; i kā i siⁿ Ná-tap, A-pí-hō͘, Í-lī-a-sat, Í-tha-má.

24

Khó-la̍h ê kiáⁿ; A-sek, Í-lī-ka-ná, A-pí-a-sat; chiah-ê sī Khó-la̍h hiah-ê ke.

25

A-lûn ê kiáⁿ Í-lī-a-sat chhōa Phó͘-thiat chı̍t ê cha-bó͘-kiáⁿ chòe-bó͘; i kā i siⁿ Hui-nî-hap. Chiah-ê sī Lī-bī lâng ê pâng-tiúⁿ, chiàu in ê ka-cho̍k.

26

Chit-ê A-lûn Mô͘-se chiū-sī Iâ-hô-hoa tùi in kóng, Tio̍h chhōa Í-sek-lia̍t lâng chiàu in ê kun-tūi chhut Ai-kı̍p tōe ê.

27

Tùi Ai-kı̍p ông, Hoat-ló, kóng beh chhōa Í-sek-lia̍t lâng chhut Ai-kı̍p ê, chiū-sī chit-ê Mô͘-se, A-lûn.

28

Tng Iâ-hô-hoa tī Ai-kı̍p tōe tùi Mô͘-se kóng-ōe ê jı̍t,

29

Iâ-hô-hoa tùi Mô͘-se kóng, Góa chiū-sī Iâ-hô-hoa; Góa tùi lí só͘ kóng it-chhè ê ōe, lí lóng tio̍h kā Ai-kı̍p ông Hoat-ló kóng.

30

Mô͘-se tī Iâ-hô-hoa ê bīn-chêng kóng, Khòaⁿ ah, góa sī chhùi-chı̍h tun ê lâng, Hoat-ló thái-thó beh thiaⁿ góa ah?